15/4/2012

CENTRAL   YMA   CCC   MEETING  NEIH  A  NI.
( YMA General Conference 2012 October 23-25 chhunga neih a ni).

Tuithiang Veng 15.4.2012 :  Central YMA Co-ordination Committee, kum 1-a vawi 3 neih thin chu a vawi 1-na atan April 11, 2012 (Nilaini) khan  neih a ni ta a. He meeting pawimawh tak hian Central YMA hmalak dan tur pawimawh tak tak leh Nikum YMA General Conference thurel bawhzui dan tur chungchang an sawiho ber a. Ram leh hnam tana thu pawimawh tak tak hemi Ni hian sawiho a ni.
    Central YMA President Pu. T. Sangkunga kaihhruaina hnuaia neih he CCC Meeting-ah hian Aizawl Khawpui leh Zo Khaw hmun hrang hrang atangin palai an kal tha hle a. He Meeting thurel pawimawh tak tak zinga a langsar zualte chu -
    1. Insuarance Company 4, Mizoram a kan hriat lar zual tena anmahni dawrtu te tana awlsam zawka hma an lak duh loh avang leh, anmahni mamawhtu te chunga harsatna an la siam zel chu ngawih bosan mai mai chi ni tawh lova hriat a ni a. Heng Insurance Committee te hi tun atang chuan Central YMA in a bitum tawh dawn a. An hmalakna tur avanga engemaw harsatna tenau te alo thleng ta a nih pawha lo hrethiam turin Mizo mipuite an ngen nghal a ni.
    2. Bangladesh ram leh Mizoram inrina a Ramri hungna ah Mizoram hmun zau tak hung tel a nih loh avangin hei hi siamthat leh nise tiin CCC Meeting chuan an rel a. Hemi chungchang hi chinfel thuai tha an tih thu an sawiho a ni.
    3. Mizorama hnam dang sumdawngte zawn chhuahnaah a tul anga tan lak zel nise tiin, tan lak dan turte sawiho a ni.
    4. Ei rawngbawlna Gas vang ta lutuk leh hralh ruk thu te, mipuite harsatna siam zawnga thil tih awm chungchangte leh a tihreh dan tur sawiho a ni.
    5. Buhfai retailer atanga buk tling lova lak thin thu te, Petrol leh Diesel pawlh dal chungchangte pawh sawiho a ni a. Hemi kawngah hian thil ti dik lote chhuia, manchhuah an nih theih nana YMA memberte hnena zirtirna uar zawka sawi tam nise an ti.
    Tin he CCC Meeting ah hian YMA General Conference thu lo pass tawh hrang hrangte chungchanga hmalak alo nih tawh dan report a ni a, hmalak zel dan turte sawiho a ni.
    Kumin 2012 a Central YMA General Conference Kawrtethawveng Khua a neih tur chu October 23 - 25 chhunga neih nise tiin he CCC Meeting hian an rel bawk a ni.
LAWRKHAWM
**Tunlai hian kan vengchhungah Ui khawlaia tla a tam thin hle. Ui hlau mite tan khawlai a ralti takzet. Tin, Vawk talh thin ten mahni hnuhma tihfai nghal zel a tha khawp mai.
**    Pu. C. Challiana, Pu. C.Kapchawla leh Pu. Vanlalrengpuia te  chu hritlang awmna leh Khawsik avangin tunlai hian an nuamsam meuh lova, an In lamah enkawl mek an ni.
**    Pu. F. Lalfakawma chu tunkar kalta khan Durtlang Hospital-ah a khel ruh zai a ni.
**    Pi. Lalrinkimi w/o Pu.Lalthianghlima, Secy. TYMA, chu a pa a boral hnuin Chhungkaw pawimawhna avangin tunkar kalta khan Lunglei lamah a zin phei a. Kar laihawl khan dam takin a rawn haw leh ta.
**    Pi. C.Lalduhzuali w/o Pu. Robert Zohmangaiha chu April 11 (Nilaini) khan a Pile lam thalo avangin Aizawl ivil Hospital ah zai a ni. Tunah hian an in lamah enkawl chhunzawm mek a ni.
**    Pu. Rochungnunga chu kar 1 zet TMEF Gospel Camping a rawngbawl-a a thang hnuin tunkar tir lam khan a rawn haw leh ta.
**    Pu. Rotanga te Nupa chu Chhungkaw pawimawh avanga Pukzing leh Phuldungsei lama an zuk thang vang vang hnuin, tunkar Ningai khan dam takin an rawn haw leh ta.
**    Vengchhunga Airtel Post Paid hmang / nei Bill hmu lo leh harsatna nei chuan kan Veng Bialtu Elvis-a Ph: 9612327242 ah hriattir tur a ni.
**    Pi. Lalengzami w/o P.C. Vanlalfaka chu damlohna avanga Durtlang Hospital a hun engemaw chen a awm hnuin that lam panin a rawn chhuak ta.
**    Pu. Lalthatluanga te chhungkua Good Friday hmanga Suangpuilawna zin chu dam takin an rawn haw leh ta.
**    Pi. Lalnunpuii (NP-i) w/o Lalnundika Serchhip zin chu tunkar khan damtakin a rawn haw.
**    Pu. Zohmingliana Sailo te chhungkua chu tunkar khan Pu S. Lalmuana te In ah an insawn chho.
**    Pu. R.D. Lalsanga V. Sec chu tunhnai khan Nisapui High School atangin KVM ah sawn a ni a, tunkar thawhlehni khan a zawm.
ARTICLE
HMELCHHIAT VANGA KEI ANGA LUNGAWILO TE PUALIN
                                                                                                           - Tv Zonuna
    Darthlalang chuan kan inthlek vut vut a, “HMELCHHIA” ti a sawi tur chu ni bikin ka inhre lova, mahse hmeltha te huanga awm ve tur chuan tuma hnar hauh loh leh tuma (GET OUT, ve khanglang a) backthrast chhuah ni miah lo in keimah leh keimah ka inhnar tlat si a lawm le, tih ngaihna avang a ni e, ka mit hian nge maw min hnar tiin kan in en chiang a, AR veng a tana tha khawpa kalh erawh a ni bik hauh lo tih min sawi pui tur a (JUDGE) thu hretu ka koh ngamna lampang ve tak a ni.
    Ka hmui hi a lo ni zawk mahna tiin ngun zetin kan en leh a, Burma vawkpui hmui ang em a pawrh chu niin ka hmu bik silo, kum thum liam ta a Venglai dawr lun ber neitu ka nu Ngaihawmi’n a sweet zawrh lai  Duli man theihnghilh hauh lo a Biak In kawt a min lo thin chatna hmui aia la nalh hret zawkin ka hre ve khanglang bawk si... hui ha... a mangan thlak tak zet zawng a ni e, tlem a pawrh deuh hi a kam tam hmui lo viau zawkin  ka hre leh hnuhnawh a, hei aia pan hleng tur chuan kan Veng nula te reuh te te  Switzerland lamkhuang lian chi ang lawih mai a lian leh fual mawng bawr nei leh si ten a Jeans tight teng tawng an ha thianpa David-a Kawlni an inhmeh a tih loh thu ka bula a sawi thin ang hian ka inhmeh in ka mawipui chuang bikin ka ring silo, ka hnar pawh hi manganthlak khawpa tawk a ni bik lo tih chu ka mawi loh chhan ni awm a ngai a lak hran ka tum apianga ka rilru a lo lang thin a ni, ka lu pawh hi office atanga mi ai a haw hma phahna tham khawp a lian chu a ni bik lo a lawm. Mahse enga ti nge ka hmel hi a tha ka tih loh thin le..??
    Ka thian duh tak tak A kawlnia te anga fa pahnih neih tawh hnu pawh a inkhawm aia computer games a Pocket Tank ringawt ka atchilh loh vang te, Mamawite-a te anga Mautuai tiat lek a sin rit ret chawn chhe zet ka neih ve loh vang te leh, thian duhtak Pu Chuauthuamliana te anga pa chal lang ka ni velo te, A tawk chauh a tlangval ria zeih zawih sang tha tak inkhaithli thlarh mai a ka lo piang bik erawh hi chu engkim ti thei, lei leh van leh a chhunga cheng te zawng zawng min siamtu Chunglam Inspector hnenah khian bang lo a lawmthu sawi tur ka lo ni reng zawk a lawm le.
    Chu zawng zawng ngaihtuah chunga a tawpa ka khaikhawmna chu hei hi a ni, ka hmel hmai peng hrang hrang hi a mal te te a lak hran chuan manganthlak khawpa chhia hi a awm bik lo reng reng, mahse an vai a, an awmkhawm pawh a, an tangrual thiam thlawt lo ina min ti hmelchhe lutuk ta hi a ni apawi lai ber chu, ka bianga rawra lo in phum ru in ka biang a do puar pawh hi exer kan la tak tak anga Victoria Secret Super Model chhuanvawr Heidi Klum dul thluar ang maiin ala thawp sat dawn chiang khawp mai, ka hmel tangrual lo lutukin min tih lungnih loh chang apiang hian nih bak chiah awt a, sam nemin sam khawng a awh na khawvel, thau deuhin cher an chak tlatna rilru, cher deuhin thau deuh duh a damdawi an ei chuk chukna hringnun hi mak tiin ka khat thin. Chuvang chuan mahni nih dan tur a khuarel, tih danglam theih tawh si loh hi lungawi taka pawm thiam a, chuta tanga a tha zawnga mahni insiam rem thei mi te hi mi vannei an ni thin, chutiang mi chuan mahni nunna ngei pawh ngaihhlut nachang an hre bik thin, hreawm tawrh chang te chu nei ve thin mahse harsatna chu huaisen takin an hmachhawn thin, chu chuan chakna a pek zel bawk a ni. Chuta tang chuan he hringnun hi nuam ti takin tu dang mah awt bik lo in an lo hmang thei reng alawm.
        Mi then    khat hausa te,
        Chu i it dawn chuan.
            Isua chatuan thilpek,
            Hlu che ngai ve la.
         Sumin a lei theihloh,
        Thil i chan fo hi.
            ngaihtuah bawk la,
            lawmin i lo khat a ni.
    Ka thian, he hringnun khawvelah hian tumah hi awh tlak an lo awm lo ani.
MEMBERPUITE CHANCHIN
**Pu. Benjamin Laltanpuia chu a hnathawhna hmun Lungchhuan atangin tunkar Nilaini khan a rawn haw zawk a. Nimin lam khan a chho leh nghal niin kan lo hria.
**    Pu. H.Laltanpuia (LTA), Pu. Romanthanga (Lalpate-a), Pu. Lalrozauva leh Pu. Zothansanga te chu tunlai hian an hna thawhna hmun atangin Chawlh leh Duty pawimawh avangin vengchhungah an awm mek.
**     Nl. Sundaythangi c/o Pu. Thanglianzauva chu Lalthantluanga Electric Veng nen Methodist Biak In Edenthar ah tunkar tirlam khan an innei.
**    Tv. Lalrinliana chu a hnathawhna hmun Lunglei atangin tunkar khan hna pawimawhna avangin a rawn haw.
**    Nl. Lalramliani c/o Pu. C. Challiana chuan tunkar khan Tlungvel-ah pasal a nei. Nl. Lalawmpuii leh midang engemaw zatin an tawiawm.
**    Nl. Lalthazuali chu tunlai hian a Nu damloh avangin Sihphir lamah a zin.
**    Nl. Malsawmtluangi leh Joel Lalhmangaiha te chu tunkar zirtawpni khan Tuikhuahtlang Kohhran Hall ah an innei, kan lawmpui e.
**   Pu. Lalthakima chuan tunkar kalta khan Karizma Bike thar tha tak a lei a, kan lawmpui hle.
**    Tv. R. Lalduhsanga (V. Sec) chu chhungkaw pawimawh avangin Kolasib lamah a zin.
**    Nl. Lalthantluangi chu tunkar khan chhungkaw thil pawimawh avangin Vairengte ah a zin.
**     Nl. Rintei pawh inneih hmanga Sihfaa zin hnuin dam takin alo haw leh ta.
INKAHNA
**“  Ka rawn haw hman ta si lova! Chutih lai karah Pu. Hnuna leh Pu. Siama te an lo damlo a, Pu. Lunga lah a regular thei bawk silo. Good Friday Pu. Para hova in lo hmang ta naw naw mai tur kha ka  ngaihtuah  lutuk che u a!!        - Pu. Bena  ( Lungchhuan  P/S Lecturer)
** “  Pi. Baby, Pu. Zalena Congress in , ‘Pi Baby-i hi Sir tih vek tawh tur’ a ti a. ‘ Sir’ kan ti tawh dawn che  a nih chuan ‘Sir Pi. Baby-i’  i ni tawh dawn bawk si a?’                                                           -  Sir. Para   **  “ YMA DAY intihsiak a hnai tawh...Zohming, kumin chu Badminton Singles-ah Lalawma i hneh ngei a ngai. Nang pawh Duat-i, chhangchhe Nu mah nila i inpuahchah tan a ngai. Mabiak nang phei chu kan innghahna ber i ni leh dawn e. Football tih angreng Gold Medal 1 chiah awmna ah hi chuan kan insawrbing tur a ni lo.”       
                       - Pu. Khawlrema
**  “ Keini Section chu kan ngawi reng dawn! A hunah ‘Ehe! Ehe!’ In la ti mai ang. A hun a thlen hma-a inhampuar ve vak vak chi kan ni lo! Tin, Khawlrema te anga mahni memberte a ‘Gold Medal’ anga thlir thin kan ni velo bawk! Kan Kumin Budget tlak vek tawh thute kha chu an lo hre ve tawh ang chu maw?”             
                   -  Pu. S.H. Lalropuia
** “ Kumin hi TYMA member te inthlahdah loh kum tur a ni e. Kan Silver Jubilee lawmna atana kan inpuahchah kum a ni dawn a. Hnatlang chi hrang hrang pawh koh ala ni zel dawn. Hnatlang ve ngailo member te lansarh Kum tur a ni a. Hnatlang ngaihsak ngailo chhungkua te phei chu .........?”                   
                -   Tuithiang Veng Val Upa te.
BRANCH HNATLANG NEIH A NI
    TYMA Silver Jubillee hnatlang chu neih chhunzawm zel a ni a, nimin zing khan member 10 vel an hnatlang a, member te kan tan tlan a ngai hle a ni. Tin, tunkar lo awm tur Thawhlehni leh Inrinni hian hnatlang hi chhunzawm leh tur a ni a, memberte atam thei ang ber thawkchhuak turin kan in hriattir a ni.

