7/August/2011(Sunday)

CENTRAL YMA MARATHON RACE LEH TABLE
TENNIS TOURNAMENT NEIH A NI DAWN

Tuithiang Dt.7.8.2011 : Ni 23.9.2011 (zirtawpni) zing dar 5 hian Central YMA leh Mizoram Athletic Association buatsaihin Half Marathon Race (21 kms) neih a ni dawn. Tin, 4th Inter Branch YMA T.T. Tournament chu ni 7 atanga ni 10 September chhung hian Kulikawn Indoor Stadium-ah neih tura ruahman a ni.
Central YMA atanga he tournament-a tel ve tura ngenna kan dawn angin Tuithiang Branch YMA chuan Sports Sub-Committee kutah a dah a. Sport Sub-Committee chuan hemi hunah hian tel ve ngei tumin hma a la mek a, atul ang leh a theih ang a hma lak zel tum a ni.
Kan Branch atanga Marathon Mipa (5) a tel duh te chu aranglamin Sport Sub-Committee Chairman Pu Laldanmawia leh Secretary Tv. Lalchhanhima te hnenah in hriattir tur a ni. Hmeichhia bik chu hruaituten an ruatfel tawh a, tunah hian a tel turte in hriattir mek zel a ni.
Marathon-ah hian Mipa 5 aia tam lo leh Hmeichhia 5 aia tam lo tlan tur a ni ang a, tlan turte hian an tlan kawng an tlanchhuak thei ngei tur a ni. Zemabawk Pushpak Gate atanga tlan tanin World Bank kawng a tlanin Zampuimanga thlanah kualin Melthum, kulikawn-ah tlan zelin A.R. Lammuala tawp tur a ni ang a, tlan thui zawng hi 21 kms a ni ang. Lawmman (Cash Prize) te hi mimala tlan a ten an dawng ang.
4th Inter Branch Tournament chu 7th-10th Sept, 2011 chhungin Kulikawn Indoor Stadium-ah neih a ni ang a. Branch tin atangin Mipa leh Hmeichhia Team khat ve ve tel theih a ni ang. Kan Branch pawhin tel ve ngei tumin hma a la mek a. T.T. Players te tel thei tura lo inring theuh turin kan inhriattir a ni e.
Marathon leh T.T. ah hian Mipa leh Hmeichhia tel kawp Branch-te chauhin Participation Prize an dawng thei dawn a ni. Technical Rules leh Hriattur tuldangte chu Sport Sub-Committee hruaitute hnenah zawhfiah theih a ni ang.

LAWRKHAWM

** TYMA ten Vengchhung In tina Member te chhan tura Questionaire a buatsaih chu Lentupui Correspondent ten In tinah an rawn lam leh dawn a, hei hi ngaipawimawh a, member tinte lo pe theuh turin Branch YMA Tuithiang Veng chuan min ngen a ni.Questionaire hi kan khawtlang nun siam thatna atana thil tangkai tak a ni tih kan hriat tlan a tul hle bawk a ni.
** Tunlai hian Vengchhungah ruihhlo a hluar loh nan Branch YMA chuan hma a la mek a, Chawlhni tlai tin Duty neih thin a ni. Chuvangin, Vengchhungah ruihhlo la lut a zuar leh rui te chu a na thei ang berin an chungah Action a la dawn a ni.
** Naktuk August 8, 2011 (Monday) atang hian CCE hnuaia Elementary School ( Class I - VIII) te leh Class IX & X te chuan (Summer Vacation & Second term Chawlh) an hman hnuin, School an lut tan leh dawn ta.
** Pu. Challiana te nupa chu Vairengte a an fanu tlawha an zin hnuin tunkar khan dam takin an rawn haw leh ta.
** Pi Biaknghilhlovi (Nuseni) te nufa chu tunkar khan a u Pi Zaii te awmna Thingdawl lamah an zin.
** Pi. Lalremsiami w/o Pu. Lalthlengliana chu Mitliam leh Kawthalo avanga Ni tam tak Durtlang Hospital lama enkawl anih hnuin tunkar Zirtawpni khan dam lam panin a rawn chhuak ta.
** Malsawmkima s/o Pu. Kawlnithanga pawh Mitliam leh Typhoid avanga kar 1 zet an In lama enkawl a nih hnuin tunah chuan a tha tawh viau niin kan lo hria.
** Tunlai hian Vengchhungah Ranvulh Ui leh Ar chhuak a tam leh ta hle mai a, Kawngpui leh Step ah kan anvulh ek hmuh tur a tam leh ta hle a, Vengchhung a ti tawpin, a ti hmel mawi lo hle a, chuvangin, ranvulhtu ten kan ranvulh te i khuahkhirh ang u. Heng vanga kan ranvulh ten mi kut an tuar a nih pawhin kan sawi buai thei lovang. Ranvulh chhuah hi Dan kalh tlat a ni tih i hre ang u.

