27/Aug/2011

CENTRAL YMA IN DAN LOVA HNAMDANG MIZORAMA SUMDAWNGTE AN
CHHUI ZEL DAWN!

Tuithiang dt.28.8.2011 : Central YMA chuan Mizoram chhunga Hnam dang dan lova Sumdawngte dapchhhuah hna chu kaltlangpui zel an tum a. Hei hi Mizo hnam damna leh Mizo hnam humhalhna pakhat a nih avangin tha an thlah thei lo niin an sawi. He thu hi Central YMA CEC meeting chuan sawi hovin, an hmalak tawhna te hi Mizo hnam ina hnamdang te chimralna tur laka kan indan theihna hmasa a nih tiin, chak taka hmalak chhunzawm zel tha an ti tlang a ni.
Hemi denchhen hian tunkar tirlam khan Aizawl DC thar Pu. Sukhbir Singh chuan hnamdang sumdawngte endik hna leh Innr Line permit enfiah hna chu Police te endik tur a nih avangin NGO emaw pawl dang dang tena an tih tur a ni lo tiin khapna dan a siam a. Mahse, Central YMA chuan Mizo hnam nghawr thil a nih miau avangin dan ang thlapa, Mizo nilo dan lo anga Mizorama sumdawngte enfiah hna chu chawlhsan lova, enfiah zel an tum thu hi an puangzar ta a ni.
Central YMA chuan Mizo thenkhat, mahni hming hawha hnamdangte sumdawnna lo puitute chu hnam hralhna ang hiala an ngaih thu an sawi bawk a. Sum tlemte a mahni hnam hralhna ah an ngaih sak niin an tarlang bawk a ni. Vai sumdawng humhim thin tute hian anmahni tanghma chauh thlirin, Sum avang liau liau in, hnamdang sumdawngte chu an duh duh dana an chet theihnan an tanpui thin a. Hei hi mahni hnam phatsanna leh mahni nihna hralhna a ni tih pawh hre phal lovin an theihtawp chhuahin tanhmun an la siam tang tang zawk a ni.
Hetiang mi Tuithiang Vengah hian an awm ve lo nia a lan avangin Tuithiang Branch YMA chuan Veng mipuite chungah lawmthu an sawi a. He kalphung tha tak hi zawm zel turin Vengchhunga chhungkaw tinte a ngen nghal bawk a ni. Kan ram leh hnam humhimna kawngah hian ram leh khawtlang hi kan pawimawh a ni tih hi keini Tuithiang Veng mipuite pawh hian kan hriat thar leh a tul hle a ni.
Tuithiang Veng chhunga hnamdang Mizo hming hawha Sumdawng an awm ve miah loh thu hi TYMA chuan Central YMA ah, chhuang takin, a report tawh a ni.

LAWRKHAWM

** Ningani khan TYMA tena an enkawl lai mek Information Mike siamtha a hnatlang neih leh a ni a. Hnatlang mi tlemte ten Pu. Sakhawliana Inchung Mike Horn dah chu Wire thar hmangin an thlak a. Cable hi a ba in Pu. Mazama te Dawr atanga lak a ni a, Local Council ten an rul leh dawn a ni. Pi. Thansiami Inchung leh Thlanmual line pawh thlak thuai a ngai tawh a ni.
** Tunkar Ningani kha TYMA enkawl lai mek Information Mike Pu. Sakhawliana Inchung ami chu a hrui thar a thlak a ni ta. Pi. Thansiami inchung leh Thlanmual line pawh thlak thuai tum a ni. Hrui hluite an lo chhe tawh hle a. A thlakna sum hi Local Council ten ruahmanna siamin TYMA kaltlangin an tum dawn niin kan lo hria.
** Tuithiang Veng Middle School kawt Turning Point ah tunlai hian Motor dah an la awm thin a, helai hmun ah hian motor leh In sakna bungrua dah khap tlat a ni a, chuvangin motor dah kan awm a ni chuan inngaihhnathiamna awm miah lovin an motor-te hi Traffic police hnuhchho tir an ni ang.
** Malsawmkima s/o Pu. Kawlnithanga chu tunkar tir lam khan Durtlang Hospital-ah Admit a ni. Malsawmkima hi Mitliam natna a vei hrep hnua a that hleih theih loh avangin Admit a ni a, Ningani khan an rawn chhuak a ni.
** Pi Vungi w/o N.K. Thanga chu a unaupa boral avangin Lamka Manipur lamah a zin a, nimin khan a rawn haw.
** Pi Khawvlchhingi chu karhmasa khan Durtlang Hospital-ah Kawthalo avangin admit a ni a, tunakr khan thatlam panin a rawn chhuak.
** Pi Hmingthanchhungi w/o Chawithanvela chu tunlai hian Kal natna avangin In lamah enkawl mek a ni, a lo thatchhuah leh thuai kan beisei.
** Benjamin Zodintluanga s/o Lalsawmkimi chu tunlai hian damlohna avangin In lamah a in enkawl mek.