8/4/2012

YMA  DAY  2012  ROPUI  TAKIN  TYMA 
IN  HMAN  TUM.

Tuithiang Veng Dt. 8.4.2012: Tuithiang Veng Branch YMA Executive Committee 3.4.2012 zana neih chuan kumin YMA DAY lawm dan tur an sawiho a. Kum dang ang bawka Section te inelna chi hrang hrang hmangte, hnatlang leh thil tha dang tihnana hman nise an ti.
    TYMA Executive Committee hian Kumin YMA Day kan hman dan tur chungchang hi uluk takin an sawiho a. Member tam zawkte duh dan angin a ropui leh nuam thei ang bera (Kum dang kan hman dan anga) hman leh nise an ti a. Section 3 te leh YMA Chhangte inelna hrang hrang buatsaih hmanga hman a ni leh dawn ta niin a lang a. Hei hi TYMA member te pawh ina nuam an tih dan ber leh an nghahhleh ber thin a ni a. Sawiseltu leh thlawp vak lo awm thin mahse, TYMA member tam zawkte hian he hun hi kan hman dan thin  anga hman hi a nuam an ti ber a. Hei hi YMA DAY an nghahhlelh chhan ber thin a ni bawk.
    TYMA Executive Committee chuan Kumina YMA DAY kan hman dan tur lo buaipui tur hian Organising    Committee an ruat nghal a, heng mi 5 te hi hruaitu atan an thlang a ni -
    Chairman -     Pu. C.Lalsangzuala
    Secretary  -     Pu. R. Lalthlamuana
    Member te -     Pu. Khawlremthanga, Pu. Laldanmawia,
            Pu. Hmangaihrammawia
    Hriattir an nih tawh angin TYMA Section leh Sub- Committee peng hrang hrangte chuan Kumin YMA Day a kan intihsiakna tur Items te thlangin, Organising Committee te hnenah hian April 13 ral hma ngeiin an thehlut dawn a. Hei hi Organising Committee te hian lo thlifimin, an thlanfel Items te chu May thla a Branch YMA Executive Committee ah an thlen leh dawn a ni.
    Tin, Organising Committee te hian Intihsiakna Items bakah hian  Vengchhung thenfai hna te leh Day puala tihtur dang hrang hrangte pawh lo duanglawk turin Organising Committee te kutah hian thuneihna an dah bawk a ni.
LAWRKHAWM
***    Kan Veng Local Council te chuan Vengchhung changkannan hma chak takin an la mek a, Vengthlang D Mual tuikhur chu nimin Inrinni khan mipuite hman theih turin an siam fel ta a, Local Council chungah Veng mipuiten lawmthu an sawi tak meuh meuh a ni. Kan Local Council te hmalakna hi veng mipuite hian i thlawp tha ang u.
***    Pu. K. Vanlalruala Local Council Vice President chu tunkar kalta Thawhlehni khan a hnathawhna hmun Samtlang lamah a zin. Damtaka a rawn haw leh thuai kan beisei.
***    Pu Khawlremthanga Local Council member te chhungkua chu nimin Inrinni khan an in luah lai chungah an insawn chho.
***   Pu. F.H.  Hranghnuna chu hun engemaw chen Durtlang Hospital-ah zung kawng tha lo avanga enkawl a nih hnuin tunkar kalta thawhlehni khan thatlam panin a rawn chhuak.
***    Pu Thanlianzauva chu hun engemaw chen kawngna avanga In lama a in enkawl hnuin tunlai hian thatlam a pan niin kan lo hria, a lo thatchhuah leh thuai theihnan duhsakna kan hlan e.
***    Nl. Margareth Lalrinawmi Fanai chu tunlai hian a hnathawhna hmun Mamti atangin a rawn haw.
***    Pu R. Chalkunga chu tunlai hian damlohna avangin In lamah enkawl mek a ni.
***    Tv. Lalrosanga V.Sec Fireman chu tunkar kalta khan Guwahati atangin a rawn haw.
***    Pu Lalthatluanga te chhungkua chu Good Friday hmang turin an khua Suangpuilawn ah Nilaini khan an kal a, tluang taka an rawh leh thuai kan beisei.
***    Pi F. Laldawngliani w/o Laiawrha chu tunlai hian a hrawk (aw bawm) tha lo avangin In lamah enkawl a ni.
***    Np M.C. Lallawmkima s/o M.C. Vanlaltlana chu tunkar khan Grace Nursing Home ah a Toncil zai a ni a, a lo thatchhuah leh thuai kan beisei.
ARTICLE
       
 CHITE  LUI-A  KAL  THIN  THU. ( Part - I)                                                - U. Sanga
    A mak khawp mai! Khatih hunlai 1982 - 85 chho vel khan chhungten an phal lo chung chungin, Sikul chawlh ah te khan Chite Lui kha kan thleng thla chamchi a. Tui kan cheng a, Sangha te tak te te kan man thin bawk. Veng naupangho kha a huhova kal thin kan ni a, Tiffin, etc. engmah kan pai ngai lova, kan ril a tam haw thin hle.
    Tum khat chu engemaw zat kha ‘Holiday’ hmangin kan thawk thla leh a. Lengkir 1-na (tuna World Bank Bridge) hnuai zawn velah khuan, tuikhawhthla hnuaiah tui kan cheng sup sup a. Kan Leader te zinga pakhat tuna Pu. Lalhmingchawia an tih luai luai, Tuithiang Veng Kohhran a Sunday School Zirtirtute ACR khawiha, endik mektu hi a tel ve a. Khatia tui kan chen sup sup lai khan a kekawr zuih over lutuk kha phelh tumin vaukamah khan a buai hle a. Thian 2 vel tena an han pawh pui ngial hnuah pawh khan a phelh thei ta mai lova! (khatih hunlai kha Kekawr zuih uar hunlai a ni a, tlangval hre tan K’u Bawiha te rual khan an la thutak thin bik hle a ni!).
    Chutia a kekawr phelh tuma a beih chat chat lai leh keini ho tuia chenga kan hlim viau lai khan thawk leh khatah ruah mal lian tak tak hi a rawn tla tan ta phoh phoh a! A tla zing tual tuala, ruah kha a sur a ni zui ta mai a! Bawngkawn lam atanga rawn sur tan a nih avang khan kan rual u deuhte khan Luia awm zui rei loh kha a tha a ni tih an hriat avangin, kan tuicheng lai chu min ko chhuak nghal a. Kan phili ta nuai nuai mai a! Mahni thawmhnaw kha chuhin, lui hnar lam pan chuan khamah kan lawn chho ta a. Chutih lai chuan K’u Bawih-a pawh khan rang taka a kekawr tight tak chu ha tha lehin, min rawn umzui chho a. Luitui kha a mak amakin a rawn pung tulh tulh a, kal a harsa telh telh a. Kal lama kan Kerek thleng vela kan dai thlak kha kan kaiza thleng a rawn ni ta thuai a. A khauh em em mai bawk si a. Bethlehem Vengthlang Sahuan kai kan thlen chhoh tak laite khan a chhak lam atang khan tui kha a rawn so thla tan chauh kha a ni a. Tumah talbuai lutuk awm lova hmun him lam kan thlen theih nana ruahmanna siamtu kan rual u te kha an lo fakawm khawp mai. Khatih lai khan an la naupang ve awm fu si a!
    CHITE  LUIA  KAL  THIN  THU. ( Part - II)
     Kum 1984 Good Friday kha ni tain ka hria. (Good Friday chu a ni chiang). Saron Veng naupang ho khan chawp leh chilh angreng takin Chite luia kal kha kan rawt chhuak a. Mi 20 vel zel kan liam thla ta a. Sahuan thlang velah khuan kan chawl a. Chutia kan chawlh lai chuan tuia Rul awm kha kan zinga a Rambo deuh ho khan an hmu fuh a, an that ta a. Chutah mei kan chhem ta vak a, Rul (Puitling Zezungpui tiat vel) chu meiah chuan an rawh a, meipui a rem hnuah chuan an thur chhuak a. ‘Ei vek tur’ an ti ta a! Thian tena inches 1 vel diat diata an chan hnu, a hnukhawiah chuan loh theih lohna avangin ( Mipa nihna atana thil tul tak a nih avangin) ka Share chu ka han dawng ve ta a. Thian tena an ei zawh tawh lamah chuan ka han tem chhina, rinai takin ei alo hrehawm lem lova. Ar Nghawng hi a ang ta berin ka hria.
    Chutia ten ru angreng taka ka eia, tui ka tih ve phian lai leh ka ei zawh dawn tep lai chuan Armed Veng Jail ( Khatih lai khan Chite chhak Armed veng nena an inkarah khuan Jail tha taka awm a. Khatah khan Hnam sipai te an tan tir deuh ber thin a. CRP ten uluk takin an veng thin) ah khan Silai a puak ta dawp mai a. Kan thlir chho a, chutia kan thlir mek lai chuan Silai chu a rawn ri leh ta dawt dawta, a hnu deuh ah chuan a hma aia rang zawk mah chuan a han ri leh ta zawt zawt mai pek a! Chuveleh! Boss te khan Sahuan lam pawh kha himin an ring ta lo a niang chu...Chite lui mawng lam pan chuan min tlanchhiat thlak pui ta chiam mai a. Thlabar lutuka kan tlan thlaka, luidung kawi kan liam hnu chuan Chite pawhtu, Lui-te, lo awm hmasa ber hnar lam pan chuan min tlanchhohpui leh ta a. Eng thil nge thlenga, eng boruak thalo chiah nge thleng tih kan hriat loh avang khan kan hma lam pan khan a chak thei ang berin kan tlan ta vak kha a ni a. Darkar 3 dawn Luihnar lam pana kan tlanchhoh hnuah chuan Bethlehem Vengthlang leh College Veng inrina kawr tawntirh ah tlan chhuakin, Motor kawngpui kan pawh ta hlawl mai a. Eng a thawl duh huai huai ngei mai. Mahse kan hah em em thung. Kan chau lutuka, kawngpui kamah khan rei tak kan chawlh hnuin In lam panin kan kal thei ta chauh a.
    A hnua kan hriat leh danin khami Ni khan Armed Veng Jail atang khan Hnam sipai pakhatin tlanchhuah alo tum a ni awm a. Kawmawl hmanga banga a lawn liam laiin CRP Duty in lo hmuin, a kap zui a, a kap fu lo a. Chutah a ni kha a hung pawnah khan a zuangthla a, CRP kha lo tlankhawmin, an rawn kap zui ta zel a. Armed Veng to Chite Road kosang tak atanga a zuangthla ta chuan a ke a bilh na palh ta hlauh mai a! Chu chu amah umzuitu CRP te khan rawn nangchingin, an chhuih ta hrep mai a! Thi lo aruangin Jail lamah khan an hnuk chho leh ta a ni awm e! Aw Zoram! Kan Mizoram! Khatih hunlaia nangmah avanga tuar thinte kha hre reng rawh! Keini thangthar zawkte pawh hian keimahni avanga an thatlai hun Jail bang zuta hmang tate kha i theihnghilh lovang u. Remna leh Muanna siam alo ni ta te kha aw... a lo va hlu tak em! Mizoram hi kan ram a ni e.
MEMBERPUITE CHANCHIN
 ***     Pu Joseph Vanlalhruaia Sailo kan chanchinbu Cir. Manager chu Mizoram Table Tennis Association (MTTA) Executive member 10 ruat zingah a tel a, kan chhuang hle a, kan Veng pawhin  kan tangkai pui ngei kan beisei.
***     Pu Vanlalrengpuia Branch Committee member chu hun engemaw chen Farkawn lama a zin hnuin tunkar khan a rawn haw, kan lo hriat dan in Pu Reng a hian tunhnai khan Sericultural Dept. ah hna a hmu thar a, kan lawmpui hle a ni.
***    Tv. Zonunsanga chu tunlai hian damlohna avangin Doctor ten Bed Rest an neih tir mek a, In lamah enkawl mek a ni, a lo thatchhuah leh thuai kan beisei.
***     Nl. Lalrawngbawli T.Sec chu tunkar kalta khan Durtlang Hospital-ah a kut zai a ni a, a lo thatchhuah leh thuai kan beisei.
***    Tv. Lalmalsawma (Mal-a) s/o Lailiana chu a hnathawhna hmun Shillong atangin chawlh hmangin tunlai hian a rawn haw.
***     Pu Lalrozauva K.Sec chu tunkar zirtawpni khan a awmna hmun Assam atangin chawlh hmangin a rawn haw
***     Tv. Robert Lalchhuanmawia m/o Lalthakimi K.Sec chu tunhnai a B.Ed result chhuak ah II Division ah a pass a, kan lawmpui hle a ni.
***    Nl. Jane Lalmuanpuii d/o B. Thasiama chu hun engemaw chen damlohna avanga a rawn haw hnuin tunkar kalta khan a hnathawhna hmun Bungthuam lamah a liam thla leh ta.   
***    Nl. Lalrinsiami Branch Committee member chu tunlai hian thil tul avangin Phai lamah a thang mek, damtaka a rawn haw leh thuai kan beisei.
***     Nl Lalrammawii (A ram-i) chu hun engemawchen chhungkaw pawimawhna avanga Champhai lama a thanghnuin tunkar Ningani khan a rawn haw.
***     Nl Malsawmtluangi (sawmte-i) leh Tv Joel Lalhmangaiha te chu tunkar lo awm tur Dt 13/4/12 (Zirtawpni) hian Khatla Bungkawn Kohhran Hall ah an innei dawn. Kan lawmpui e.
INKAHNA
***“  Hindu ho rin dan ang hi dikin, piang nawn leh dawn ta ila! Kei chu Vawk nih hi ka hreh  ber!  Rochhara te unau ina an Pa kha ka ni tih  hre reng reng lova min han khawng chawrh chawrh mai tur hi!!”                                                      - Pa Chhuanga
*** “ Piangnawn leh theuh dawn ila chuan Manthanga hi chu Sanghar ah a piang hrim hrim! Ar man a thiam em mai!”                                            - Pu. Zongena
***  “ Kei chu piangnawn leh mah ila Congress tho kala ni ang!”       
                    - Pu. Rahul Zalena
***  “ Hey! Pu. Biakzau,  Paihte hi min ti teh chhen a! In hnam HUHA hi in va Common  lo ve? Tuikuk hnam peng khat in nilo tih hi sawifiah han tum ta che!”                                                                                 -  Unaupa Roliana
***  “ Thiannu sawmte engtin nge hma in lak tan, i awmbo hma ngei hian i thil tih dan engkim min han hirlh ve teh chuti lo chuan kan hun a liam mai dawn a nia...a changa dawr han hawn leh ringawt mai chu, hmabak a ko em mai... ”
                    - Nula EK-i
NATIONAL WUSHU CHAMPIONSHIP AH   KAN VENG CHE THA   
    Tv. R. Lalrempuia leh Lalruatdika (D Mual) te chu National Wushu Championship Jammu & Kashmir a neih zawk takah Mizoram aiawhin an tel a, Tv Rempuia hian Sub-Junior ah Gold Medal a la, tin, Tv Ruatdika hian Silver Medal a rawn la bawk. Mizoram Team te hi Manager Tv Lalrinliana’n a hruai, hetiang mi Vengchhungin kan nei hi kan chhuang hle a ni.
LOCAL COUNCIL HRIATTIRNA
 Venglai Middle School kawt tuikhur chungchanga hriattirna:
1) Tuikhur chhak ah Insuk leh Inbual phal a ni lo.
2) Lirthei sil leh Lirthei a tui chawi phal a ni lo.
3) Tuikhur chhak zawkah Pipe leh khai chhuah a, pipe hmanga tui pipe chhawn phal a ni lo.
4) Tuikhur thlang pipe tur reng rengin zan dar 9 atanga zing dar 3 inkar ah pipe theih a ni ang.
    Vengthlang Tuikhur chungchanga hriattirna:
1) Tui pipe turin zan dar 9 atanga zing dar 3 inkarah pipe theih a ni ang,
2) Insuk leh inbual khap tlat a ni.
LENTUPUI SMS HUANG..!!
***  “Khawtlang leh Kohhran a inhmanna chang hre lo tleirawl leh rawlthar te hi kan nu leh pate hian engtiang chiahin nge kan fate kan zirtir thin, kan fate hi kan ram leh hnam chawisangtu turte an ni si a..”                                                -No Thups

