24/July/2011 (Sunday)

CENTRAL YMA IN RAM HRUAITUTE A DEM!

Tuithiang Dt.24.7.2011 : Mizoram State Assemble Session neih meka MLA thenkhat ten ram dangmi mizorama awmte tihuangtau zawng leh an thlavang hauh zawnga thu an sawi avangin Central YMA chuan an dem thu an thuchhuah siamin an tarlang.
Zirtawpni July 22, 2011 a Central YMA thuchhuah chuan, dan bawhchhiaa Mizorama ram dang mi awmte chu Central YMA leh tlawmngai pawl dangte’n hnawksak an tih em em lai leh, thil sual an tih thinte avanga Mizo mipuite’n harsatna tam tak an tawh mek laiin, an thlavang hauh zawnga ram hruaitute zinga thu sawi an awm chu pawi an tih thu an tarlang a ni.
Central YMA chuan, dan bawhchhiaa ram dang mi, Mizorama lutte chu Central YMA in ram khua leh tuiah a pawm ngai dawn lo tih an sawi a; India danpuia “Foreigner is a Foreigner”tih chu a tir atanga tun thlenga Central YMA ngaihdan leh dinna a nih thu leh, anmahni dap chhuaka, a tul anga chak taka hma la turin sorkar an ngen thu leh an beisei thu an sawi bawk.


LAWRKHAWM
** Tunlai hian Class VIII chin hnuai lam ten Sikul Nipui Chawlh an hmang mek a. Kan Vengchhunga naupang tam takte chu nilengin Hall leh a chheh velah an khawsa thin a. Kan veng Hall nitin maia hnawk em em thin chu Badminton players ten tlai tin an phiatfai thin a, a hnawk lo deuh zawnga chetla thin turin veng naupangte an ngen e. Tin, Inthlahrung miah lovin kan veng naupangte hian kan Hall hi nitin an hunawl hnawhkhah nan an hmang thei a, a chhung erawh duat deuh thin se a duhawm khawp mai!
** Kan Local Council Chairam Pu K. Vanlalruala chu zirtawpzan khan a hnathawhna hmun Samthang atangin a rawn haw.
** Kar hmasa a Pu. Lalhmingmawia Sailo FAO kaisan thu kan rawn chhuah ah khan tih dik loh kan lo nei palh a. Pu. Hmingmawia hna thar kha State Transport Department a Deputy Director hna a ni zawk e. Tihsual palh ah chhiartute ngaihdam kan dil e.
** Nl. Sundaythangi (Sun-i) pa, Runremmawia chu Cancer natn avangin In lamah enkawl mek a ni.
** Pi Ramlawmi M/o Pu Zothansanga te chu an chhunga Keifang lama an zin hnuin dam takin an lo haw leh ta.
** Pi Lalremsiami W/o Lalthlengliana chu tunlai hian Thinlian natna avangin In lamah a in enkawl mek.
** Pi Lalmalsawmi (T. Sec.) chu tunkar khan Civil Hospital-ah a chhul zai a ni a, dam takin a rawn chhuak leh ta.
** Pu. Robert Kawlnithanga te naute chu a hriselna lam a that vak loh avangin Doctor hnenah tunlai hian an entir fo a. An that chhuah thuai kan duhsak e.
** Pu. Chaltea pa, Pu Vanlawma chu an khua Lehpanchhawng, Burma ah Ni 18 July khan a boral.

