31/July/2011 (Sunday)

VENGCHHUNG DEVELOPMENT HNA
KAL MEK ZEL

Tuithiang Dt.31.7.2011 : Tuithiang Vengchhung Development chu khawtlang hruaitute zarah thawhchhunzawm zel a ni a, tunkar kalta khan ‘D’ Mual Bethlehem Vengthlang nena inrina kawr bul ah Zun in siam a ni a. He hna hi Tuithiang veng Congress Unit ten an thawk a ni.
He Zun In siamna atan hian UD & PA atangin Sanction ` 30,000/- hmuh a ni a, a hna pawh a tha thawkhat hle a, helai hmun hi hman atang tawhin hmun pawimawh tak a ni a, a lun thei hle a ni. Kan Vengchhung Development na tur hrang hrang tunah hian sorkar lamah dil leh mek a ni a, kan khawtlang hruaitute pawh an buai hle a ni.
Kan Veng tana changkanna tur tam tak a la awm a, heng ah te hian mipuite kan tanrual thiam a, khawtlang hruaitute pawh kan nawr thiam a tul hle bawk awm e.Tin, kan Khawtlang Development hna te leh kan neih sa te hi Veng mipuite hian dim tak leh uluk takin enkawl thin ila tichuan kan Veng hi a lo changkang zel dawn a ni.

LAWRKHAWM

** Nilaini July 27 zingkar khan TYMA Duty ten report an hmuh angin, Pi. Lalthani w/o M.K.Das-a te In an dap thut a. Zu fun 25 vel an man sak. Excise Deptt. te rawn kalin an rawn chingfel a. Chhungkaw aiawhin Rinngheti chu man a ni ta a ni. Hetia man an nih tak avang hian vengdang atanga anmahni rawn dawr tumtu te an reh phah hle niin thu kan dawng. Report tur hria te chuan TYMA hruaitute hnenah hian rang takin i report nghal zel tawh ang u.
** Pu. Rotanga te Nupa chu hun rei tak Champhai lama thanga an zin hnuin tunkar Ningani khan dam takin an rawn haw leh ta.
** Pi Ngurliani, Pi Lalnunmawii leh Pu C. Vanlalliana te chu nimin khan Laisawral khua ah damlo hruaiin an zin.
** Pu. J.H.Lalrimawia MCS ( Pu. Rotanga makpa) chu Champhai Dist. atangin Kolasib DTO ni turin tunkar khan a insawn thla fel ta.
** Pu. Lallianthanga (T.Sec) te nupa chuan tunkar khan Aizawl Civil Hospital-ah fanu duhawm tak an nei thar. Kan lawmpui e.
** Pi Lalchami w/o Chalhuaia chu hun engemaw chen Delhi lamah a thang hnuin tunkar khan a rawn haw.
** Pi Thankimi damlohna avanga Imphal a hun rei tak a cham hnuin tunkar zirtawp ni khan damtakin a rawn haw.
** Pi Lalbiaksiami w/o P.C. Pachhunga chu nimin khan Greenwood Hospital-ah a pile zai a ni a, a lo thatchhuah leh thuai kan beisei.
** Pu Remngheta te chhungkua chu Thenzawl lamah tunkar khan chhungkaw pawimawhna avangin an zin.
** Lilypari chuan karhmasa khan Aizawl Civil Hospital-ah Fanu duhawm tak a nei, kan lawmpui e.
** Pi Cici Zarzoliani w/o Bonny Lalrengpuia chu hun engemaw chen Silchar lamah bungrua la a, thang hnuin tunkar khan a rawn haw.
** Pu Lalsangpuia s/o Naute-a chu tunkar khan damlohna avangin Mamit atangin rawn phurh chho a ni a, damdawiin a admit a ni. A lo thatchhuah leh thuai kan beisei.