SMS Huang hi khawtlang tana hmasawna tur leh bengvarna lam bakah infuihna thu hrang hrang thawn duh te tana buatsaih a ni a, a thawn duhte chuan Ph 9615382904 ah thawn theih reng a ni e.





           

1/4/2012

TUITHIANG  VENG  HALL  SAK  CHHUNZAWM A  NI  LEH  DAWN TA!
(  A pawn lampang khawih hmasak a ni ang! )

Tuithiang Veng Dt.1.4.2012 :  Tuithiang Veng Hall saklai mek chu tunkar lo awm tur atang hian sak chhunzawm a ni leh dawn ta a. A Sakna tur Sum hi AMC atanga kan hmuh la hman bang Rs. 50000/- vel leh DoNER atanga 3rd installment kan hmuh leh tur Rs. 620,000/- atangin a ni dawn a. DoNER atanga kan hmuh tur bik atang hian Rs. 140,000/- vel ba rulh nana hman a nih hnuah, AMC atanga kan pawisa la neih zawng zawngte nen avaiin Rs. 550,000/- chuang Hall sak chhunzawmnan hian ka la nei tura ngaih a ni a. DoNER  atanga kan sum hmuh tur bik hi April 2012 thla chawhma lam hian a chanve vel tal chu hmuh hman beisei a ni bawk.
    Kar hmasa a Tuithiang Veng Hall Management Committee, Tuithiang Veng Hall-a Committee te chuan Superviser turin Pu. R. Mankima an ruat a. A Assistant atan Pu. Lalzekhuma an ruat nghal bawk. Hetih mek lai hian tunkar Nilaini  khan Pi. Baby Lalrammawii’n Balu Meter 7 ama sum sengin a chah thleng a, hei hi thiar thlak vek a ni tawh a, tunkar chho ah hian Mistiri ruaia hna tan nghal tum ani.
    Kan Veng Hall kan han sak chhunzawm leh dawn tak avang hian Vengchhung thalaite an phur thar hle a. Hnatlang ilo vel pawh koh a nih a rinawm a, chung hunah chuan Tuithiang Veng inti Nula leh Tlangvalte an tlanchhiat a rinawm lo a. Kan Thalaite hian Veng tana thil tha neih anawm zia leh tunlai khawvelah hian rualawh a nat tawh zia kan hre chho mek zel a. Mahni Veng thil tha neihna kawngah hian kan tha te hi kan ui  dawn lo hle niin a lang a, a lawmawm hle mai.
    Kan Veng Hall sak chhunawm turah hian a lang thei, a pawnlam hna thawh hmasak tum a ni a. Hei hi Nodal Department R.D. Directorate te duh dan pawh a ni a. A pawnlam bang Plaster leh rawng hnawih a nih zawhah leh a Chhim lam room pawimawh tak sak zawh a nih hnuah, sum la awm dan azirin, a chhung lam thawmthat hna pawh a theih ang tawk tawka chhunzawm tum a ni.

TUITHIANG  VENG   LEH   CHHINGA  VENGTHLANG  INKAL  PAWHNA   KAWNG  LAIH  ZAWH  A  NI  TA!
    AMC atanga min bialtu Councellor Pu. Ruatsanga duhsakna kan dawn atanga TYMA tena kan thawh tak kan Veng leh Chhinga Vengthlang inkalpawhna kawng pawimawh tak laih zauh hna chu nimin khan  zawhfel a ni ta a. He kawng laihna atan hian TYMA chuan hnatlang tum 3 an ko tawh a, hnatlan apiangin member 40 chuang kan thawk chhuak ziah a ni. 
    Silver Jubilee lawmna atana sum leh pai kan peipunna pawimawh tak a  ni tih hria a inhlawhna min ngaihtuahsaktu Pu. Ruatsanga leh TYMA member tlawmngai tak takte chungah leh an ram phal taka petute chungah Br. YMA  hruaitute chuan lawmthu an sawi e. He hna thawh zawh tak atang hian Rs.50000/- kan hlawh dawn a ni.
LAWRKHAWM
 **    TYMA Property Sub-Committee bungraw hawh man veng mipuiten kan ngaihthah hle a, tunah hian bungraw man la pe lo kan la awm nual a, hei hi aranglama pe turin kan inngen a ni. A pekna hmun tur te: Pu V.L. Zuala Ralte, Pu J. Vanlalhuaia te an ni.
**   Vengthlang Pu C. Laldinliana te kawmchhak kawrpui ah tunlai hian bawlhhlawh paih thin kan awm a, helai hmunah hian bawlhhlawh paih phal loh a ni a, helai hmuna blawhhlawh paih thin ten paih tawh lo turin kan inhriattir a, paih lui kan awm a nih chuan an chungah engpawh thleng se kan sawi buai thei lovang. Vengchhunga bawlhhlawh te hi a paihna tur motor rawn kal thin ah hian mitinte hian i paih thin ang u.
**    Kan Veng Local Council te chuan tunlai hian Vengchhung hmasawnna tur hna hrang hrang an thawk mek a, tunlai hian Pi Khawlremkimi te In bul Side Drain an siam mek a, nimin khan helai hna hi an thawkzo a ni. Kan khawtlang hruaitute hmalakna a fakawm hle a, kan veng ah hian a tam thei ang ber kawngpui hi sial ila kan Veng hian hma a sawn ang. Hemi atan hian kan hruaitute hmalakna Veng mipuiten i tawiawm ang u.
**    Nilaini zing khan Hall Sakna tur Balu meter 7  chah thlen a ni a, hlawhfa hmanga thiar zawh nghal vek a nih hnuah ningnawi leh sulhnu awm miah lovin thenfai nghal vek a ni. Hei hi mimal In sa lai te tan entawn a tha khawp mai!
**    YMA  Chhang te chuan nimin zing khan vengchhung thianfaiin hnatlang an nei a, an fakawm hle. A khat tawkin Faina hnatlang hi neih thin an tum niin kan lo hria.
**    Pu. K. Vanlalruala chu a hna lam tul avangin Nimin khan Samthang ah a zin chho. A hna hi a zo dawn hnai tawh niin kan lo hria.
**    Pu. Vanlalsiama Kawlni chu Kolkata lamah Lung zai a nih hnuin tunkar thawhlehni khan thatlam panin an rawn haw, a lo thatchhuah leh zel theih nan duhsakna kan hlan e.
**    Pi. Lalruati te chhungkua chuan tunkar kalta Thawhtanni khan an pa Pu Ngursanga (L) leh an fapa Pu Lawta (L) te hriatrengna Lung an phun.
ARTICLE