MEMBERPUITE CHANCHIN
** Nl. R. Lalbiakdiki chu tunkar thawhtanni khan Hyderbad-ah a nau Matlani te nupa tlawh turin a kal.
** Zirtawpni tlai khan Pu. Lalhmingchawia chu a Nu leh Pa te phur haw turin Champhai lamah an Gypsy in a tlan chho a, naktuk hian an rawn haw hman beisei a ni.
** Tv Z.R. Thafala S/o R. Lalnunmawii chuan tunkar khan SIRD Department-ah Asst. Director hna a hmu thar a, Kolasib ah a awm ang. Member chhuanawm tak kan neih leh tak avangin TYMA ten kan chhuangin, kan lawmpui tak zet a ni.
** Tv. Laltanpuia (TPA) pawh Muallungthu lama thla 1 zet hnathawka a thang hnuin tunkar tir lam khan a rawn haw ta.
** Pu Romanthanga (Lalpatea) chuan tunkar khan
bike, Pulsar 220 (dum) a lei thar. Kan lawmpui e.
** Pu Vansiama chuan tunkar khan Karizma bike a lei thar. Kan lawmpui e.
** Pu Lalthlamuana te nupa chu tunkar khan an nau Tv. Rina awmna Lunglei lamah an zin.
** Kan member Nl. Lalchhanchhuahi C/o Pu Thanghuta leh Tv. Lalrinngheta te chuan karhmasa khan Tuithiang Presbyterian Kohhran Biak Inah ‘tiam tlat e’ an ti dun ta. Nupa tuak tharte kan lawmpui e.
** Pu Lalrochhara chu tunlai hian Mitliam natna avangin In lamah a in enkawl mek.
** Nl. F. Lalhmuzuali chu Taiwan-a hun rei tak rawngbawlna neia hun an hmang hnuin dam takin a rawn haw leh ta.
** Pu. H. Laltanpuia pawh a Lal-ram Tawi (Troy Village) atangin Sikul Nipui Chawlh hmangin tunlai hian a nupui fanaute awpkhawm theiin a rawn haw a, a thlamuanthlak khawp mai.
** TYMA O.B. leh TKTP hruaitu tangkai tak pawh lo ni tawh thin, tuna Darlung Pastor bialtu Pastor nilai mek Tv. Pastor John F. Lalhmingliana leh Nl Lalhmeltha-i, Chawnpui Veng, Aizawl te chu September 9 (Zirtawpni) ah Tuithiang Veng Presbyterian Kohhran Biak Inah Kohhran Dan Thianghlimin an innei dawn niin kan lo hria a, kan phurh hle. An Inneih Ni hian ruai theh vek turin TYMA member ten kan ha ilo tat hriam lawk ang u.
** Pu. Rochungnunga chu TMEF Camping-a rawngbawltu ni a, kar hmasa lama a thang vang vang hnuin tunkar khan dam takin a rawn raw leh ta. Tin, Pu. Lalthlengliana pawh Camping neia rawngbawla a thang hnuin chhungkaw damsam lohna avangin tunkar Ningani khan a rawn haw. Pathianni hmasa a chhiat kan tawh zana Kuang siam tu emaw berin kan Veng T.T. Board thar ber an lo ti hmelhem palh a? TT players ten an ui hle. A khel ve ngailo te pawhin dimsak tawh ila a tha khawp mai.

ARTICLE
BRANCH YMA CHANCHINBU
- Irene Lalruatkimi

Khua leh Veng tina Branch YMA dingte hi vengchhung/ khawchhung hmasawnna turte, inlungrual leh inpawh tlang taka kan chenhona tur atana theihtawpa hmalatute a ni a. An hmalakna lian tak 1 chu Vengchhung Chanchinbu kan tihte hi a ni.
BRANCH YMA CHANCHINBU :
Kum tinin, Veng leh khaw tinte hian mahni awmna ah YMA Hruaitu te kan thlang thin a. Chung mite chuan YMA a pawimawhna hrang hrang neitu turte an rawn ruat zel a. Heng anga veng tana kumpui lingleta mitlawmngai lo penchhuak emaw ruat chhuahte zingah hian Chawlhni tuk tina vengchhung Chanchinbu, mahni tana hlawh leh hlawkna emaw chu sawi loh hloh zar zarna angte pawh kan hriat miah lohin an lo buaipui tang tang thin a. Chu an tlawmngaihna avang chuan khawtlanga Chhung tinten chanchin kan lo inhriatpawh theih phah ta thin a. Ava han hlu tak em!
A ENKAWL TUTE :
Kan hriat theuh angin YMA hruaitute hi tling an intih em avangte, thiam an intih em vangte a hruaitu a ni lova. Mipui in hruaitu atana kan duh avanga kan thlan chhuah an ni. Chutiang bawk chuan veng tina Branch YMA chanchinbu enkawltute pawh hi chanchinbu lama thiamna nei emaw he enkawl hnathawk tur hian tling tawk an intih vanga enkawl ta mai an ni lo tih kan hriat nawn fo a pawimawh hle. Tlawmngaia chanchinbu enkawl tura ruat an nih anga lo penchhuak an ni zawk.
A ENKAWLTUTE HLAWH :
Branch chanchinbu enkawltute hian fak aiin sawisel an hlawh tam zawk fo thin. An tih dikloh pakhat te pawh a langsar thei hle. Kartluanin vengchhung ah chanchin awm ang angte dap khawmin, Zirtawp zanah mahni inchhung tul dang tlansanin tlaivar lek leka an buaipui chang a tam a. Tin, Inrinni angah te pawh nileng thak thaka an buaipui chang a tam bawk. An chanchinbu chhut avanga an nupui/bialnu titau ta te pawh sawi tur an awm nual!
Thiam inti leh tling intih vanga enkawl an nih loh avangin, chanchinbu sawisel sak fo ai chuan, hmasawnna tur kan hriat te hrilh hria in an chhut laia an thingpui lum sak emaw sum pek te pawhin fuih phur ta thin zawk ila, a tihchi viau zawk ngei ang le. He hna hi kan zavaia thawh tlan theih a ni a. Ngaihtuahna thar nena kan vengchhung chanchinbu laka kan rilru put hmang hi thlir i tum tawh zawk ang u.