MEMBERPUITE CHANCHIN

** Pu Khawlremthanga (V. Sec) Leader chu tunlai hian Hrawk na avangin in lamah a in enkawl mek. A lo thatchhuah leh thuai kan beisei.
** Pu Lalthianghlima te nupa chu chhungkaw tul avangin tunkar Ningani khan Lunglei lamah a zin phei a, dam taka a rawn haw leh thuai kan beisei.
** Nl. Lalruatfeli d/o Pu.Lalhmingchawia chuan Zirtawpni a zawh tak MRA (Mizoram Rifle Association) ina State level Rifle Shooting Competition an buatsaih ah khan Air Pistol inkahsiakna ah Junior leh Youth Girls-ah Gold Medal leh Silver Medal a la leh ta a, certificate leh pawisa fai engemaw zat a dawng tel bawk. Afeli hi kan chhuangin, Veng hming a tihthat thin em avangin TYMA te chuan kan hlut takzet a ni.
** Tv. Lalhlimawma chu tunkar khan a lehkha zirna hmun Shillong lam atangin hna tul avangin a rawh haw.
** Tv. Zothansanga (Ma-a) chu hun engemaw chen hna tul avanga Guwahati lama a thang hnuin tunkar khan a rawn haw.
** Pu Lalrochhara leh Pi Lalremsiami w/o Pu. Lalthlengliana te chu Mitliam natna avanga an inenkawl hnuin that lam an pan zel niin kan lo hria a. Kan lawmpui hle.
** Tv. Zodinsanga (Zodina) chu a hnathawhna hmun Ngopa lamah tunkar khan a kal.
** Tv. Jonathana s/o Thaliana chu hun engemaw chen damlohna avanga Durtlang Hospital-a a awm hnuin tunkar khan a rawn chhuak.
** Tv. R. Lalchhuanthanga chu Champhai lamah chhungkaw pawimawhna avangin a zin.
** Home Department in ASI of Police 28 vel an lak tur diltu mi 10,000 chuang zingah kan veng atang pawhin TYMA member thahnem takin he hna hi an dila, Physical Test ah an la tling deuh vek niin kan lo hria a, kan lawmpui e. Tluang taka an hna hi an hlen chhoh zel kan duhsak e.

ARTICLE

TUITHIANG VENG NUAM A THIL THLENG!
( It Only happen in Tuithiang Veng!)
- U. Sanga

( Tuna i awm mekna Tuithiang Veng ah hian thil tam tak alo thleng tawh thin a. Chung thil thleng thenkhat te chu ilo hriat ve atan leh i hriat thar leh atan, Hei... a inkahpah deuh nuaih in U. Sanga’n a rawn chhawp chhuak a! He thu hi Article thawhtu in awm mumal loh apiangin he Column ah hian kan rawn chhuah thin dawn e! Tuithiang Veng takin lo chhiar mai teh u.... Ed.)

1. TUITHIANG PA HO COMMITTEE THUCHHUAK! : Kum 1983 vel kha a ni ta awm e. Abik takin Aizawl khawpui kha rambuai avang khan a ralti hle a. Zana mi tu tih hriat loh tena mi In an kik thin, etc. avangte khan a ralti lehzual a. Chu boruak chuan Tuithiang Veng pawh a nghawng hle! Zan khat chu Pa-ho an inhmukhawm a. Chung ang thil thalo alo thlen palh thulha, hmalak dan tur leh an inpuihtawn vat dan tur an rel a. An thurel hmawrbawkna chu hetiang hi a ni, “ Mi tu an ni tih kan hriat loh ten kan In an rawn kik a nih chuan, Whistle (hamrik) ham vak ila! Chu hamrik ham hria apiangte chu, kan hriat veleh, a rikna In lam pana tlankhawm nise. In tinin hamrik chu neih tum theuh ni bawk se!” an ti ta a. In tinin hamrik an neih theuh theihnan a daih awm tawk an lei khawm a, Chhung tinin an khul ta vek a.
Mahse, hei hi thil thlen tak dan chu a ni.Chutia In tinin hamrik kan neih hnu chuan chhungkaw inenkawlna dan kha alo inang thei vek lo tawp mai si a! Chhungkaw thenkhat tena an Sitting Room banglaia an khaia, a hun taka ham atana an khek laiin, chhungkaw tam zawkte chuan an fate ban phakah an lo dah mai mai a. Naupang kuthlei ho lah khan an duh hun hunah, a chhun a zan thlu lovin an ham ta chuah chuah mai a! Vanneihthlak takin a hamna tur hun tak kha Pathian zarah a thleng ta lo hlauh zawk a! Lo thleng ta tak tak se...engtin tak inpui tawn ang i maw?

2. U. BABY-I TE NENA KTP HLA ZIR KHA! : Kohhran anga kan indan tirh atang khan kan KTP hruaitute khan Zaipawl tha neih kha an tum lian ber pakhat a han ni ve nghal pang a! A tlem a tlem khan Hla kha kan zir ngawrh ve thin hle a! Hla zir mi 20 vel kan han awm kha chuan kan hruaitu te pawh kha an phur thin khawp mai...abak han khawrh leh chuan tur vak awm hek lo! Abik takin a ‘Air’ (Suprano) lam kha an tlem thin hle a. Veng indang thara rilru a thahnem ngaihna an neih avangin khatih laia chhangchhe Nu U. Baby-i ( Pi. Baby Lalrammawi, Treasurer Tuithiang Veng Local Council Treasurer nilai) te kha kan Suprano lead singer kha an ni lo thei lo a! Mahse tunhnu a ka Zaimi nihna beng leh ka Music dilchhutna beng atang hi chuan U. Baby-i te ang aw kha chu alo va han Zaipawl aw awm lo thin em ka ti! In hriat theuh angin tun thleng hian a aw hi Pu. Hmingliana te aw ang deuha, ‘Aw beng verh zar mai’ hi alo ni a! Ani ang aw kha chu Bial ang pawha han Champion pui tlak kha chu a ni lo hrim hrim! Mahse chumi phena, Tuithiang Veng tana thahnem ngaia, ani ang Chhangchhe Nu tawh ina kha Kohhran Indang thar thalaite hlazirna a taima taka min lo ho thinna erawh kha chu....a Grade kha tun thleng hian kala dah hniam thei lo hrim hrim! Tuithiang Veng Presbyterian Kohhran Zaipawl Soprano hmahruaitu huaisen, leh a Kohhran thalaiho tana a sul sutu pawimawh tak pakhat kha a ni tlat!