TUNHNAI   INDIA  RAM  POLITICS  BORUAK  THENKHAT!            
                                                                                                                                   -  U. Sanga
    Tunlai India Ram Politics hi keini ang rual  pawh hian kan ngaihven lo thei  lo a! A ngaihnawm zawnga thlir phei chuan ngaihnawm angreng tak a ni! Tun hnaia State 5 inthlanna ah, Lok Sabha Inthlan hnuhnung bera chiang taka sorkarna siamtu Congress Party an che chhe ta viau maite hi a mak angreng khawp a! Manipur ah chauh hnehna an changte leh chu State chu an General Secretary Tv. Rahul Gandhi-a Campaign lohna State awmchhun a ni lehzel te? Chutah, Amah Rahul-a’n an chak lohna chu ama mawh liau liau a  a pawm thute hi thui tak sawizui tur awm a ni a. Amaherawhchu; tun tuma an chaklohna State-ahte khan Congress hian hruaitu filawr an lo nei miah lo mai hi alo ni awm a! Hruaitu filawr leh lar chu nei se...... tih an ni ve tlat thung!  Entirnan BJP pawh hian ram pum huapa hruaitu filawr hi Tv. A.B. Vajpayee-a hnuah khan an la nei leh miah lo a. L.K. Advani-a  lah hi an ‘Amen’ tlang thei  mang si lo a? Anmahni thlaktu tur hruaitu Filawr an neih theih mai bawk si loh avang hian an Party hi an buai ru ve mek a. An tum angin inthlanna ah hian an che tha thei bik ta chuang lo a nih hi.
              AKHILESH  YADAV ? 
    Australia ram pum aia mihring tama State, Utter Pradesh Inthlan result an han puang a, rorel lai BSP chu an hmelma lian ber SP ten an han luahlan ta rup mai a! An hneh chiang viau mai bawk si a! Hei hi thilmak anga sawi  loh theih loh a ni! Khati khawpa sorkar nghet anga lang Mayawati-i  leh a Party BSP sorkar khati  khawpa an han tlachhe ta thut mai kha awih pawh a awihawm lo hial a ni. Chutihlai karah chuan SP (Samajwadi Party) chuan India rama mipui tamna ber  State a  Chief Minister atan Kum 38 mi chauh Akhilesh  Singh Yadev-a chu an ruat ta mai bawk a!  India ram mipuite hi kan phu-zuk lo thei lo a nih khai! Mayawati-i tan erawh zawng tunhma a Kishore Kumar-a hla pakhat, “ Yeh Kya hua, keise hua, Kaab hua, Kaun hua, Kaabh hua....” tih hla bak kha hlapuia han thlan tur dang a awm ta hrih lo!
    Kum 1973 July 1 a U.P.  a Saifai khua a piang Akhilesh a hi he State Chief Minister tum 3 lai lo ni tawh Mulayam Singh Yadav a fapa a ni a. Hnehna an chan Ni (Vote chhiar Ni) te pawh khan National Television te chuan amah   hi an tin-rawn ber a. Chuti chung pawh chuan apa chu C.M. leh tura a ngaih thu leh awm a tih thu ala sawi char char a. Mahse an party MLA rual an han kalkhawm  meuh chuan amah hi State Chief Minister atana duhtu an lo tam viau mai alo ni a;  hetiang hian India rama State mipui tamna  bera Chief  Minister naupang ber a ni chho dawn ta a. Ani ang Kum 38 mi chauh ( TYMA Khuangchera  Sec. Leader Pu. Lalte-a te rual lek) ina India rama mipui tamna ber State a han kaihruai tur hi chu a huphurh ve fe turah i han ngai ila. Thalaitena an thlawp that em em hepa hi kan la thlir zui zel ang chu!
    AKHILESH   YADAV-a hi Sainik School , Dhaulpur, Rajasthan a   lut, chumi hnua University of Myshore, Karnataka atanga Bachelor of Engeneering leh Masters of Engineering in Civil Environment Engeneering zir chhuak a ni a. Chumi hnuah chuan University of  Sydney, Australia ah Masters Degree in Environmental  Engeneering a zir zo leh a.
    Kum 1999 November khan a Nupui Dimple nen hian an Innei a. Fa 3 an nei  mek a. Kum 27 mi niin kum 2000 kum khan Kannauj bial atangin Lok Sabha MP tura  thlan tlin a ni a. Kum 2009 inthlanah phei chuan Kannauj leh Ferozabad ah te  atling ve ve a. Kum 2009 khan UP a Samajwadi President a ni ta a. Thla 6 chhungin rally tum 800 chuang neiin Km 10, 000 vel  ke leh Motor in a zinkual hman ni a chhut a ni bawk. Tunah hian UP C.M. 33-na niin a naupang ber a ni dawn ta a ni.
  AKHILESH-A    HLAWHTLINNA  HMANRUA?
    AKHILESH a hian hetia hlawhtlinna  a channa atan hian thawhpui a thlang fuh hle a ngaih a ni a.  Tunhma a Politics-a la inhmang ngai lo, an party a a sawm luh tak leh tuna MLA ni chho ta a thian tha 5 vel te chu a chakna hnara ngaih an ni a. Heng a thian tha leh fing tak tak te nen hian ruahmanna thar siamin Samajwadi Party hi kalphung thara kal turin an duang a,  chumi hmang chuan an Campaign ta a. He boruak thar hi an chhem alh thain, an tifuh ta hle a ngaih a ni. Tin an State a Voters 25% thalai la naupang tak takte hnena Lap Top Computer a thlawna sem an tiam kha an tifuh viau nite pawhin a hriat bawk. Engpawhnise; an term  an tan dawn chauh a, an hmalakna kan la hre  zel dawn a. Chutihlai karah chuan he C.M. naupang tak hi a fing riau  tura ngaih a ni a.   An C.M. hmasa Mayawati-i te anga mahni lim siam vak vak emaw sorkar hnathawk  te sawnkual vak vak angte  kha a tih ve loh rin a ni. Mahse, Politics leh Politician te hi chu thli thaw thi ang deuh hi an ni a, rinlawk thiam hi an har deuh?
PUNJAB  AH CHUAN   ‘SAD  IS  HAPPY!’       
    Punjab-ah chuan ‘SAD is Happy’ an ti a. He fiamthu sang tak hi India ramah a lar hrih hle!A English Language  lamah chuan a dik thei ngai lovang.  SAD  chu HAPPY tiin a sawi theih loh!  Mahse Punjab-ah chuan SAD chu an HAPPY  tlat! Engvangnge ni ta ang? A Chhanna chu ho te a ni...an inthlanna ah Shiromani Akali Dal (SAD)  ten  hnehna an chang a, an hlim  a ni ve mai. Mahse an Chief Minister tura an thlan tak  Prakash  Singh Badal-a hi kum 84  mi a ni a! Tuithiang Vengah pawh rawn awm se, Pu. Rotanga Khuangkaihna bulah pawh a rawn thu peih fo tawh lo maithei!  Chutiang vela upa chu a ni.  State dang leh a rampum anga han thlir pawha thalai zawk tena hruaitu nihna an chelh sup sup laia  India ram kan innghahna ber  State Punjab ina Putar,  MUP pawh pension lek lek tawh, an State C.M. atana an han nei tur hian India ram pumah  fiamthu tharlam a vawrh chhuak a. Khawi  State mah hian he State hausa tak hi an C.M. Putar neih tur avang hian kan awt ta bik lo a nih hi!  A khawhmuhte la fiahin, a  bengte  tal chu ala tha bawk ang chu maw?
    Kan ram a  zau a, kan nitin Political News pawh a tam hle.  Adang chu sawi tawh hrih lo mai ang. Kan Politician tharlam Pu. Khawlrema te ho an lo chiai  phah lutuk dah ange! Keini ho, a ramchhung Politics vei pha chin  ho leh anni  Tualchhung Politics vela la inchhek barh barh hote hi chu kan dan hi ala dang hrih em em  mai bawk si a! Tiraw Pu. Humhim...?
MEMBERPUITE CHANCHIN
**    Pu. Lalthianghlima Branch Secretary te nupa chu tunkar  khan a pu (an nu pa) boral avangin Lunglei lamah an zin a, zirtawpni khan an damtakin an rawn haw.
**     Pu Joseph Vanlalhruaia Sailo chu hun engemaw chen a puzawn hruaia Kolkata lama a thang hnuin tunkar thawhlehni khan a rawn haw.
**     Pu Lalnundika te nupa chu hun engemaw chen an nu te khua Serchhip lamah Centenary hmanga an thang hnuin nimin khan an rawn haw.
**     Pu Laldingliana Sailo te nupa chu tunkar khan Kolkata lamah chhungkaw pawimawhna avangin an zin.
**    Nl Malsawmtluangi Chhangte chu CYMA performing Troups hminga Saiha YMA Conference a Mizo hnam lam entir a kal chu tunkar zirtawpni khan damtakin a rawn haw leh ta.
**    Nl. K. Lalrinpuii (Note-i) chu hun engemaw chen  hnatul avanga Kolkata lama a thang hnuin tunkar khan damtakin a rawn haw leh ta.
**    Pi CC. Lalzarliani chu tunkar khan Pu Thangchungnunga te In hnuaiah a insawn.
**     Tv Lalnunsiama s/o Laltanpuii V.Sec chu tunkar ningani zan khan Lu hai in a tlu a, damdawiin panpui a nih hnuin thatlam a pan niin kan lo hria.
**     Nl. RD Lalnunmawii chu  hun engemaw chen Office han tul avanga Kolkata lamah an thang hnuin nimin khan a rawn haw.
INKAHNA
 ** “  Joseph-a leh Mahrila te hian an bawl theih te, an duh thala an bawl lai hian, an awki hi chhete tal chuan  ti danglam ve tawh rawh se! Duh aiin an tlin  mah mah thin e!”                                - U. Rommy-a
** “ YMA DAY intihsiak a hnai leh ta! Kumin chu keini Section tluka rinkai dang an awm lo! V. Sec hi ‘Dawl’ ang vel an ni a, T. Sec. lah chu ‘Hnap’ ang vel an ni bawk si..... YMA Chhang lah hi....kan pen leh fawk fawk anga, kan hneh leh mai dawn si a.... !”                           - Pu. Lianrivunga   ( K. Sec.  Hard-core  member )
**  “ Nitin ei leh bar lama  kan harsat  tak em avanga kan Chhunkaw 2 ina  Damdawiin lama (Sum tuak tura?) kan tirh luh tak Kapa leh Ka Puzawn lo han kan tawh zawng zawngte chungah leh min la kan tum mekte chungah  lawmthu kan sawi vek e !”                                                - U. Sanga
LENTUPUI SMS HUANG..!!
***  “Kei chu ka ti thin Mihring hi taksa dinhmun a inang lova, sawichhuah zahthlak si a ruk a natna eng engemaw nei, mahse pawnlam lan dan a tha vur si te kan awm a, tin, taksa hrisel tak tak te kan awm a, hetiang ah chiah hian a lawm ka ti thin a, khawtlang leh Kohhran ah hnatlang neuh neuh a awm a, hetiang nikhua a midang dinhmun hre lek lova kan inphut lutuk hi chu a tha lo ka tiin mahni chauh inngaihtuah lovin midang condition hi i thlir thiam hram ang u.  ”                                                - Tv Zonuna

SMS Huang hi khawtlang tana hmasawna tur leh bengvarna lam bakah infuihna thu hrang hrang thawn duh te tana buatsaih a ni a, a thawn duhte chuan Ph 9615382904/9612518787 ah thawn theih reng a ni e.



 



       


   

18/3/2012

HALL  MANAGEMENT  HRUAITU THAR RUAT AN NI TA!
( DoNER atangin 3rd Installment Sum hmuh a ni dawn ta! )

Tuithiang Veng 18.3.2012 :   Kar hmasa Pathianni Chawhma Inkhawm ban khan Tuithiang Veng Hall Management Committee hruaitu thar ruatna leh Charge inhlanna Pu. C. Challiana Inah neih a ni a. Hall chungchanga hmalakna bakah Vengchhung chungchang pawh sawiho nghala  ni bawk. He inhmuhkhawmna ah hian Local Council member te leh TYMA O.B. te an kalkhawm  a ni.
    He meeting hian uluk taka an ngaihtuah hnuin Kum 2012 -2013 chhunga Tuithiang Veng Hall Management Committee Office Bearer atan heng mite hi an ruat -
Chairman    -  Pi. Baby Lalrammawii        ( Chairman Local Council )
Vice Chairman    -  Pu. Malsawmliana        ( President TYMA )
Secretary    -  Pu. C. Lalsangzuala        ( Vice President TYMA )
Asst. Secretary    -  Pu. Lalthianghlima        ( Secretary TYMA )
Treasurer    -  Pu. R. Rohmingthanga        ( Treasurer TYMA )
Fin. Secretary    -  Pu. R. Lalthlamuana         ( Fin. Secretary TYMA )
    Tin, Committee Member turin heng a hnuaia mite hi ruat nghal an ni a, nimin zing khan Tuithiang Veng Hall-ah Kumin Chhunga an Committee hmasa
ber neiin; Hall sak chhunzawm dan tur an sawiho nghal a  ni
1. Pu. R. Mankima  (MUP)         2. Pu. Lalrinzuala                       
3. Pu.B. Thasiama            4. Pu. Lalhmingchawia   
5. Pu. V.L. Zuala Ralte                      6. Pu. Vanlaltluanga
7. Pu. C.H. Vanlalduha        8. Pu. Thuamchungnunga     
9. Pu. Joseph Vanlalhruaia Sailo    10. Pu. H. Lalzarliana       
11. Pu. Lalhumhima                      12. Pu. C. Kapkima
13. Pu. Lalzekhuma            14. Pu. H. Sakhawliana        
15. Pu. Lalremngheta            16. Pu. H. Lianzama       
17. Pu. Thanglianzauva                 18. Pu. Malsawma Khiangte
19. Pu. Vanlalhrila            20.  Pu. Lalparliana Sailo      
21. MHIP  Represent       
    LOCAL COUNCIL  REPRESENT :
1.  Pu. K. Vanlalruala    2. Pu. Zalenthanga    3. Pu. Khawlremthanga
    Hetih mek lai hian DoNER Ministry, Govt. of India chuan kan Hall sakna tur 3rd Installment chu rawn release in, Mizoram Finance Deptt. pawhin release order an tichhuak tawh niin kan lo hria a. Nodal Department R.D. te chuan Thawhtanni March 12, 2012 khan Hall hruaitute rawn biain, Hall thlalak 4 thehlut turin an rawn ngen a. He thu hi hruaitu ten chak taka bawhzuiin, atuk March 13 khan  R.D. Directorate ah an duh ang ang Document leh thlalak hi an thehluh nghal a ni a. Kan Veng Hall saklai mek hi kan sak tan leh thuai beisei a ni ta a ni. Kan Hall hruaitute hnen atanga thu kan dawn danin 3rd Installment ah hian Cheng Nuai 6 chuang hret kan hmu leh dawn a. Leiba  rulh a nih hnuah Cheng Nuai 4 chuang Hall saknan hian hman tur kan nei thei dawn a ni.
        Tin, AMC atanga kan pawisa hmuh Cheng Nuai 1 chu kan lakchhuah thuai theihnan Hall Management hruaituten hma an la mek bawk a. Hall Saknan Cheng Singnga chuang ( AMC pawisa atang hian) kan la nei dawn bawk a ni. Nakum hi TYMA Silver Jubilee a nih tawh avangin hetianga Hall cheithatna tura sum kan han hmuh dawn tak nual  avang hian Veng mipuite, abik takin, TYMA memberte chu kan lawm tlang hle  a ni.

LAWRKHAWM
 **      Tunkar Thawhlehni khan Vanlalpeka inti, Lalpekliana V. Section huamchhunga cheng hnen atangin Mizoram Police te chuan Pistol 2 an mansak a. He thu hi Chanchinbu leh Cable News ahte puanzar a nih hnuin TYMA chuan a zan la la hian an chhui chiang a. Atuk Nilaini zing March 14 O.B. Emergency meeting March 14 zingkara neih leh Local Council te chuan amah leh a chhungte chu Tuithiang Veng atanga inthiar chhuahtur nghal turin an In luah lai neitu hnenah ngenna an pe nghal a ni.
**    Pu. Vanlalsiama chu a Lung leh thisen zama thau tam avangin tunkar Nilaini khan Kolkota a Birla Heart Foundation ah darkar 4 chhung vel zai a ni a. An zai hnu Ni 3 chhung biak pawh theih loha khunghran a ni bawk! An zai hlawhtling hle niin kan lo hria a, kan lawmpui takzet a ni. Dam taka a rawn haw leh thuai theihnan Tuithiang Veng mipuiten kan tawngtaipui reng e.
**    Pi. Lalhmingliani Pautu chu tunkar Thawhlehni zing khan a Lung lam thatlohna  avangin a damlo thut a! New Life Hospital-ah kalpui nghal a ni a. Nilenga he Hostital a enkawl a nih hnuin tlai lamah an In lam panpui a ni a. Atuk Nilaini pawh khan Check-up tura hruai leh a ni a, tunah hian an In lamah enkawl zel niin, that lam a pan chho zel niin kan lo hria.
 **    Pu Hleihchungnunga te chhungkua chu tunkar Thawhlehni khan Pi Thankimi te In ah an insawn. Tin, Pu Lalrinfela Sailo te chhungkua pawh tunkar nilaini khan Pu V.L. Zuala Ralte te In luah thin hnuaiah an insawn bawk.
**    Pi. Tialmenthluaii, Tv. Vanlalriliana Nu chu tunkar Nilaini khan Vaivakawn-ah University Bus atanga a chhuk tur chu chesualin, Bus ke hnung lamin vanduaithlak takin a kerek a chil sawp vek a! Aizawl Civil Hospital a lak a nih hnuin loh theih lohna avangin a kerek chi hnuailam chu tan a ni ta a ni!
**    Pi Zorinpuii d/o Pu Zolianlunga te nupa chuan tunkar kalta Thawhtanni khan Durtlang Hospital-ah Fapa duhawm tak an nei, kan lawmpui e.

ARTICLE
KHAWVEL DERBY MATCH ROPUI ZUALTE...
                           