KOHHRAN HUANG
** Tunlai hian Tuithiang Veng Branch Kristian Thalai Pawl te chuan Silver Jubilee Hall-ah hla an zir ngawrh thei hle. He an hla zir hi Phunchawng nena an in tlawh tawnna a rem tur a ni. Thahnem ngaia atam thei ang ber hla zir thin turin hruaitute chuan member-te an ngen a ni e.
** MILALAI HRIATTIRNA : Kan Kohhran Chanhchinbu neih chhun ‘MILALAI’ chu zirtawpzana Computer a chhiat thut avangin leh siam mai theih a nih loh avangin vawiin ah chanchinbu a chhuak thei dawn lova, Editorial Board-te chuan Kohhran mipuite chungah ngaihdam a dilin lo hrethiam hram turin a ngen tak meuh meuh a ni e.

INKAHNA (HUAT AWIH LOH)
** “Reuben, Ni 1 thil thu a Text vawi 200 vel i laka ka hmu leh a nih chuan.... hei hi i tana ka last Warning a ni tawh ang! Ka Muay Thai ang che!”
- Pu. Lalnundika
** “Siam Siam, in tukverh bula i Trophy lak i tar thin, in College Week a Insuknawra i lak kha khawnge i dah tak? Kava hmu ngai ta lo ve?” - Pu. Zohminga
** “U. Para’n awka nem deuh duai a ‘ Kawwwl’ emaw ‘ Chhuaaaanng’ emaw ‘ Triiiiiii-piiii’ ti a min han koh duai toh hi chuan a insakna lamah puih a ngai hi a ni thin tlangpui!” - Tv. TPA te ho.
** “Chhas lamah hian ka Luck ve viau na a ka U hi chu kala tluk lo deuh a ni!” - Tv. Rinsanga
** “Kohhran Upa nih hi ka tlin ve dawn ta lo tawpin ka hria......Kan Nu hi chuan upa nupui nih a tlin ang mawle” - Pu. Zongena
** “Mahlu, Nunhlimi nen hian in leng tlang dawn tak ngialin ka hria. Englo.... thilphal deuh tawh mai rawh u!” - Pu. V.L. Thlana
** “vanapa sec thil zuarah chuan veng thlang kawngpuiah chuan kei aia thil hralh thei an awm lo ang”
- Tv. Zonuna
** “Dawr nghak tur chass chehlo tawk tak a rang lama mamawh a ni e!!”
- Tv. Afakawma


EDITORIAL
I TANGRUAL ANG U..

Kum 2011 chu karlovah kum chanve chu kan lo hmang ral leh ta der mai. YMA Member-te pawh kumtir lam ai chuan kan hnufualin kan mawng pawh a rit ta deuh a, Branch OB-te leh Executive member te pawh kan zuai ta deuh niin a lang. Tan kan laka hmalam pana ke kan pen chhuah leh a hun ta. Hruaitute leh Member-te kan kal kawpa insuihkhawm that ava hun ta em.
Kan tha leh zungte, thiamna leh theihnate hi Veng tana kan thehchhuaha kan inpek deuh a hun leh ta hle mai. Chhiattawh chungchangah phei chuan Branch OB, Executive member leh Section hruaitute hian tan kan lak thar a ngai ta hle niin a lang. A bikin chhiattawh mitthi lumen zanah phei chuan hruaituten hma kan lak hmasak phawt chuan member-te pawn thahnem kan ngaih a rinawm. Kan Branch OB-te duh aiin kan lang tam loin kan inthlahdah deuh niin a lang a, tan han la thar leh se ava duhawm em.
Tin, YMA member-te pawn tan kan lak a ngai nasa lehzuala, YMA kan nihna vawnnun tum zelin hnam dangin an neih ve loh chhiattawh chungchanga kan intawiawmna leh Mizo nun tlawmngaihna vawng nung zel turin i tangrual ang u.
Hruaitute leh Member-te kan tanrual loh chuan kan chak thei si lova, chuvang chuan YMA activities ah hian tun aia tha leh nasa zawka Hruaitute leh Member-te kan in pek thar leh a hun ta hle mai.

SECTION NEWS
1. Vanapa Section chuan Inrinni zingkar khan Veng chhungah Pickle zuarin hnatlang an neia, Veng mipui lo dawrtute chungah lawmthu an sawi tak meuh meuh a ni.
2. Khuangchera Section chuan Inrinni zing khan an Section huamchhung hmun nga (5) ah bawlhhlawh bawm an khai thar a, hei hi Veng mipui ten hmang tangkaiin enkawl pui a tha awm e. Heng bawlhhlawh bawmte hi Pu N.K. Thanga chuan a donate-a, a chungah Section hruaitute an lawm hle. Tin, tunlai hian Section Jersey chu phailam atang an chah mek.
Directory pawh peihfel a ni tep tawha, dawhthei taka lo nghak hram hram turin Veng mipuite an ngen e.
3. Taitesena Section chuan zirtawpni khan Pu Thanthiauva te Vawk an talha, an chungah leh Veng mipui lo dawrtute chungah lawmthu an sawi tak meuh meuh e.