MEMBERPUITE CHANCHIN

** TYMA President Pu. Robert Ramsangliana chu Ningani zan (Aug.4) a Lung lam thalo avanga buaipui ngaia a nat thut hnuin tunlai hian uluk taka, Doctor enkawlna dawngin, an In lama enkawl mek a ni. Amah a harh tha a, a ngaihtuah awm tawh lo e. (A Vanram fan Article LENTUPUI chhiartuten an ngaihven thup e!)
** Nl. R. Lalbiakdiki chu Hyderabad lama a zin vang vang hnuin tunkar Nilaini khan dam takin a rawn haw leh ta. ( Tuithiang Veng Step-ah ala kal thiam vak lova...hriat thiam hram hram i tum ang u! Ala kal thiam ve leh thuai kan beisei tlat a ni! Ed.)
** Pu Lalthianghlima te nupa chu Chhungkaw pawimawh tak avanga Lunglei lama an zinchhuah hnuin tunkar Thawhtanni khan dam takin an rawn haw leh ta.
** Pu Lalrozauva chu a hnathawhna hmun Assam (Mangalpur)-lamah tunkar khan a liam thla leh ta.
** Pu. K. Lalsailova pawh a thang vang vang hnuin, a awmna Thenzawl PTC atangin Ningani khan kartawp chawlh hmang turin a rawn haw. ( Hmangaihna avangin kawngtluanin ruah a rawn do haw niin Pu. Laltea’n a sawi!)
** Nl. Lalnunpari (Mapuii) D/o T. Chuangliana chu Mizoram University atangin M.A. Mizo 2nd Division-ah a pass. Kan lawmpui e.
** Nl. Lalduhsaki D/o Lalnunzawma chu a lehkha zirna hmun Kolkata lamah zirtawpni khan a liam thla leh ta.
** Kan Veng Wushu Club-te chu Mizoram Open Wushu Championship Venghlui a neih zawh takah Mizoram Runner-Up niin kan hriattheih chin ah kan memberpui - Lalrempuia (Gold), Lalruatkima (Kura) (Silver), Lalchhanhimi (Silver) ten medal an la a. Lalrempuia hian Best Fighter lawmman a la bawk. Kan Veng ti hmingthatute hi kan chhuang takzet a ni.

ARTICLE

TUITHIANG VENG NUAM A THIL THLENG! (Chhunzawmna)
( It Only happen in Tuithiang Veng!)
- U. Sanga