                                                                                                                                           - Zonuna
    Tun tum Article chu rinloh khan atang daihin in ti teh ang, Mizo te chauh chu sawi loh, kan Veng tlangval te ngei ngei pawh hi Football lawm Veng leh en nasa ber pawl kan niin a lang a, chuavngin, Mizoram chauh ni lo Khawvel pawh in a thlir nast pawl ber Britian ram chhung leh ram pawn thleng pawh a mite ngaihven rawn BRITIAN DERBY MATCH ropui zual bik hi in bihchiang ho ve dawn teh ang, Khawvel rengin an hlut em mai, EL CLASICO te hi chu sawi loh a leng ni ta sw. Engemaw zah chu sawi tur chu awm mahse a ropui zual ho seuh hi in thlir thuak thuak teh ang.
1) Tottenham Hotspurs VS Arsenal : An ni pahnih hi LONDON Hmar lam Club ve ve an ni a, an inkhel pawh hi “NORTH LONDAN DERBY” tiin an sawi kher thin, 1882-ah Tottenham hi din a ni a, A hnu 1886 ah an thenawm lawk a Arsenal din a nih atangin tun thlengin dinhmun sang zawk nih inchuh in an in ngur ta reng mai a ni. Indopui pakhatna hma lamah kha chuan Club upa zawk Tottenham hi dinhmun tha zawk ah an awm chho ngar ngar a, mahse Indopui tawp hnu 1919-a Football League an han tan leh chiah chuan Arsenal chu dinhmun tha zawk ah an ding ve ta, Tottenham Fans lam te erawh an tlawmngai ngang mai, Tottenham Defender tha, a hun laia England Defender tha ber pawl a an ngaih SOL CAMPBELL an BARCELONA leh inter milan sawmna hnawl a an hmelma lian ber Arsenal an zawm leh chiah phei chuan an Club pahnih inkar dinhmun hi a tichhe leh zual sawt a ni.
2) Manchester United VS Leeds United : An ni hi England Hmar lama in hnaih te a awm an ni, anni pahnih inkhel boruak sang zet mai hi a hmingah “THE ROSES RIVALRY” tiin an sawi thin, Derby boruak rau rau ah pawh hemi te pahnih inhuatna leh inhmelmakna a ril bik emaw tih mai tur a ni, hmanlaia ram bial (County) pahnih, LANCASHIRE leh YORKSHIRE ten chak zawk nih inchuh a “WARS OF THE ROSES” indona an neih atanga boruak kal zelin a hrinchhuah niin, tun thlengin he ram bial pahnih hi khelmual chhungah chuan Ui leh Kel thlun pawlh ang mai an la nih hi, 1970’s chho ah khan British Football-ah HOOLOGANISM (Fans buaina siam ching) ho an che nasa hle mai a, hei hi a chhan ber chu LEEDS UNITED tan tu “SERVICE CREW” te leh Manchester Utd. tan tu “RED ARMY” te in epna vang a ni, hetihlai hi chuan OLD TRAFFORD (Man Utd. khelmual) leh ELLAND ROAD (Leeds Utd. khelmual) chu hremhmun a ni ringawt.
3) Everton VS Liverpool : Liverpool khaw Club pahnih EVERTON leh LIVERPOOL te inkhel hi “MERSEYSIDE DERBY” tiin an sawi thin, Merseyside Derby hi local Derby zingah chuan a hmingthang ber pawl a ni a, khawvel a Derby Match dang te ang lo takin chhulkhat chhuak Club pahnih inkhel anih avangin he inkhel hi “FRIENDLY” Derby ti te pawhin an sawi thin. Kum 1878 ah khan Liverpool khawpuiah ANFIELD khelmuala inkulh Club lian zet mai pakhat a awm a, chu Club chu Everton a ni.. Mahse, kum khat chauh a ding hman tihin Kum 1879 ah chuan Club thuneitu te zingah khelmual sawn chungchanga ngaihdan in an lohna leh innghirnghona a lo chhuak a, hmun hnih ah an inthen ta phawk mai a, a tam zawk khelmual sawn duhtu te chuan ANFIELD chhuahsan in GOODISON PARK ah awmhmun an khuar ta a, an Club hming EVERTON tih pawh an pu zui ta a, ANFIELD-a awm te chuan Club hrang anga in relbawlin an hmingah pawh “LIVERPOOL FC” tih an invuah ta a, hemi hnu atang hian vawiin thlengin a tha zawk nih tumin an in ep zui ta reng anih hi...Khai aw...duh aiin a sei dawnin a tam dawn tlat, hemi chinah hian rek bung phawt ila hun remcahng dang te kan la nei leh anih chuan LA LIGA EL CLASSICO chanchin te, khawvel fans te leh Football Critic Writer te beng chhitna leh mit fukna ni kumhlun SERIE-A Derby Match te pawh kan la rawn ziak leh ang chu dam te a kan awm chuan. A then chuan ho kan ti viau a ni mai thei a, mahse, Football derby match ril zia leh pui thin zia chu, kan Veng YMA DAY Section Football match a boruak san ve thin zia atang pawh hian a chik mite chuan kan hre thiam mai awm e.

INKAHNA
**  Neihdon Khawchhuak Tuithiang Venga awm rau rauah Pa Chhuanga hian Fapa Police 2 ngawt a neih avangin an khawchhuak te tan chuan ‘Parawn’ a ni lo thei lo. Tunlai hian amah hi a damsam lova, tuallai ah pawh a vang viau, mahse an Ina han lenchilh takah chuan ( Pa tuarchhel tih takah) ala kawmtlak viau thung!”      - Pu. Manthanga ( Neihdon Makpa )
** RMSA zar zovin Kolkota ah ka zuk zin ve a. Kalo tum lawk dan chuan an  C.M. ropui  thin  Joyti Basu-a te, an C.M. nilai Mamata Bannerje-i te ka zuk kawm ang chu ka ti a. Mahse a teuh lo lutuk! Hun chep tak karah Pi. Lalmani te, Pi. Zauvi te ho in an chhungte eitur Dawlrep leh Bekang rep min thawn ka zuk sem hi a ni ta ber! Khawdang ka hawi hman  lo! Ka rawn haw a, min la hau hrep zui lehnghal a!”                       -  Sir. Para
** Tuithiang Vengah hian mi pangngai angin min ngai a ni thei! Troy lamah chuan Pasaltha, Sa kap thei leh Ramvachal tak  anga sawi  hut hut ka ni e!”                                      -  Pu. LTA  of  Troy
**  “ ASEP leh Forest Deptt. ho khan in lo chhiar ve em? Ka kawmthlangpa LTA  hi rawn hling nghal rawh u!”
                                 -  Pu. Manghaka
** Kan Upa Ben-a, Thingtlang khaw te tak te a P/S Teacher nilai mek hi ka ngaihtuah angreng riau! Khitiang Khaw chengkera an P/S naupangte hnenah khiang ‘ Internet’  te,  ‘Face book’ tih lampang te hi alo han sawi duah mai lawng maw aw?  A  sawi tam poh leh an bo thui ting mai dawn bawk si a!”                                   - Pu. S. Sawma








           

26/2/2012

TUITHIANG  VENG   L/C   THLANNA  
NEIH   A  NI  TA
  ( Inthlanna  felfai taka neih a ni. Vote tla a tha hle)

Tuithiang Veng 26.2.2012 :  Tunkar Ningani 23.2.2012 khan Mizoram khaw hrang hranga V/C thlan a nih rualin Aizawl khawpui ah pawh L/C thlanna neih a ni a. Tuithiang Vengah pawh kan Local Council Member turte thlanna neih a ni a. Tun tuma kan Veng L/C thlanna ah hian Voters 928 laiin an Vote hlu tak an thlak a. Hei hi Voters awm te atanga za zela 80% aiin a sang hret a. Vote thi  20 lai la awmin, Vote nung chu 908 a ni.   Hetianga Veng mipui tena mahni veng hruaitu turte thlanna kan ngaihpawimawh tak  avang hian a lawmawm hle a. Inthlan lo la awm leh zel turah pawh khua leh tui tha kan nihna anga Inthlanna a vote thlak thin hi kan tih tur a ni tih hi i hre zel ang u.
L/C thlanna hi Zing Dar 7 ah tan niin, Vote thlak hmain Pu. Lalparliana Sailo(P.O) in Inthlanna felfai tak kan neih theihnan tawngtaiin hun a hmang a. Chumi zawhah chuan Vote thlak tan a ni a. Pu. F.H. Hranghnuna’n Vote thlak hmasa berin inthlanna hi neih chhunzawm a ni ta a. Tlai Dar 4 ah, Vote 927 thlak a nih hnuin Pu. R. Vanlalnghaka’n ( Pu. Manghaka’n) a hnu hi  kharin, Vote tla zawng zawng chu 928 a ni ta a ni. Tlai Dar 5:30 vel atangin Vote chhiar tan a ni a, boruak muanawm tak hnuaiah Zan Dar 8:30 velah chhiar zawh a ni a. R.O. Pu. F. Vanlalruata’n Result puangin, thlan tlin takte hnenah Certificate a hlan nghal a ni.
Kum 2012 February 23 a Tuithiang Veng Mipui tena Kum 3 chhunga kan veng aiawha hruaitu tura kan thlan takte chu heng mite hi an ni -      
HMING                        PARTY                    VOTE
1. Pu. R. Lalthlamuana      MNF 542
2. Pu. Khawlremthanga      MNF 378
3. Pu. K. Vanlalruala          INC 362
4. Pu. Zalenthanga              INC 360
5. Pi. Baby Lalrammmawii  INC            335
Nimin zingkar khan Sitting hmasa ber Pu. C.Challiana Inah neih nghal a ni a. Hetiang hian an chanvo turte an inruat -    
Chairman -  Pi. Baby Lalrammawii
Secretary -  Pu. Zalenthanga
Ward  Committee -  Pu. K. Vanlalruala  &  Pu. Zalenthanga
Member -  Pu. R. Lalthlamuana  &  Pu. Khawlremthanga

LAWRKHAWM

** Tuithiang Veng MPF chuan Inthlanna felfai tak kan neih avang avang leh Vote thlak kan tam avangin Veng mipuite chungah lawmthu an sawi e.
** Zirtawp zan a Aizawl New Market kangah khan Pi. Sanghnuni te dawr pawh a kang a, Ar 230 a kang ral vek a, Ar 23 a chuh hman niin kan lo hria.  Kan lainat hle. Pathian malsawmna an dawn chhoh zel theihnan duhsakna kan hlan.
** Venglai Middle School bul Tuikhur chhak zawk hi Tuithiang veng Branch YMA siam a ni a, pipe phal loh a ni. Zan ah Pipe thin an awm tih hriat a ni a, khawngaih taka sim turin hriattir leh ngen in ni e. Branch YMA thu zawm lova, pipe an awm chuan an chungah engpawh thleng se an sawi buai thei lovang.
** Tunlai hian kan Vengchhungah rukruk a hluar viau a, mitin te kan fimkhur a ngai. Pu. Romeo Lalnuntluanga te Gas Bur 2 a bo a,  Pi. Thansiami te Chokut a bo bakah bo dang neuh neuh a awm nual.
** Pi. Lianbuangi (Pi. Buangte-i) chu Aizawl Civil Hospital a zai a nih hnuah nimin khan that lam panin a rawn chhuak. Tin, a tupa Abraham Lalhmangaihhlua (Kan Editor fapa) pawh Aizawl Civil Hospt. ah hian awmin, nimin khan a rawn chhuak ve niin kan lo hria.
**   Pastor Lalrammawia te chhungkua chu hun engemaw chen thanga an rawn zin hnuin Nimin zing khan Kelkang lamah an haw chho leh ta.
** Pu V.L. Zuala te pawh Lungphun hmanga Hliappui lama an zin hnuin tunkar tir lam khan an rawn haw leh ta.
** Pu. Lalrinzuala te nupa chu Zirtawpni khan Inneih hmangin Lunglei lamah an zin a, nimin tlai khan an rawn haw leh ta.
** Lalduhawmi d/o Lalthianghlima leh Lalrinhlui d/o K. Vanlalnema te chu tunlai hian biangboh avangin In lamah enkawl mek an ni.
** Isak Vanlalruatfela s/o Esther Lalthathangi chu hun engemaw chen Pneumonia natna avangin Durtlang Hospital-ah a awm hnuin tunkar khan thatlam panin a rawn chhuak.


TUALCHHUNG  SPORT NEWS
@@@   Isak Lalnunpuia s/o Lalkrostana chu Aizawl Dist. High School games TT single final thlengin, 2-na a ni a. Thla leh a Mizoram School Games lo awm turah Aizawl Dist. aiawhin a tel dawn a, tin, heng mi pathum Isak Lalnunpuia, Ronny Lalchhuanawma leh Laltluangliana (Chhinga Veng) ten thla leh a Mizoram Inter District T.T. Tournament ah kan Veng ai an awh dawn a, heng mi pathum te hi kan Veng in a State referre kan neih hmasak ber Tv Zonuna’n a a hrual mek a ni.
@@@   MSAC  Red Ribbon Football Tournament 2012   First Round-ah March 6 Chhun Dar 12-ah Tuithiang Veng Local Council Football Team te chuan  Hmunnghak V/C team te chu   Ramhlun Sports Complex-ah an hmachhawn dawn ta. Kan Veng  Team te inkhel hi a tam thei ang berin tawiawm i tum ang u.
@@@ Tunkar thawhtanni Feb. 20 khan Khuangchera Section huaihawtin Hall Kawtah Thlawhbawk Football Tournament khelh a ni.  
@@@ 2nd Mizoram pro Arm Muaythai Championship neih zawh takah khan kan veng atangin medal la kan awm nual a, kan lmawpuiin kan chhuang tak zet a ni. Chungte chu:
1) Jerry Lalduhzuala s/o R.K. Ramchhanzela (Gold)
2) Lalnunhlima s/o lalbiaknia (Silver)
3) Roduhawma s/o J.H. Lalngaihawma (Bronze)
4) Isak Malsawmsanga s/o Lalrampanliana (Bronze)

MEMBERPUITE CHANCHIN

** Pu. S. Lalmalsawma kan Branch Committee member chu  tunkar khan a hnathawhna hmun Lunglei atangin Vote thlak turin a rawn haw a, naktuk lam khian a kal leh dawn niin kan lo hria.
** Tv. Lalrinsanga kan Joint Editor chu tulai hian pum lam natna avangin In lamah a in enkawl mek, a lo thatchhuah leh thuai kan beisei.
** Tv. Lalnilawma s/o S.H. Lalropuia chu tunkar khan a lehkha zirna hmun Mamit lamah a liam thla leh ta.
** Nl. K. Lalrinpuii (Note-i) chu nimin Inrinni khan hna pawimawh avangin Kolkata lamah a kal a, thal khat chhung vel a cham dawn niin kan lo hria.
**  Tv. K. Lalrammawia (V. Sec) chu a hnathawhna hmun Sihhmui lamah zirtawpni khan a liam thla leh ta.
** Nl. Lalrofeli (RFI) pawh zirtawpni khan a hnathawhna Mamit lam panin a chhuk thla leh ta.

ARTICLE

DUH TAK....!!!!

