29/1/2012

HALL  BANG  PIN  BELH  A  NI  DAWN. 

Tuithiang Veng 29.1.2012 :   Dt.22.1.2012 tlai Dar 3 a Tuithiang Veng Hall Management Committee Emergency Committee neih chuan AMC atanga kan Veng Hall sak thatna tur (Improvement of Tuithiang Veng YMA Hall) Cheng nuai 1 kan hmuh tur chu Kan veng Hall sakthat nan leh a tul lai lai thuamthat nana hman nise an ti ta. He Committee ina an ruahman dan chuan kan veng Hall Bang hnuai Chhim lam te, thlang lam te, Stage hnuai te, Hall Tukverh thuamthat te bakah a kawtzawla tlakdal siamthat te leh Step bula thutna (Gallery) siam te an tum dawn ta a ni.
He Committee hian Pu. R. Mankima, President MUP Tuithiang Veng Unit chu Work Superviser atan an ruat leh a. A thachhangdawl turin Pu. R. Lalthlamuana an ruat bawk. Hemi hnu hian Kan Veng Local Council Chairman Pu. K. Vanlalruala hmalakna in Hall thuamthatna tur hian Brick, Cement & Balu a ba a lak nghal a  ni a. Brick bik chu Ningani khan leh Zirtawpni khan 1400 lai chah thlen nghal niin, Naupang hovin pakhat 50p rate in an thiar zo nghal vek a ni.
Tuna kan sum hmuh tur (work order kan hmuh tawh) Cheng nuai 1 hmang hian thil tam tak tih a har dawn a. Amaherawhchu he kan pawisa hmuh ang angte hi a tangkai thei ang bera hman tumin Tuithiang Veng Hall Management Committee te chuan hma an la mek a ni. Hnahi naktuk Thawhtanni atang hian thawh tan a ni ang.
Tarlan tawh ah khan he pawisa hi Hall kawt cheithat nana hman tum a nih thu kha tarlan a ni tawh a. Mahse, sum hi a tlem tham avang leh kan Veng Hall kawt hi tha taka han siamthat dawn ralah chuan hei aia sum tam zawk hi a ngaih avang leh Leivung thahnem tak paihbo a ngaih dawn avangte, chu Leivung chu han paih maina tura hmun leh tha lamah harasat na a awm avangin Hall lama he sum hman hi tihtluk a ni ta zawk a ni. Engpawhnise kan Veng Hall sakna sum hi tunhma atang tawhin dik taka kalpui thin niin, dik taka hman a ni thin a. He Hall sak rawn enfiah thintute pawhin hei hi min fak thinna a ni tih hi i hre reng ang u.

LAWRKHAWM

** Tuithiang Veng chhungah tunlai hian Insa kan tam hle a, kan insakna bungrua dahna te uluk tak leh fai taka thian turin kan in hriattir a, tin, kan bungrua te kawng dal lo leh motor kalna dala dah lo turin kan inhriattir a ni.

** Kumin Republic Day khan Pu. Ngurthanzauva, Inspector MPRO chuan a hna thawhthat avangin India President Police Award Medal for Meritorious Service a dawng a, tin, Champhaia awm mek Pu. V.Lalbiaksanga (BSA) S.I. pawhin Governor’s Gold Medal a dawng. State pum huap a Police Medal dawng pha 5 chauh an awm laia kan veng atanga mi 2 laiin Medal an dawn avang hian kan lawmpui a, TYMA chuan kan chhuang em em bawk  a ni.

** Pu Renghnuna, Pu R. Lalruala leh Pu R. Liansanga te unau chu an unaupa damlohna avangin tunkar khan Lunglei lamah an zin.

** Pu M. Hlunthuama te chhung chu tunkar khan Saiphai atangin an rawn haw.

** Francis V.L. Dinthara s/o Lalnuntluanga (Pate-a) chu tunkar khan Kawthalo leh luak avangin Grace Nursing Home ah admit a ni. 

** Pu Lalparliana Sailo te chhungkua chu tunkar khan Khumtung ah inneihna hmangin an zin a, tunakr vek khan an rawn haw leh.

** Pu. Zalenthanga pawh a hna lam tul vanga Saiha lama a zin hnuin Ningani zing khan dam takin alo haw leh ta.

** Pu C.H. Vanlalduha te nupa chu hun engemaw chen inneih hmanga Thenzawl lama an zin hnuin tunkar khan an rawn haw.

** Lalrinawmi d/o Zothansanga chu tunlai hian pumna avangin In lamah enkawl mek a ni a, tin, a unaunu Lalrinhlui chu tunkar khan a mit zai a ni a, in lamah enkawl mek a ni bawk, an lo thatchhuah leh thuai kan beisei.