( I awm mekna Tuithiang Veng ah hian thil tam tak alo thleng tawh thin a. Chung thil thleng thenkhat te chu ilo hriat ve atan emaw i hriat thar leh atan, Hei... a inkahpah deuh nuaih in U. Sanga’n a rawn chhawp chhuak a! He thu hi Article thawhtu in awm loh chang apiangin he Column tihkhahnan hian kan rawn chhuah thin dawn e! Tuithiang Veng takin lo chhiar mai teh u.... Ed.)
4. Tv. PARA LEH Nl. S. THANPUII TE CHAWEI TURA AN INSAWM THU :
Pu. Joseph-a U Nl. S. Thanpuii kha an In hlui, tuna Pu. Bonny-a te Ina amaha a khawsak kha a ni a; Tv. Lalparliana Sailo pawh kha amaha Pu. F.H. Hranghnuana Inhnuaia a awm lai kha a ni. Kum 1990 vel kha a ni bawk.
Sunday tuk khat chu Unaunu Lalthani kha a Pi (Tv. Ngurkima Sailo) te khan an Ar talh chhima, chawei turin an sawm a. Chu thu a hriat chuan? Tv. Para chu Nl. Lalthanpuii Inah chuan a han kal vat a, Chumi tuka a Ina chawei zawk tur chuan a han sawm ta chiam mai a! Chuti teh chiama sawm a han nih takah chuan Lalthani chuan Tv.Para Ina chawei zawk chu a tum ta a! Chumi piah lama thil thleng chu amah Thanpuii sawi angin i han bih chiang chhunzawm ta ila....
“Chawei hunah Para In chu ka zuk thleng a, ‘E ilo kal ta maw? Nang Nula zawkin Chawei chu han siam chiah la..’ alo ti a. Chawei chu ka han siam tan ta a. Chaw pawh chu a Cooker-te ah chuan min lo chhum kep ngei a. Mahse Chaw ka khawrh zawh hnua, Chawhmeh ka han suak leh tur chuan Phuihnam tlak bak chawhmeh dang ka hmu zo ta miah lo mai a! ‘Chawhmeh dang i siam lo em ni?’ Ka han ti dek dek deka, ani chuan ‘Siam Nang’ alo ti a! Chutah, Purun sen ilo vel zai tur ka han dap kual lai chuan ‘Lalthan, ho lutuk, I Inah pawh eng teh vak i hmeh ngai bik loh kha’ alo ti leh erh a! Chaw chu kan han ei tan ta a.. A phuihnam tlakah lah chuan fanghmir hi a’n tam mai mai khawp a! A tui hawp tuma, a fanghmir lang ho fian hmanga ka han hnawlh kian lai chuan... ‘ Khatia tih dim dem a ngai hlei nem, en raw ( tih pahin a han suak pawk a, maimitchhing chungin a han hawp pawp a, a lem nghal duak a ) khati kha a ni mai alawm’ a han ti zui a. Khami tuk kha chuan Sailo leh Sailo kha kan lo inbum chiang khawp mai. Ka thutlukna siam sual ber tum ala ni awm e.” a ti!
5. ZU CHECK ‘FAIR LO BER’?
An haw tawh bik em lovang chu maw....? An Cowboy laia thil thleng kha a ni ve miau a.......
Kohhran anga kan indan dawn kum leh a kum hmasa lam 1985-86 kum vel khan Saron Veng Presbyterian Kohhran Committee te nen khan kan veng thlang lama Zu check hna kha chak taka ,beihpui thlaka, neih a ni a. Kan man hnem thin khawp mai! Khang hunlai khan Tel-tin ruak hmangin Zu kha an bilh ber a, chu chu Leiah an phum bo thin a. Chu chu Iron Rod hmanga lei chhun kualin, kan zawng thin a. Keini la naupang tak takte pawh kha kan tangkai ve thin viau.
Khatia Zu kan han zawn kual lai khan, a chhun fuha, a hmutute khan kan han chhun fuh veleh khan ...aw ring taka auvin, “Heta hi a awm e” kan han ti a, an rawn tlankhawm nghal ta thin a, a huhovin kan laichhuak ta thin a. Mak tak maiin! Kei khan ka hmu thei thin em em mai a! Ka hnatlan ve tawh reng rengin, hmuh loh tum ka neih ka hre lo! Chuti khawp chuan ka hmui ngil or kawi thin a!
Tuk khat chu tuna Pu. Scout-a te In bawr velah khuan keini ho khan kan zawng a. Hnim pik tak karah khan kava vak phei a, chutah an thlawr sa Gallon (Liter 5) vel hi ka hmu ta a! Chutah Pu. Bawiliana te ho auh khawm tumin, “Heta.........!” ka tih mek lai chuan ka hnung lama ka Zu check pui U. Biaka, U.Valthuama, U. John-a leh U. Vunga te chuan, “Hey, hey! Shhhhh! Shhhh! Ngawi hmak rawh” min rawn ti ta mai a! Khatih laia kan veng tlangval lar tena khatia min han khap ta mai kha, ‘a zahthlak’ duh khawp mai! Thil sual lian tak ti ta niawm fahranin, inthlahrung takin, ka bawkvak let leh a. Ka haw nghal nal nal a. In ka thlen thlengin inthiamlohna hlirin ka khat! Khatih laia an mitmeng rum tak kha tun thleng hian ka mitthla ah hian ala cham reng! Mahse anni ho kha chu khami tlai kha chuan an ‘happy’ in, an ‘good’ ta ngawt ang?’