-DMA

Duhtak, tun lai thangthar nunzia hi i ngaihtuah ve ngai em? kan vanglai nen a danglam dan em em hi. Khawvel hi a vir chak lu deuh i ti ve lo maw? Kan inhmangaihna a kuhmum tan laite kha i la hre ve reng thin em? Kei chuan ka theihnghilh thei lo va; ka hre chhuak fo dawn a nih hi. “Damchhungin, ni lo, chatuanin ka hmangaih reng ang che,” tia phun ru sep sep chunga ka tângah lungawi taka i bei laite kha hmanni lawk ni mai hian ka hria a. Mahse, en teh, khang i thusawite kha tun lai mite hi chuan hria se an awi (h) pawhin ka ring lo. Chuti em emin hmangaihna hi a tlo theih an ring lo pawh a ni mahna. Duhtak, kei chuan ka ring che a; hmangaihna hi a paitu azirin chatuan daih a ni tih ka hre si a.
I mitmeng nalh takah khan hmangaihna dik tak ka hmu a, i nui mawi takahte khan lungawina ka chhar thin a, i heh no cheka ka fawhte khan chhungrilah hlimna neiin khawvel hi a mawi zualin ka hre thin kha a ni a. Duh tak, tun lai mite chuan e, saruak lo chuan hmangaihna an inhmuhsak thei lo va; sumkâr nei miah lova inpumpeknaah lo chuan lungawina an hmu zo lova; chhungrila hlimna neih tum lovin khawlaiahte hlimna an zawng nia maw le! Mak i ti ve em? Lungngaihna leh inchhirna bâk an chhar chhuah ka ring lo kei chu.
Duhtak, kan inhmangaihna min hriatpuitu ni hiala kan ngaih, lung tileng zual thin chhun ni sa vawl vawl hnuaia Ngirtling lo kiu ral ral te, thlifim thaw heuh heuh dawn paha nungcha hlim thawm kan ngaihthlak te, fur khaw thiang taka tlai ni tla tur no nghelh te, romei zam chiaite hian an nunah thu a sawi ve lo va, romeo zam paw chiaite hian lung a tizîng an ti zawk nia. Kan pahnih chauha khawvel awm chhunga sût leh tawh loh tura rinawmna thu kan tiam min hriatpuitu thla engte hian an lung a tileng ve lo va, a ên leh ên loh pawh an hre ngai mang lo a nih hi. Duhtak, tun lai mite hi chuan siamtu thil siam hlutna hi an pawh pha lova, an inngaihlu hle ringawt mai a nih hi ti raw. Chhak lam unaute lem chana an inhmangaihnate hian an lung a lenin an hnuk a tiulh a. A thu awmzia pawh an hriat kim hleih loh tuipui ral hla thlûk nei mang lo hmangin an inawi tlei a. Thikthute hi an thih chilh leh ang lawi a. Hringnun inher danglam dan hi LAL remruat a nih pawh ka ringhlel rum rum e..!!
Duhtak keini chuan hmangaihna hi a nihna ang takin rinawm takin kan vuan mai thin kha a ni a. Tun lai mite hi han en ve mah teh, hmangaihna hi inkhualtelem nan an hmang a, mipa leh hmeichhe inngainat tawnna hi siamtu thil siam hlu tak a ni tih hriaa zahawm taka kan vawn khiu khiau thin kha, inlêm der nante hmangin hlutna chang pawh an hre ta lo. Inngaihzawnna hi hmangaihna bul tan nan chuan an hmang ve ngei a; mahse, hmangaihna chu inneihnaah an tawptir a, inngainatna hi sex-ah chauh emaw a awm  an ti nia. Duhtak, inneihna hi hmangaihna kawng chhuk chho zawh tanna bul a ni tih tun lai mite hi hrilh i châk ve em? Pathianin chhungkaw din nana a ruat nupa chauhin a ruk têa an roh em emte pawh, khaw engah ataka tih mai pawh duh tawk lovin an thlate an la la zui a. Khaw eng leh zan thim hi siamtu duh dan kalhin inang rengin an hmang sual hreh miah lo a nih chu. Duhtak, keinin nitin hi inhmangaihna niah kan hmang thin kha a ni a. Tun laiah chuan maw, ni bîkte an siam a, hmangaihna chu party leh present tel lo chuan famkim lovin an hria a; induh tawnna hi sex  tel lo chuan nghet lovah zu ngai tlat hlawm a. Keini ang mi hlui tan chuan tun lai mite tun lai dan hi hriat thiam a har ta a nih hi ti raw ..!
Duhtak, hriat thiam har ka tih leh zual chu maw, an hmangaihna hian hausa leh rethei a hmu fiah em em zel a. Khawl lirtheite hian an hmangaihna hi a phur sawn thei a ni awm e. Kei chu hmangaihna an sawngbawl dan hi ka lainat. Duhtak, keini chuan thlantui far hi taima chhinchhiahna tiin kan chhuang thin kha a ni a. Tun laiah chuan thlantui nei chu an thinhrik deuh tlat a, bahra khura inhmangaih zel theihna hi hmangaihna mitdel tiin an hmusit tlat tawh. Kan inngaihsaknate kha mitmeiin kan lantir ngam hram hram chauh thin kha a ni a. Tun laiah chuan e, nute Top up thunsak  hmang ral vek khawpin an induhna an pho lang ngam nia, zu inthlahrung chuang miah hlawm lova !
Duhtak, engkim hi a danglam zo ni berin kei chu ka hria. A kum a kum inzui a, vawi tam kan rel hnuah inneih kan puitlin chauh a. Thihna vang chauh lo chuan inthen thiangah pawh kan ruat ngai lo va. Tun laiah chuan maw, vawkte kan man dawna kan inngaihtuah tluk pawhin an innei tur hi an inngaihtuah nawn ngai lova, inthente hi nau hnap lak ai pawhin an hreh lo zu nia. Thihna avanga fahrah an awmte khan pawi kan ti a, a tuar lo tute pawhin tuarpuiin hrehawm kan lo ti ve thin a ni ngai a. Tunah chuan e, an nawmchen duhna vanga fahrah pung ai chuan sazu puang pawh an pawisa zawk a nih chu...Duhtak, rapthlak i ti ve em? Thahnemngaih avangin kohhran leh khawtlangah theih tawp chhuahin kan buai ve thin kha a ni ngai a. Tun lai mite chu e, an  kawppuite  tel ve lohnaah chuan kohhran meuh pawh hi an hlamchhiah hmak duh asin; serh leh sang pawh nei lovin an inlêm a, pawisak pawh nei lova an khawsak hnuah inthlahrunna leh inthiam lohna nei hauh lovin kohhranah inneihna thuthlung an la a, an awmkhawlohna zawng zawng chu Pathianin ngaidam vek turin an ngai tawp mai a. Inneihna thuthlung hi sual khuh mawi nan leh sual tlenfai nan an hmang a nih chu. Duhtak, sual silfai dan dik takte thleng hian hrilhfiah i châk ve thin em ?
Duhtak, tunge ka nih a, enge ka nih pawh sawi tur awm lova mihring tling lo, hmeichhe hrin ka nih vang chauha ‘Mi’ ni ve hi, hmangaihna chauh ka lakah beisei tur i neih lai pawha min hmangaihna ang hmangaihna dik kha tun lai mite hian an pianpui ve lo a niang. I lo ngilneiin ka tan hian i va hlu tak em ! Duhtak, englai pawhin, khawi hmunah pawh keini chu inhmangaih ila, Valentines Day-ah chauh lo pawh kan inhmangaihna hi lantir thin ila, khum laizawlah chauh lo pawh inthlahlel ila, kan vun chuar ruala kan inhmangaihna a vuai loh nan hmangaihna awmzia hi hre fiah ila, kan inneih thuthlung hi pialralah pawh vawng zel ang aw ...DUHTAK.

9/2/2012

NINGANI  (FEB. 23)  AH  L/C  THLANNA  

NEIH  A  NI  DAWN  TA.

( Zing Dar 7 atanga tlai Dar 4 chhungin Vote thlak tur a ni )

Tuithiang Veng 19.2.2012 :  Mizoram khaw hrang hrang 509  a V/C tur leh Aizawl Veng hrang hrang 82 a Local Council thlan rualin February 23, 2012 ( Ningani) hian Tuithiang Vengah pawh Local Council member tur thlanna neih a ni dawn a. Tun tumah hian L/C member 5 thlanchhuah tur niin  Party 4 leh Independent Candiadate te atangin Candidate 16  Tuithiang Veng chuan kan nei  a ni.
Vote thlak hi Zing Dar 7 atanga tanin, tlai Dar 4 ah khar a ni dawn a. Inthlanna hmun tur chu Tuithiang Veng Middle School ah a ni ang. Voters zawng zawngte vote thlak vek turin Tuithiang Veng MPF chuan an ngen a. Tin, hetih rual hian Candidate te atanga therhlo ilo vel ngiat lo turin Vote nei thei chin zawng zawngte pawh ngen an ni bawk. Candidate te pawh Tuithiang Veng MPF Local Forum te ngenna anga thianghlim taka vote zawng tura ngen an ni bawk.
He Inthlanna atan hian Aizawl  Deputy Commissioner chuan inthlan puipa turin heng mite hi a rawn ruat -
Returning Officer : Pu. F. Vanlalruata  ( Teacher Aizawl East H/S )
Presiding Officer  : Pu. Thuamruatkima ( Teacher Tuithiang Veng M/S)
Polling Officer      :
1)  Pu. Lalparliana Sailo  (Teacher, Govt. Hrangchhunga H/S)
2)  Pu. C. Lalsangzuala   (Teacher, Govt. H/S Falkawn)
3)  Pu. Joseph Vanlalhruaia Sailo (Lecturer, Synod HSS)
Inthlan zawh ah hian vote chhiar nghal mai tura inbuatsaih a ni dawn a. Tlai Dar 4 a Vote thlak theih hun a tawp veleh ziahfel tur ang angte ziahfel nghal niin, chumi zawhah chuan Vote hi chhiar a, a result pawh Mike hmanga mipuite hriata puanzar nghal zel tum a ni bawk. Vote chhiar tur hian Counting Agent mi engemawzat R.O. hian ruatin, Vote chhiar hunah hian an hna an thawk dawn a ni.
Tun tum kan L/C thlanna turah hian Tuithiang Veng bikah Voters 1152 kan awm dawn a. Vote tla zawng zawng hi Polling Party te hian Zan Dar 9 hma a chiiar zawh a, tihfel hman vek an tum dawn a ni.  

LAWRKHAWM

** Tuithiang Veng MPF te buatsaihin tunkar thawlehni Zan 14.2.12 khan Tuithiang Veng Hall ah L/C thlanna tura Candidate te tan Joint Platform buatsaih a ni. Hemi Zan hian Candidate te hian minute 3 theuh thusawina hun an nei a. Kalkhawmte hi Pu. R. Zaitawna ( Senior Vice Chairman, Local MPF) in  a kaihruai a ni.
** Tuithiang veng MPF te chuan tunkar kalta zirtawpni Zan khan Tuithiang veng Hall ah tuna Local Council inthlan tura Candidate te Campaign ‘house to house’ an neih thin chu tih tawh lo turin a rel a, hei hi Candidate te leh mipuiten ngaihpawimawh theuh tur a ni ang.
** Tuithiang Veng MHIP ten Anganwadi Center I hnuai laih hnatlang an tih kha leivung paihna remchang a awm loh avangin thul leh a ni a, member te an inhriattir a ni e.
** Pu Lalchhunga chu tunlai hian damlohna chi hrang hrang avangin Durtlang Hospital-ah enkawl mek a ni.
** Pu.Vanlalsiama Kawlni chu a thisena Cholesterol tam avangin tunlai hian an In lamah a inenkawl mek a. Doctor rawn angin phai lamah kal thuai a tum niin kan lo hria. A dam leh thuai theihnan duhsakna kan hlan e.
** Pu. TBC  Laihmingthanga pawh a tluksual avangin Durtlang Hospital ah a awm mek.
** Pi. Biaknghilhlovi chu BP sang avangin a damlo a. An In lamah enkawl mek ala ni a, a that chhuah leh thuai kan duhsak.
** Pi Salchhingi m/o Pi Regina Lalmawii chu hun engemaw chen Care Hospital-a a awm hnuin tunkar khan thatlam panin a rawn chhuak.
** Pi Vanneihthangi chu tunkar kalta khan bairabi ah neih hmangin a zin.
** Emmanuel Vanlalhruaia s/o Lalhmingmawia  Sailo chu tunhnai a Mizoram, Mathematics Competition a Primary Section-ah  Top Ten ah a tling a, hetiang mi Vengchhungin kan nei hi kan chhuang hle.


JUBILLEE SOUVENIR & DOCUMENTATION & LUNGPHUN COMMITTEE NEIH A NI.
Nakum a Jubillee kan lawmna tur atana Jubillee Souviener & Documentary & Lungphun sub-Committee te chuan tunkar ningani khan Pu Zolianlunga te In ah Committee vawi khatna an nei a, hetah hian hmalak dan tur tam tak an rel. Ahnuaia mite hi hruaitute an ni.
Chairman :  Pu Zolianlunga
Secretary :  Pu Vanlalthlana
Treasurer :  Pu Joseph Vanlalhruaia Sailo
Committee members:
Pu Vanlalhrila
Pu Hmangaihrammawia
Pi Lalnuntluangi (Nute-i)

MEMBERPUITE CHANCHIN

** Pu. Lalrinzuala, kan branch Fin. Secretary chu Indo-Bangla border survey a neih zawh hnuin zirtawpni  khan hna tul avangin Kolkatta lamah a liam thla leh ta.
**  Nl Lalrofeli kan Chanchinbu News Editor chu a hnathawhna hmun Mamit atangin tunkar khan a rawn haw. Nl Rofeli hi kan chanchinbu lama tangkai tak a ni.
** Tv. V.L. Biaknunga (Biaktea) Branch Committee member chu tunkar khan Hliappui ah a zin.
** Tv. C. Vanlalawmpuia chu hun engemaw chen Jaipur-a inkhela a thang hnuin tunkar khan Vengchhung a lo lut leh ta.
** Nl. Lalnunmawii chu hun engemaw chen a u te awmna Kelkang-a a zin hnuin tunkar khan a rawn haw leh ta.
**  Nl Lalawmpuii (Tete-i) d/o Pu Zolianlunga chu hun engemaw chen Megalaya ah Field Trip-a a kal chu, tunkar khan damtakin a rawn haw.
** Pu Romeo Lalnuntluanga chu tunkar khan Katmandu-ah dawr thawmhnaw la in a zin.
** Kan Veng Hall saklai enkawl mektu Pu. R. Mankima,  Pu. R. Lalthlamuana leh Pu. K. Vanlalruala te chuan AMC atanga kan pawisa hmuh Cheng nuai 1 kan lakchhuah thuai theihna turin tunkar khan hma an la a. Pawisa hi avaia lakchhuah thuai an tum a ni. Pawisa lakchhuah a nih hunah chuan a Chhung Gallery chanve leh  Hall kawt Gallery te la rem theih hram an tum bawk.
**  TYMA Sport Sub-Commtt. te chu tunlai hian Red Ribbon leh Central YMA Football Tournament lo awm tur atan an inpuahchah mek a. Kan Venga Football khel thiam tak tak ten Zing leh tlaiah Practice an nei thin a, hruaituten hming an lam ziah bawk a ni. He Mizoram pum huap Football Tournament lo awm turah hian a ti tak tak peihte tan chauh hmun a awm a ni.