** Pu H. Lalhmachhuana leh Pu Thaliana te chu hun engemaw chen Hliappuia an zin hnuin tunkar khan an rawn haw.

** Pi Siami w/o Lalthakima Parte V.Sec chu Pile zai a ni a, damdawiin atangin tunkar khan a rawn chhuak.

THUZIAK LEH NGAIHDAN

LOCAL COUNCIL KAN THLANG DAWN

 - DMA

Thla thar hi Local Council thlan hun a lo ni leh ta a, kan veng mipui aiawh tur leh hruaitu tur kan thlang dawn a, mi tha thlang chhuak thei tura mipuite kan inbuatsaih a pawimawh hle. Secretary tur pawh President-in a ngainat zawng leh a duh ang mi, thlan tlin pawh ni lo a ruat ngawt ang kha ni lovin, thlan tlin zinga mi ngei ruat tawh tur a ni awm e. Hei chauh pawh hian hmasawnna eng emaw tal a neih beisei phawt ila.

Party hrang hrang atangin V.C. kan nei tawh thin a, an hnathawh that leh that loh lam aiin, an hnathawh lohzia hi Tuithiang Veng mipuiten kan khawtlang hruaitute kan hmelhriat dan a ni fo. Chuvangin hnah hluite lakah hian mipuiten rinna kan nghat ngam lo a nih pawhin, an thawh loh rah an seng tihna a ni thei ang. Chumi avang chuan mi thar kan duhin kan mamawh hrim hrim tihna a ni lova; khawtlang thatna duh, a ngaihna hria, mi huaisen leh hnathawk peih kan mamawh tihna zawk a ni.

Pu Vanneihtluangan, “Congress-ho hi ka Vote che u a, mahse nangni aia tha Vote tur ka duh khawp mai,” a tih ang a, khua leh tui kan nihnaa Vote thlak ngei ngai mipuite hian duh anga mi tha thlan tur kan van leh si chuan a buaithlak a. Chuvangin, mipui rilru dik ringawt a tawk lova, Candidate thur chhuah fimkhur a pawimawh tihna a ni. Chutih rualin duhthusam thiau Candidate vawrh chhuah theih a nih dawn loh avangin hruaitu tha nei tur chuan mipuite hi kan pawimawh hle.

Hnathawh kawr ha a, muthlu leh daih thin mite hi chu thlan laihnaa kal a, thlan khura lut ngai miah si lo anga tangkaina nei lo an ni a. Chutiang mi ni tura kan rinte chu hnawl ngam a tha. Kan mimal chunga an thatna Vote hmanga thungrulh hi khawtlangin a tuar thei a; Vote hi ba rulh nan hman loh tur a ni. Kawngka lu chunga Designation ropui taka tar duh vang leh, chu nihna hmanga hamthatna beiseia hruaitu nihna chuh pawh awm theih a ni a; hetiang mi hruaitu neih hi veng rethei nih ai pawha vanduaithlak a ni. Chuvangin kan chhungkaw chunga roreltu atan pawha kan iai loh, hruaitu  leh hotu ena kan en theih tur, mi dik leh rinawm ngaihtuah chunga Vote thlak a tha. Vote thlak hi khua leh tuite tih tur a nih rualin, kan thawh peih loh leh tih theih loh thawk tura Vote hmanga kan tirh luih turte an nih avangin, nakin lawka kan sawisel leh hrep tur tih chiang sate thlan tlin ai chuan, Vote thlak loh pawh a thianghlim zawk mai thei.

Local Council niha khawtlang rawngbawl hi hlawk thur thurna a awm loh avangin he nihna duha sum chelek tute hian, eng rilru nge an put tih hi ngaihtuah ngun a tul hle. “Khawtlangah rorelna dik leh chak zawk a hmalak a nih theih nan, tha leh zung leh sum hial pawh thawh ve ka duh” tih rilru an pu a nih chuan chhungkuaa lo Campaign pui an phu a. Mahse sum hmanga nihna lei thintute  hnathawh loh dan belhchian hian he thahnemngaihna thinlung hi an pu lo chiang tih a hriat theih. Chuvangin, sum hmanga rawn inzuar an awm pawhin Vote lo tura chhung inkhawmnaah pawh inzirtir a, kohhran ang pawha thu chhuah siam hial tlak a ni. Khawtlang rawngbawl tur ni si, intiamkamna leh ther hlo tawktara rawn inzuar te khan khawtlang leh in chhungkua ngei pawh kha an hmangaih miah lova; an intiam tam poh leh hlauh tur an ni.

Party ruih chilhna hian mi tha hmuhna mit a tidel a, Party mi leh sate hi a hnua mahni thlan tlinte ngei sawisel ring ber ber leh vui hmui tilian lian an ni fo. Chuvangin Local Council thlannaah hi chuan Party Tarmit la thla a, khawtlang hmangaihna Tarmit vuah a tul hle. Kan thlan chhuah turte hi Sunday Sikul-a “AWM” kan tihpui leh turte tho an ni a, kan rel zui loh tur thlan chhuah a tha ang.