3. PATHIAN THU A INHNIALNA ! : Kum 1989 vel kha a ni ta awm e. Chutih lai chuan Pu. B. Thasiama te chhungkua hi kan kawmthlangtuna Pu. LTA te Ina an awm lai kha a ni.
Tin, Zan khat chu, heti hi a ni a...... Tv. Lalparaliana Zanriah eikham leh Pi. Lalthanpuii ( Nu. Tani) te chawfak zo chu Pu. B. Thasiama te Inah chuan an leng lut ho a. Titi dang dang an han sawiho hnua, Pathian thu lam deuh hlek an han sawikai chinah chuan Pi. Tani chu U. Siama leh Thianpa Para te chuan an hnial rawn ta hi a ni ber a! Chutah In neitunu U. Zuii’n, “ Hawh u, Choka lamah Thingpui lum ila, i titi ho zawk ang u...” a tih hnu pawh chuan Choka lamah chuan an inhnial chhunzawm ta zel a! Chutah tak chuan a tanfung tihngheh a tum luatah Nu. Tani chuan a tawngkam a chhep sual ta! “ In hre ve vek a ni lawm ni...Chumi Ni ah chuan a hmaah khup tinreng an inpuang anga, Lei tinreng an thingthi ang tih a nih kha...” tia, tang taka a sawi lai mek chuan nui duh miah lovin Para chuan ‘Ava mak awm teh zul ve!’ alo ti a. Chutah Ku. B. Thasiama pawh chuan, “Chu.... an chhuah hluuui mai dawn a ni maw?” alo ti ve bawk a. Chutah a tawngsual palh ani tih inhretu Nu. Tani chuan, “Hetiang vel hi in ni a, mi tawng sual hi in chang a........” a ti ta a! An thusawi lo ngaithlatu U. Zuii chu nui chhuak ngam si lovin, thin leh pum na urh khawpin alo nui khur ngar ngar a!!!

KOHHRAN HUANG

** Vawiin Chawhnu Inkhawm ah hian Biatu Pastor in Lalpa zanriah Sacrament a buatsaih dawn a, Kohhran mipui ten chan theuh tum ang u.
** Tunlai hian Tuithiang Veng Kristian Thalai Pawl te chuan tunlai hian Synod kaltlangin Kohhran thalai a duh apiangte tan Solfa zirna an zan hnih chhung an buatsaih a, member ten hlawkthlak an ti hle.
** TKTP te chuan tunkar lo awm tur Dt 1/8/11 (Thawhtanni) zan hian Phunchawng Kristian Thalai Pawl an tlawh dawn a, hemi atan hian tunkar kalta khan hla an zir ngawrh hle.
** TKTP Sadraka Group te chuan tunkar zirtapwni khan Vengchhungah Sarep zuarin hnatlang an nei a, Veng mipui lo leisak tute chungah lawmthu an sawi tak meuh meuh a ni e.

INKAHNA (HUATAWIH LOH)