INKAHNA (HUATAWIH LOH)

** “U.Valtea’n Khawhar Ina a duh thala hun a han hman hian thil a sawi kimchang thiam bik riau a. A bengvar thlak bik thin! Midang hi chuan an ti ve mai mai a ni!” - Pu. Vanlalnema
** “Khawhar lenpuina a muthlu hman hi chu an vang viau asin mawle! Pu. Joseph-a hi chu chhun lamah a hah thin em a, hriat thiam hram a tha!” - Pu. Mahrila
** “Kawla, Nupui fanau chawmnan ka lo hmang ve laklawh tawh si a...Badminton i khelh dawn in pawisa rawn pai hnem ve deuh tawh teh! Game 2 vel kan in ‘Single’ dek dek a, ‘Pawisa ka nei tawh lo’ i ti zel mai!” - Pu. Muantea
** “Rawng hrim hrim-ah hian a sen lampang hi mawi ka tih zawng a ni a! Sam rawngah phei hi chuan a sen hian ka lungphu hi a tirang ber thin, ka en ning thei ngai lo!” - Tv. Laloma
** “Valtea hian Mithi an awma, Thlalak indawt dan tur a puan chang apiang hian....Khawhar chhung tena an ziah bak 10 vel tal hi a puan belh ngei ngei thin!”
- Pu. Bawih-a
** “Nu.Ngur-au! ‘Lalpan a Hmangaihte ram a buatsaih chu’ tih hi hla thupui kimchang lo tak alo ni a! ‘....a hmangaihte tana ram a buatsaih chu...’ tih hi a dik zawk alawm! Kei pawhin Ningani Zan khan ka han fang ve zuai asin!” - Pu. Robert RSLA


EDITORIAL

KHAWTLANG THIANGHLIMNA

Khawvel a changkang chho zel am chutih rual chuan mihringte pawhin hmasawnna rahbi thar neiin changkanna lam kan pan suau suau a, hei hi mihring kan nih chhung chuan kan tih tur a ni. Amaherawhchu, hmasawnna hian enge a ken tel tih hi kan ngaihtuah tel ngai em le..
Hmasawnna rahbi pawimawh ber pakhat chu Thianghlimna hi a ni. Kan vengchhung ngei pawh hian kawng hrang hrang ah changkangna kan nei a, hma kan sawn nasa hle bawk, Vengchhung Development hna pawh a kal chakin Khawtlang hruaitute pawhin tan an la nasa hle tih a hriat thei bawk awm e.
Amaherawhchu, kan Veng hian nasa taka hma a sawn lai hian Thianghlimna kawngah hian tan kan lak thar leh a tul hle a ni. Vengchhung thianghlimna hi hmasawnna atan hian a pawimawhin, a tul tak meuh meuh a ni. Hemi kawngah hian Khawtlang hruaitute mai bakah Vengchhung mipuite hi kan pawimawh hle a, Veng mipuite hian kan tih tur theuh kan tih a, kan In leh a vel te klan then thianghlim a tul hle a ni.
Tin, thianghlimna hi kawng hrang hrang a awm a, heng ruihhlo Zu leh Drugs, rukruk te pawhin Vengchhung thianghlim loh vang leh inrelbawlna fuh tawk loh vang te pawh a ni thei awm e. Heng ruihhlo te hi Khawtlang ti hmel hemtu leh ti chhetu, kan thalite nunna zuat tu a ni a, hemi kawngah pawh hian Vengchhung nu leh pa, mipuite kan pawimawh ber a, kan khawtlang hruaitute kan tawiawm a, kan support tha a tul hle bawk a ni. Tin, kan tu leh fate hetiang lama fihlim tur hian kan zirtir tha a, kan enkawl a tul tah meuh meuh a ni.
Thianghlimna hi Mihringten Pathian kan an teuhna ber a ni tih hriain, mitinte hian kawng hrang hrang hian thianghlim taka nun hman i tum theuh ang u.

SECTION NEWS


KHUANGCHERA SECTION
1) Vengchhung Directory an siam chu an zo fel tawh a, amaherawhchu, tunkar lo awm tur Thla thar Section Committee na ah Directory hi uluk zawkin thlir ho leh phawt nise an ti a, Veng mipuite lo nghak hram hram turin an ngen a ni.
2) Khuangchera Section te leh Saron Veng Taitesena Section te chuan Branch hriatpuina in Section O.B. Joint Meeting neih an tum a, hetah hian Ruihhlo Do na leh thianghlimna kawng hrang hrang ngaihtuah ho an tum niin kan lo hria.

TAITESENA SECTION
1) Vengchhung a lo thianghlim zawk nan an Section huamchhungah Chawlhni tlai tin Duty Detailment siamin an Duty thin a, ruihhlo ti leh zuar aan vai thin a ni.
2) Tunkar lo awm tur hian Section Committee neih an tum a, Committee memberte lo inring turin an ngen.