MEMBERPUITE CHANCHIN

**Pu. R. Lalthlamuana, Asst. Secretary TYMA, chu tunlai hian hnungzang na avangin tunlai hian In lamah a in enkawl mek, a lo thatchhuah leh thuai kan beisei.

**Nl. K. Lalmuanpuii d/o K. Vanlalruala K.Sec chuan tunhnai khan Mizoram University ah Stenographer Grade III hna a hmu thar a, kan lawmpui hle a ni. 

**Pu Johny Lalengmawia chu tunlai hian Kal natna avangin In lamah enkawl mek a ni a, a lo thatchhuah leh thuai kan beisei.

**Tv. Saihmingliana chu tunlai hian a hnathawhna  hmun Mualvum atangin a rawn haw, karleh lam khian a chhukthla leh dawn niin kan lo hria.

**Nl. Jordanthangi leh Nl V.L. Thlamuanpuii te unau chu sumdawnna avangin tunlai hian Delhi leh Kolkata lamah an zin mek.

** Tv.Lalrammawia(Mamawitea) chu sihhmui ah a zin

**Tv.Vanlalrema chu tunlai hian rawngbawlna neiin veng hrang hrang ah kal in a buai thei hle  **Pu.C.Lalniropuia chu a hnathawhna hmun Lunglei ah a kal leh ta

** Nl.R.D.Lalnunmawii chu dam loh na a vangin in lamah enkawl mek a ni

HUAT AWIH LOH

  ** “ Lalnundika Nupui NP-I hi Tuibur-Um tiat lekin a han rai ve reuh a! A mak lin-len reuh lutuk! A ti ve paaang mai a, a kal sawi ve laih laih tawh zu nia!”                                               -            Nl. Ronguri

** “ Valtea pawh Bangladesh-ah Dangpuithu Agent nget zawnchhuah tuma a liam thlak leh tak kha! Beki, Wholesale & Retail in maw in zawrh dawn?” -  Pu. Zongena

** “ David-a leh Lalropara te lah hi ‘Face Book’ an tih hi an khelh char char reng mai!”                                                                          - Pi. Lalmani 

** “ Ka nupui neih hunah pawh Chaw chhum hi chu ka bansan dawn chuang lo, inkhawm ban ah pawh kan chhum hman lutuk ang lungngai suh u... ” - Bd-a

** “ Insawitheih vang ni miah lovin...Manipur inthlanna a Duty mek  thianpa Te-a chuan kar 1 chhung lekin Manipur hel 15 a han kaphlum...oh!...Chhuahchhal  tawh!”                               - U. Sanga

KUM 2012 CHHUNGA TUITHIANG VENG MHIP UNIT HRUAITU TUR TE 

Dt.26/1/2012(Ningani) Dar 2 pm. khan kumin chhunga tuithiang veng MHIP UNIT hruaitu thlanna Tuithiang Veng hall ah neih a ni a,Heng a hnuai a mite hi member kalkhawm te thlan a ni

President : Pi Hmangaihzuali

Vice President : Pi Lalramliani

Secretary : Pi Vanlaldiki

Asst.Secretary : Pi Zothanpari

Treasurer : Pi K.Vungi

Fin.Secretary : Pi Malsawmkimi

Inthlanna hi RO leh PO ten tha tak leh hlawhtling takin an neihpui a an chungah MHIP te chuan lawmthu an sawi tak meuh meuh a ni

EDITORIAL

KAN CHANCHINBU HI

Vengchhung mipuite kan inhriatpawhna ber leh kan inhriattawnna ber pakhat chu kan chanchinbu Lentupui hi a ni awm e, kan chanchinbu hi tam takin tangkai tak leh hlawkthlak taka kan hman laiin vengchhung mi a tam zawk te hian a hlutna leh atangkaina hi kan hre tak tak lo ni te pawh hian a lang. Vengchhung mipuite hian kan chanchinbu hi kan hlut a, a tangkaina tak tak kan hriat a, Veng hmasawna kan hman thiam ava tul tawh tak em..!! 

Kan chanchinbu hi kan hruaitu hmasa te zarah leh Veng mipuite zarah vawiin thleng hian a la kal ve zel a, hma pawh a sawn chak hle a ni. Amaherawhchu, a enkawltute lam hi kan tling lovin, thu tha tak tak leh beng var thlak tak tak, veng mipuite tana hriatna leh ngaihtuahna tizau kawk kawk thei thei khawp thu tha leh in ngaihtuahna kaihruai thei khawp thu kan ziak thiam lova. Chuvang chuan chhiartu te atangin thurawn dawn pawh kan mamawh hle a ni.

Tin, Editorial Board-te hi kan bengvar tawk lovin Vengchhunga thil thleng kan hre kim tawk lo hle thin a, chhuah awm ngawih ngawih lo chhuah loh palhte pawh  kan nei ang tih kan ring a, veng mipuite hriatthiamna kan ngen a ni.