** “Kan Nula Tete Ruatsangi te angte pawh hi an duh chuan an lo chak ve thei khawp mai! ‘Gas a thleng dawn’ ti a an han puan tawh hi chuan Gas Bur 1 te lek lek hi chu a rawn vei-khaithlak nghal dawr dawr thei a! Gas Bur (a tak awm) angte lek lek te pawh hi a tlanchhohpui dawr dawr thei zu nia mawle!”
- Pu. C. Kapkima
** “Mami Varte nen hian aw leh hmel-ah tih chauh lo chuan in anna pakhat mah kan nei lo! Khawngaih takin min khaikhin tawh lo hram rawh u!” - Nl. Chhuangi ( K.Sec.)
** “SSA ‘Catch Them Young’ Coach hovin Footballer atana min rawn hel tak chhen avangin Khawlrema te, Lalte-a te, S.Sawma te ho nen hian KTP kan Over tak dawn thu kan lo hrilh chiang ta mai!” - Pu. Mahrila
** “Hmangaihna ah hian ka tlukluh ka inring ngai lova, mahse vengthlang ah khuan hmangaihna diktak chatuana ral ngai tawh lo chu a lo awm a ni..”
- Tv Tluangte-a V.Sec (Asst. Secretary)
** “Afakoma hi a zai ngai awm reng reng ka hre si lova? Zirtawpni khan Mizo Idol-a a telna turin Form a thehlut zu nia mawle!” - Pu. Henry-a
** “KTP huaihawta Music & Solfa Camp kan nei ta chu kei leh Joseph-a tluka hlawkpui lotu hi an awm ve kher awm love! Mahse midang chuan an hlawkpui viau mai thei!” - Pu. V.L. Thlana
** “Lalthlenglian.... Badminton One Day Tournament ah hian nau paw chunga tel rawn tum tawh suh! Tuma’n kan tanpui peih tawh lo che! Paw-lo chung pawha i thiam loh vei nen!” - Pu. Tete-a
** “Ka’n ngaituah let leh hian Vanapa Section picnic ni kha chu ka ngai vawng vawng..ka theihnghilh leh tawh ngai lovang,.tlangval tam tak hian min lo la tluklo chu a nih kha.,pa nih hma lutuk pawh hi hrehawmna chin alo awm ve a nih hi.!!” - Tv. Pu Zohminga
** “Awi keichu,,Asen, pasal tur atan chuan Tlangval hnathawh nei mumal lo, awmawl lutuk ang chi hi chu ka duh lo ka lo ti thin a, mahse hei tunah chuan duh tui lutuk pawh hi a tlai dawn a nih hi tiraw..?? - Vanapa Sec. Nula hmeltha Nu-i

EDITORIAL

KHAWTLANG TANA THAWK VEK KAN NI
Esopa Thawnthu fing pakhat ah chuan ‘Taksa thu’ tih a awm a. Chu thawnthu ah chuan Mihring taksa peng hrang hrangte chu inhnialin, hnathawk tha ber leh tangkai ber niin an insawi vek a. Kut leh Ka inhnialna ah chuan Kut chuan, ‘I eitur zawng zawng hi ka rawn dah luh vek a ni a, rawn dah lut lo ila chuan enge i ei tehreng ang..?’ a han ti a. Chutah ‘Ka’ chuan, ‘I thil rawn dah luhte hi lo thialin, lo lem zel lo ila... i thil rawn dah luh chuan enge awmzia a neih ang?’ a han ti veleh a. Chutiang ang vela inhnialna chu a ni.
He thawnthu hmang hian keini TYMA active member te pawh hi kan inngaihtuah zau tak deuh a tha khawp ang. Mihring hian tuina te, veizawng te, thiam bik riauna lam thilte hi kan nei theuh a. Kan tuina te, kan ngaihpawimawh zawngte, tul kan tih em em thilte min tuipui lotu an nih avanga member dangte kan sawisel a, kan rel ta mai a nih chuan a dik ber miah lovang.
YMA member mize inang lo pui pui te hi thenkhat chu Literature lama tui em em mai an ni thei a, thenkhat chu Cultural lama tui em em an ni bawk. Chutih mek lai chuan thenkhat te chu Ruihhlo lampang ngaimawh em emtute an niin, thenkhat te chu hnatlan leh vengchhung thenfai hna lama ngaihtuahna seng peih tak tak te an ni thei zel a. Kan tuina leh ngaimawh zawngte chauh chawi liana, mize dang nei kan memberpuite an rawn tel that tak loh avanga vuihmui pu chunga, kan rel fo a nih phei chuan kan tisualin, veng pawi thleng hial pawh kan sawi thei a ni. ( Mi tangkai tak tur tawmim leh inhlahrung taka kan siam theih avangin). Chuvang chuan mahni kawng kawnga tui leh tha, mi inpe tak tak nisi te hi i melh khum ngai lovang u. An YMA thin teh a nia!

SECTION NEWS

<i>VANAPA SECTION
1) Tunkar Zirtawpni khan Section sum tuaknan Bethlehem Vengchhungah Pickle zuarin an hnatlang. Member thawkchhuak an tha hle.
2) Section huamchhunga mipuite Section property donated duh tan Section hruaitute hnenah engtik laipawhin a donated theih e.

<i>KHUANGCHERA SECTION
1) Tunlai hian Section huamchhunga Bawlhhlawh Bawm khai tur an siam a, hun remchang hmasa berah khai an tum.
2) An Section huamchhung a lo thianghlim theihnan Section mipuite bawlhhlawh paih chungchangah fimkhur turin an ngen.
3) Vengchhung Directory an siam pawh peihfel tep tawh a, hun remchang hmasa ber ah Vengchhungah sem chhuah tum a ni a, an Dierctory siam chungchangah an hmanhmawh theih loh avangin Vengchhung mipuite hriatthiamna an ngen.