INKAHNA

** “ Rohminga In han sak thiam loh em em zia mai chuh... a chhuat lai ah tlakhawlh zu han siam thluah  a mawle! A In ban te lah chu chawn tiat lek lek....!”                              - Lal-Pu- Zawm- Luvar-a
** “ Zawngtah ah pawh a mu puam lian tha tha hi tunlai chu  kan duh zual! Chutiang ang kawm 30 tal min pe thei chinte chu kan Chhungkua hian kan vote vek a ni mai!”                                                                     -                                                                                                      Pi. LucyZuilian(StCatholic)
**  “Tun tum kan L/C inthlang tur chu a ding thei tek tek chu kan ding fai vek a ni ber mai lawm ni?”                                                                             - . Pu. Rokamlova
** “ L/C inthlan Campaign-na ah hian Vengchhak aiawh, Venglai aiawh, Vengthlang aiawh tih angreng  boruak hi in tih len chhoh viau chuan inthlan leh-ah chuan Zawngtah Kung nei aiawh, Ui Vulh aiawh, Nuthlawi  nei aiawh, etc...zawngin boruak a kal zel lovang tih hi tunge sawi thei?”                                      
                                                                        - Pu. Chhuanga  Tuithiang Veng. (Politician)

ARTICLE

TUITHIANG  VENG  V/C  THLANNA   ZUNZAM  !

                                                                        - U. Sanga

Tuithiang Veng  inti lova Tuithiang Presbyterian Kohhran inti tate, Branch YMA Tuithiang Veng inti lui hram hram tutute hian kan Kohhran/ Pawl Record hi kan  vawng tha thawkhat a. MUP lam hi ka hre tam lova, MHIP lam pawh hian tan an la thar viau tih nikum lam atang khan kalo hria a. Chutih lai karah chuan kan V/C (L/C nita) te pawh hian an record hi an vawng tha viau turah ka ngai tawp! Kum a vei tam tial tial anga, ala pawimawh zual zel dawn si a! Ziah duah a chakawm a, mahse kan chanchinbu a te si a.... Kan V/C thlan hmasak tum 2 kha lunglen thawihdamnan i han thlirlet teh ang u! Keima chhinchhiah bakah Pu. R. Dothanga Diary te, Pu. C. Chawnghnuna Diary te tan chhanin he Tuithiang Veng V/C History hi rawn tarlan a ni bawk e.
TUITHIANG  VENG  V/C  LO   PIAN  DAN  KHA!
 (Kil  khat  atanga  thlirna)
V/C hranga kan awm tan dan kha kil hrang hrang atangin a thlir theih anga. Kil khat atangin ka han thlir kir dawn a ni a. Sawi ve  tur nei te inthlahrun a ngai leu. Chung mite ka  cho chhuahna pawh a ni mai ang chu.
Tuithiang Veng hi  Saron Veng atanga Kohhran anga Kum 1986 a kan indan tak hnu Kum 1987 Kumtawp lam khan V/C hran nei turin Sorkar-in min phalsak ve ta a.  V/C hran kan neih nan khan Pu. Thahluana te, Pu. Zahmingthanga te, Pu. C.Kapchawla te, Pu. C. Chawnghnuna te, Pi. Lalhmingliani Pautu te kha an inrawlh thukin, hma kha an la nasa tih ka hriatpui a. Sorkar lai MNF mi leh sa Pi. Lalhmingliani Pautu khan a thawhhlawk takzet a ni tih tun thleng hian kala hriatpui bawk. . A chhan chu Nu Hmingi leh khatih laia Rulung MNF Gen. Secretary Pu. H. Vanlalauva te kha an inkungkaih that thin em vang a ni.
V/C hran neih tuma  an han beih  fe hnuah khan amah  Pu. H. Vanlalauva khan phut lian tak kha a rawn nei ta mauh mai a. Chu a thil phut chu hei hi  a ni - “ V/C hran neih in duh tak tak a nih chuan Pu. Thahluana te, Pu. C.Kapchawla te ho hian MNF Party rawn zawm ve se. Chutianga an tih theih dawn phawt chuan V/C chu kan pe em em ang che u”. a ti ta tlat mai a!  Chu chu Nu Hmingi chuan Kapa te ho kha a rawn hrilh ta a. Khatih laia mahni tawka PC Party tana theihtawp lo chhuah mektu te tan kha chuan a Luhaithlak takzet a. Vawi tam an inhmukhawm a, an sawiho a, harsa kha an ti tlang hle a. (An inhmuhkhawmna  kha kan In kha a ni deuh ber thin a. An titi leh an sawihona kha khum atang khan kalo ngaithla thin a. Kha hun harsa tak avang khan an ngaihtuahna kha  a buai thei thin hle tih kala hre reng).
Chutianga Zan tam tak an sawiho hnuah chuan, “ Enge mawle, Veng anga indan hi kan duh ber a ni lawm ni? V/C hranga kan awm theihna tur a nih dawn phawt chuan MNF ah chuan i inpe mai ang u hmiang! Tuithiang Veng hi thil dang zawng aia kan dah hmasak ber tur chu a ni lawm ni?” an ti tlang thei ta a. MNF Party-ah chuan an inpe ta tliar tliar a.  V/C pawh chu kan nei ta a. Mahse, V/C kan neih fel  hnu lawkah chuan PC ah bawk chuan an kir leh ta deuh vek a. Pu. Thahluana ngei pawh kha MNF anga awm chhoin, V/C kha a ni cho ta na a; a rilru chhungril tak chu ( a thihni thleng khan) a PC tih ka hre chiang! Brig. Thenphunga Sailo leh  a Policy zuna uai kha  alo na takzet a ni awm e.
V/C hrang nei  ve dawn ta chuan Mizoram khua leh Veng dangte rualin Nov. 5.1987 (Ningani) khan kan V/C hmasa ber turte chu kan han thlang ve ta a.Voters  Mi 300 chuang awrh chauh awmna Vengah khan P/S ah inthlanna kha neih a ni a. Khami tuma kan thlantlin takte chu -
1. Pu. Thahluana (MNF)         - Vote hmuh zat - 181   ( Vote thi 6)
2. Pu. Bawiliana  (MNF)         - Vote hmuh zat  - 147   (  Vote thi 2)
3. Pu. Siamphunga (INC)       - Vote hmuh zat  -  154  ( Vote thi awmlo)
Tuithiang Veng V/C hmasa berte chuan 28.11.1987 (Inrinni) khan thukhawmin, V/C ruangam tur chu hetiang hian an duang ta a -
President - Pu. Thahluana
Vice President - Pu. Bawiliana
Secretary - Pu. C. Chawnghnuna
Member  te -    1. Pu. Siamphunga    2. Pu. R.Thangpuia (Ruat Seat)  
     3. Pu. Lalengliana  (Ruat Seat)
V/C  TERM  2-NA  KHA
Ni 29.10.1990 (Thawhtanni) ah a tum 2-na atan Tuithiang Veng V/C thlanna Tuithiang Veng P/S ah neih leh a ni a. Khami tum khan Veng pumah Voters 740 awmin, vote tla zawng zawng chu 388 a ni. MNF Candidate 3 leh INC Candidate 1 an tling.
THLAN TLINTE -  
1. Pu.  Bawiliana (MNF)   - VCP Ni Zui ta.   - Vote hmuh zat  - 188   (Vote thi 5)
2. Pu. Thahluana (MNF)            - Vote hmuh zat  - 185   (Vote thi 1)
3. Pi.  Hauziki    (MNF)            - Vote hmuh zat  - 175   (Vote thi 7)
4. Pu. Lalbiakzauva  (INC)            - Vote hmuh zat  - 165   (Vote thi 2)
Secretary atan Pu. Lalkhuma ruat a ni.
TLANGKAWMNA :  Aizawl-a  kan awm avangin   L/C thlanna  nei chho zel dawn a. Kan L/C la nichho zel turte hian, Veng tan in rawn penchhuak ta sa sa, kan veng hi vei tlut rawh u.  Nitina in khawsakna Veng  vei hi in mawhphurhna a ni bawk.  A fawng vuantu in nih chhung hian muthilhsan ngai suh u. L/C  member  ni  si a veng mipuite fak  in hlawh loh chuan nakin lawkah in hun hi a lola ral  anga; mipuiten in chanchin hi kan la rawn sawi zui luai luai dawn a nia. Chutiang ang khawp chuan he Veng mipuite thikthu hi a chhe  tawh e. Tun tuma kan Candiadate 16 zinga kan  thlanchhuah  tur mi 5 te pawh hian lo hre reng rawh u. In theihtawp in chhuah chuan mipuite hian kan thlawp tlat ang che u. He Veng hi vei ula, in mawng tizang ula.Dan leh duh zam thain, kengkawh tha bawk rawh u. Kan thalai thiamna sang zel ho hian Kum 10/ 20 hnuah an la rawn chhui letin, an la rawn zir let leh dawn che u. Chu hun chu ala thleng tak tak ang. Chutih huna in tu leh fate an la hawisana, nangmahni hming an la rawn chhuan na (In tlin atang hian) Veng tan theihtawpin hma la rawh u. In tihthat chuan inthlan lehah pawh ding ula, Campaign teh vak in ngai lovang. Kan thlang leh ngei ngei ang che u. In la thawh theih dawn phawt chuan.



JUBILLEE FUND RISING COMMITTEE RUAT FEL.
Tuithiang Veng Branch YMA Silver jubillee Fund Rising Committee te chuan heng a hnuai mite hi Executive Committee memeber atan a a ruat a, Dt 9.3.2012 hian Committee neih tur a ni ang.
1) Pu R. Rohmingthanga 2) Pu Bawihliana
3) Pu Lalzekhuma 4) Pi Lalhmingliani Pautu
5) Pu V. Zamliana 6) Pu Malsawma Khiangte
7) Pu Lalparliana Sailo 8) Pu C. Vanlalliana
9) Pu Lalhmingmawia Sailo 10) Pu Vanlalhrila
sd/-
(ZONGENSANGA)
Secretary

5/2/2012

TUITHIANG  VENG  LOCAL  COUNCIL  ELECTION,  2012 CANDIDATE  TURTE  RUAT FEL  AN  NI  TA.

Tuithiang Veng 5.2.2012 :  Local Council Thlanna February 23, 2012 a neih tur atan Tuithiang Venga Political Party hrang hrangte chuan an Candidate turte an ruat fel ta a. Tunkar Nilaini Feb. 1, 2012 khan inthlanna a chuhtu tur ten Returning Officer thar Pu. F.Vanlalruata hnenah Nomination an File nghal a. Zirtawpni khan inhnukdawk leh turte tana hun pek a nih leh hnuin, he inthlanna a ding turte chu heng mite hi an ni ta a ni -
CONGRESS     MNF & ZNP MPC & IND.
Pu.K. Vanlalruala  Pu.R.Lalthlamuana (MNF)   Pu. Roliana (MPC)
Pu. Thanglianzau  Pu. Khawlremthanga (MNF) Pu. Lalhmingchawia
Pi. Baby Lalrammawi           Pu. Vanlalruata (MNF) Pu. Lalduhzuala
Pu. Malsawma  Khiangte  Pu. Lalchhanhima (ZNP)                 Pu. Vanlalsanga
Pu. Zalenthanga  Pu. H.Lalzarliana (ZNP) Pu.C. Lalhmingliana
Pi. Vanlaldiki Heng mi tha tak tak, kan veng tana hnathawh kawr hak inhuama rawn penchhuak te atang hian mipui ten kan mi duh zawng kan thlang leh dawn a ni a. Kan thlanchhuah turte hi  atu ate pawh  mi tha leh duhawm tak tak vek an nih avangin; mimal tin ten midang rawn lova, kan veng tana thahnem ngai tura kan rin te thlang theuh ila. Campaign boruaka MPF duh dan lo anga che an awm lo tura beisei vek an ni a. Kan mit timim zawnga che an awma kan hriat chuan kan Veng Local MPF hruaitu te hnena thlen i hreh lovang u. Mahse MPF te hnena hek ngai hial ang hi he vengah hian an la awm ngai mang lo a. Tuntuma kan Local Council thlanna tur pawh hi thianghlim taka kan neih theih leh ngei i beisei tlang ang u.
Tarlan tawh angin Local Council thlanna hi tun thla Feb. 23, 2012 hian neih a ni dawn a. Tuithiang Veng chuan Govt. Middle School-ah zing dar 7 atanga tlai dar 4 chhunga Vote thlak leh tur a ni a. Vote thlak zawh hnuah he inthlanna  result hi chhiara, puan nghal a  ni leh dawn a ni. Tun tuma kan inthlanna neih turah hian Pu. F. Vanlalruata chu Returning Officer a ni dawn a. A hnuaia thawk tur Polling Officer te pawh ruat an ni tawh a, anni hi training pek an la ni leh dawn  a ni.

LAWRKHAWM

** Tunlai hian Kan Veng Hall Bang siamthat hna chu thawh mek zel a ni a. Work Superviser Pu. R. Mankima a damsam loh avangin a Assistant Pu. R. Lalthlamuana’n nitin hnathawkte hi a vil thin a ni. Naktuk hian Hall Bang bik chu rem zawh hman an inbeisei a, Hall kawt Gallery tunkar lo awm tur hian an an rem leh nghal ang.
** Tunlai hian vengchhak kawngpui ah motor kalna dal a, motor dah thin kan awm a, hei hian traffic a tih zam thin avangin motor hi dah tawh lo turin kan inhriattir a ni. Tin, Venglai Middle School kawtah motor leh insakna bungrua motor kalna dala dah thin kan awm a, ti tawh lo turin kan inhriattir bawk a ni e.
** Hall Bang siam mek a nih avangin tunkar kalta atang  khan Chhunah Venglai Tuikhur thlang zawk Pipe hmanga pawh thin a ni a. Hei hi tuma’n i thik lo ang u.
** Tunkar Thawhlehni Zan Feb. 7, 2012 khan TYMA Silver Jubilee Celebration Commtt. te chu Pu.H. Lianzama te Inah an Committee a.  TYMA Silver Jubilee lawmna atan Sub-Commtt. hrang hrang dinin, an hruaitu turte an ruat nghal a ni.
** Pu K. Vanlalruala te chuan tunhnai khan Alto K 10 an lei thar, kan lawmpui hle.
** Pi Lalhrangi m/o C. Chawnghnuna chu tunlai hian Thawhah natna avangin In lamah enkawl mek a ni.
** Pi Rengchhingi chu tunlai hian damlohna avangin In lamah a in enkawl mek.
** Pi Darzami chu chhungkaw  pawimawhna avanga Champhai lama a thang hnuin tunkar khan damtakin a rawn haw.
** Pi Lalruatkimi (Nute-i) w/o Lawmkima Sailo  chu damlohna avangin tunlai hian In lamah enkawl mek a ni.
THUZIAK LEH NGAIHDAN

CANDIDATE KAN NEI TA..!!
 - DMA

Party awn bik pawh nei lovin thlan itawm loh tak kan thlang tling nulh nulh ang tih hlaua ka lo thaw-ip-pik ve ringawt hi thahnem ngaihna kal sual chu a ni em lovang chu maw. MLA inthlanah pawh tha tih ber vote mai thin, Party-in a phuar ve loh mi zalen ka nih avangin ven thawn nei lovin ka sawi dawn.
Local Council thlan turah beisei aia tam Candidate kan nei thei hi Veng hmangaihtu kan tam vang leh khawtlang veitu kan tam vang a nih chuan a lawmawm a. Lansarh chak leh nihna neih duh vang te leh inlungrual lohna vang te anih hlauh erawh chuan a vanduaithlak khawp ang. Party tinte hian an Party thatna tur ngaihtuahin Candidate an siam lo thei lova. Independent a dingte hi thahnemngaihna dik thinglung thianghlim nei an ni thei a, an ni lo thei bawk, chu chu mipuite hian uluk taka kan thlitfim a ngai a. Lungsi taka thlan kim tur kan van hle a ni thei a, an intiattlang a, hnawl ber tur kan hre lo a ni thei bawk a, chuvang tak chuan thlan uluk a  ngai lehzual a ni.
Tling leh tha a inngai, nihna neih chak hi a tha pawl an ni ngai meuh lova, tling lova inngai, mipui nawlpui pawhin Vote lo tura inbeisei, tlin ngei duh ve si a pawisa hmanga tan khawh chiam mite hi an tha lo lehzual tih hriat a tha. Nupui ngam lo lutuk hi hruaitu atan an tha ngailo ang bawkin pasal ngam em em tute hi an itawm ngai bawk hek lova, Kohhrana tlaktlum tuma Kohhan puipate tlawn ching te hi mi dazat an ni a, hruaitu tlak  an ni ngai lo.
Mihring mihrinnaa that dan inangah Ruling mi leh sa an duhawm a, kan thlan thar turte term chhung hian Ruling an inthlak thei a, an inthlak  lo thei bawk. Chuvangin, Party thlir lovin mihring dik leh tha en a pawimawh hle. Mimal inbeih vak leh Party mal tihchhiat tuma tan lak chiam te, huam chin leh thliar bik neia hmalakte pawh awm thei a ni a, hruaitu puitling lo tur zia, inpumkhat lohna thlen thei a ni tih kan hriat a tha ang. Tin, pawl ah pawh Kohhranah pawh tihtauh ching mi hi thliarkar rilru tereuh te pu an ni duh viau.
Inthlan denchhena Candidate te thil dil hi ram hlui zia a ni a. Pawla ni emaw thian ho a ni emaw, infiammi te leh Kohhran pawh ni ila, inthlan dawn hnaia Candidate ten thil tihsak an tumin hnar ngam a tha. Kum nga chhung hruaitu tur thlan theihna vote hlu tak hi eng tiat leh eng zat man nge ni a kan hriat...??
Hruaitu chu mipuiin tha a kan ngaih, sum leh thil tihtheihna hman dik loh hmanga thlan tlin  ni lo. Party hruaitute thu thu a awm tur ni lova thawk ho thei tur. Dan leh thu pek keng kawh ngam. Development sum a tam emaw a tlem emaw a nihna tur taka hmang  tur mi. Eng hunah pawh Meeting pui tlak leh rawn theih tura lu hai nei lo. Pawisa leh Contract tenau hmanga thlem kawih theih loh. Khawtlang thatna tura hlauh nei lo. Dikna tana Pathian tih mi ni thei se. Mi famkim chu a awm theih lova. Amaherawhchu, tehna hrang hranga teh a, a tha tha thlang thei turin mipuite hian zalenna kan nei tih i theihnghilh lovang u.


KUMIN 2012 A TUITHIANG VENG LOCAL FORUM HRUAITU TE
President : Upa B. Laltanpuia Sailo
Vice President (Sr) : Pu R. Zaitawna
Vice President (Jr) : Pu Malsawmliana
Secretary : Upa CH Vanlalduha
Joint Secretary (Sr) : Pu V.L. Zuala Ralte
Joint Secretary (Jr) : Pu C. Lalsangzuala
Treasurer : Pi Ramliani
Fin. Secretary : Pi K. Vungi
Committee memberte :
1. Upa F.H. Hranghnuna 2. Upa Vanlalsiama
3. Pu R. Rohmingthanga 4. Pu T. Thuamchungnunga
5. Pu C. Kumthara 6. Pu Thanthiauva
7. Pi Zothanpari 8. Pi Vanlaldiki
9. Pu Thanchhuana
Tunkar hun remchang ah Committee neih an tum.
MEMBERPUITE CHANCHIN

** Pu. Lalthianghlima, Secretary TYMA leh Pu. Vansiama te chu Manipur atangin Utter Pradesh Election a Duty turin an an kaltlang a, UP hi an thleng tawh a ni.

** Nl. Lalrofeli News Editor chu a hnathawhna hmun Mamit lamah tunkar khan a kalta.

**  Tv. Vanlalawmpuia News Editor chu Badminton khel turin Jaipur lamah nimin khan a liam thla ta.

** Pu Johny Lalengmawia chu karkalta Inrinni khan NewLife Hospital-ah a Kal zai a ni a, tunah hian In lamah a in enkawl mek, a lo thatchhuah leh thuai kan beisei.

** Nl R.D. Lalnunmawii (Nu-i) chu tunlai hian Nerve tha lo avangin In lamah a in enkawl mek a lo thatchhuah lrh thuai kan beisei.

** Pu H. Laldawngliana te nupa chu hun engemaw chen chhiattawh avanga Khawbung lama  an thang hnuin tunkar khan dam takin an rawn haw.

** Nl R.Lalremtluangi d/o Lalthansanga lungphun hmang chhamphai a a zin chu tluang takin vengchhung a lo thleng leh ta.

**  Tv Lalrinchhana s/o Vanlaldinga chu hun engemaw chen damlohna avanga Kulikawn Hospital-a a awm hnuin nimin khan dam takin a rawn chhuak leh ta.

**  Pu Lalramhluna chun hun rei tak Ist IR a  a awm hnuin tunhnai khan Ist MAP ah a rawn insawn ta, kan lawmpui e.

INKAHNA

** “ Pu Biakzauva leh Zongena hi tu Party mahin Candidate tur hian an sawm ve lo a ni maw... an mahni hi an hman tereng nen..”                                              - Upa Para

** “ Tv. Hmangaiha leh Tv. Zodina (Ruling) te hian Nupui an Up-Date leh thuai ka lo ring thin a, an reh rei ta riau mai? Down-load tur  remchang an la hmu mai lo nge? An duhtui ta viau aw!”        - Sir U. Joseph-a

** “ Hall kawmthlanga, Zawngtah Kung sang tak lera, a rah 3 vel la awm (lawh phak tawh loh) hi Internet hmanga Download dan ala awm ang em? Kan thalai Internet inti thiam viau ho khan lo ngaihtuah ve teh u.”                                  - Pi. Lucy Zuiliani 

** “ Chiahpuam vanglai ang mai Download in ti reng mai! Chiahpuam thar hi in ching chhuak leh ta em ni zawk? Cheng 1 pawh dah puam duh tawh suh u!”                              

                                                                           - Nl. Pi. Hmingi & Nl. Pi. Rengi     

LENTUPUI SMS HUANG..!!

*** Tunlaia khawtlang leh Kohhrana inhmang tak tak amaherawhchu, memberpuite tana mit ti kham tur zawnga awm  leh sawisel ching te hi kan insiam that vat ava ngai em...                                                                                                                      - 9612518787

*** Kan Khawtlang hmasawnna atan leh a lo thianghlim zawknan kan ranvulh Ui, Ar leh Vawk te hi a neitu te hian kan enkawl tha lehzual a ngai hle mai. Midangte tana hnawksak leh midangte mit ti kham zawnga  an awm thin hi tih tawp a hun tawh hle lo maw..!!                             - Midangte tana thatna duha

*** Gas a lo......tih an rawn puan ruala second 10 pawh tling mang lova, a hmun ka thleng thla chung pawh a, Bur 85 vel a lo awm hman ziah hi chu a chhan hriatchian ka duh ngawt mai.

                                                                        - Zonuna

SAIHA IN KANG TANPUINA VEHBUR KHAWN A NI DAWN

 Tunkar tir lama Saiha a In 29 kangte tanpuina chu, Central YMA Ngenna angin, TYMA chuan Vengchhungah a khawn dawn a. He kangmei rapthlak tak tuartute tanpuina hi a pawisa faia khawn a ni ang. He Kangmei avang hian tunah hian Chhungkaw tam tak chenna In mumal nei lovin, mangang takin an awm mek a, an khawngaihthlak takzet a ni. He kang tanpuina khawn dan tur hi Vawiin tlai Dar 3 hian TYMA O.B. te leh Section hruaitu ten an sawiho dawn a. Mi mangang, chhiatna nasa tak tawktute tan hian Chhung tinin, Pathian malsawmna kan dawn atanga kan phal ang tawk tawk pek theuh i tum ang u. Tanpuina petute LALPAN nasa takin Malsawm zui zel che u rawh se.

EDITORIAL

KHAWTLANG TANA INPEKNA TAK TAK

Vengchhung mi leh sa a pui a pang hian kan khawtlang tan hian mawhphurhna kan nei theuh a .heng kan mawhphurhna te hi a in ang vek awm lo ve,Thenkhatin an hun pum pui chhhungkaw eizawng nana an hmang lai in thenkhat erawh in inchhung khur reng reng ngaihsak hman lovin khawtlang tan an tha leh zung an seng awl lova.Tin, khawtlang tana kan rawngbawlna te hi mahni tlaktlum duhna leh mahni hmingthat duhna maia rawngbwl nge kan nih mahni hmasial taka in haivur nan kan hmang nge khawtlang hmangaihna tak tak  thinlung pu in khawtlang rawng hi kan bawl.

Kan khawtlang hi mi khawtlang nena teh khin cuan eng tehual nilo mahse kan chenna kan lu nghahna anih miau avangain tunah zet zawng dawmkan ngai chhachhuah ngaiin a awm ta anih hi,chuvangin tun tum  kan in thlang tur pawh hi vengchhung mipui te hian  beng sika thinglung nena kan ngaituahna kan sen a tul ta takzet e,,hetiang anih avang hain veng chhung a lian lemlo bawka mi kan in hre ciang tawn em em a bawk a tuntum zwt chu mi rinawm, khawtlang tana mi thahnem ngai tha leh zung seng hrehlo mi khawtlang leh vengchhung hi mahni ta ang tak taka en thei mi hi kan mamawh a i thlang chhuak teh ang u.

NAKTUK   ATANGIN  TUITHIANG  VENGAH  CENCUS TAN DAWN

Naktuk Feb. 13, 2012 atang hian Tuithiang Vengah Socio Economic & Caste Census chu tan a ni dawn ta. Census hi min bialtu Enumerator Pu. C.Lalsangzuala (Teacher Govt. H/S Falkawn)  leh Pu. Vanlalruata Ralte (Pu.V.R.Ralte) Teacher Govt. Republic H/S ten, bial inthenin, anmahni tawiawmtute nen kan vengah hian an nei dawn a ni.

India ram puma neih mek he SEC Cencus hi a pawimawh hle a. Census neih lai hian an kalna tur bial chhunga chhungkaw Pa ber emaw Nu ber emaw Chhungkaw pawipang hria ten In lo nghah thin tur a ni ang. He Census hi kar 3 chhung vela zawh hman tum a ni ang. 

 KUM 2012 & 2013 TUITHIANG VENG GSA HRUAITU THLANNA NEIH A NI.

Tuithiang veng GSA hruaitu turte chu tunkar kalta Thawhlehni zan khan Tuithiang Veng hall ah thlanna neih a ni a, hruaitu atana an thlan tinte chu:

President : Pu Robert Zohmangaiha

Secretary : Pu Joseph Vanlalahruaia Sailo

Treasurer : Pu H. Zohmingliana te an ni.

Tin, heng thlan tlinte hian an O.B. pui tur leh Committee memberte an ruat bawk a chungte chu.

Vice President :Pu Vanlalhrila

Asst. Secretary : Tv Z.R. Thahmingliana

Fin. Secretary : Nl. Lalchhuanmawii

Patrons : Local Council Chiarman & President Branch YMA

Advisers : Pu C. Lalsangzuala & Pu H. Lianzama

Committee members :

1. Pu F. Zarzoliana 2. Pu Vanlalthlana

3. Pu Laldanmawia 4. Pu R. Lalthlamuana

5. Pu Lalramsiama 6. Pu L. Thangvunga

7. Pu H. Lalzirliana 8. Pu Lowrence K. Ropara

9. Pu Hmangaihrammawia 10. Pu Lalcrosstana

Dt 10/2/12 (Zirtawpni) zan hian Pu H. Sakhawliana te In ah Committee neih tur a ni.