MEMBERPUITE CHANCHIN

** Pu T. Lalramsiama Leader (K.Sec) chu tunkar khan Aizawl Civil Hospital-ah a ke Bawk zai a ni a, thatlam a pan mek niin kan lo hria.
** Kar hmasa Pathianni hmanga rawngbawl a zin Pu. Lalhmingchawia chu Thawhtanni khan Chhiahtlang atangin dam takin a rawn haw leh ta.
** Pu L.C.H Vanlalruata leh Tv Zonunsanga te chu tunhnaia Table Tennis State refree an exam chu tha takin an pass a, Central YMA T.T. Tournament neih turah an enkawl dawn a ni. Hetiang mi Vengchhungin kan nei hi kan chhuangin kan lawmpui tak meuh meuh a, anni hi kan Vengchhunga State Refree kan neih hmasak ber an ni a, Vengchhung thalaite pawn hma kan sawnpui ngei kan beisei tlat a ni.
** Tv. Lalrinsanga kan chanhinbu Joint Editor chu karhmasa khan Thingdawl ah chhungkaw pawimawhna avangin a zin.
** Nl. K. Lalremruati chu Durtlang Hospital a kar khat dawn lai a awm hnuin tunkar Thawhtanni khan alo chhuah hnuin, kar laihawl khan Vaivenga Hospital (Care) ah Admit leh nghal a ni a, nimin khan zai a ni. LENTUPUI, Vanapa Sec. leh Culture Sub- Comtt. a Nula tangkai tak thin Nl. Rem-Rem-i hi a that chhuah leh thuai kan duh a, duhsakna sang ber TYMA ten kan hlan mawlh mawlh e.
** Pu Vanlalrengpuia Secretary (V.Sec) chu tunkar khan Aizawl Civil Hospital-ah a chal zai a ni.
** Pu Vanlalpeka te nupa chuan tunkar khan Durtlang Hospital-ah fapa duhawm tak an nei thar. Kan lawmpui e.
** Tv. Lalbeiseia, Bike accident avanga a ke tihliam chu Durtlang Hospital a hun rei taka awm tawh hnuin that lam a pan zel niin kan lo hria a, kan lawmpui khawp mai. Mahse a hliam tawrh na tak avang hian hun engemaw chen chu he Damdawi Inah hian ala awm hrih a ngai dawn a ni.
** Nl R.D. Lalnunmawii (Lalnu-i) chu tunlai hian damlohna avangin In lamah a in enkawl mek, a lo thatchhuah leh thuai theihnan duhsakna kan hlan e.

INKAHNA

** “ LENTUPUI in YMA Chanchinbu tha ber lawmman 1-na kan lak tuma a endiktute rilru kan hnehna ber pakhat chu vengchhung News kan chhuah that vang kha a ni. Damlo te, zin te, Motor, Bike, Scooter, Fridge leh a dang nei tharte kan chhuah zat zat thin vang kha a ni a. Chutiang ang News ‘ho’ te te avang chuan 1-na kan ni tlats! Kan chhuang a, kan la ti zel dawn! Tin, Inkahna pawh hi chhiartu an tam a, kan lawm tlang a, kan la zawngchhang zel dawn niin a lang! ” - U. Sanga & U.Te-a
** “Ka damlo chu ka nau Siam Siam-i hian nuam a ti ber awm e! A Pocket a full a, a balance a tam a, haw phal mai mai chi ni hek lo...min awmpui char char mawle! Fair lo e....!” - Nl. Rem-rem-i
** “ Bawiha anga duh hun huna Rawngbawla zin tura koh kal theih loha min khuahkhirh tlattu kan Nu hi...hei hi a ni kan chhungkaw danglam ve em em na chu ni!” - Pu. TBC Bawla
** “ Valte-a an tih, Tv. C. Lallawmkima T. Section hi engatinge Zonet Mizo Idol ah hian a hmel kan hmuh leh si loh! Zai lamah kalin, YMA a tel hman tha-thum tawh lovin hla a zir tlai tin ta a ni lawm ni? A talent pho chhuah hunah engatinge a inlan leh tak si loh?” - Pu. Khawlrema & Pu. Muantea
** “ Bethlehem lamin bawlhhlawh kan Kawrpui-ah an rawn paih tam ber a, Motor dah pawh an tam ber thin ! An thik tura awm loh hi Tuithiang Veng Lirthei nei tena kan tih tur a ni.” - Pu. Lalthanliana & Co.
** “ Ka ngaih a tha ta hauh lo mai!...Rilru lama lawm taka min siam chung si hian engatinge kan Nu hian a duh duhna hmunah hian min tirh theih ziah.....? Min tanpui teh u, min hrilhfiah sak vat teh u!”
- Pu. Laldingngheta
** “Det-a, keimah ang chiah i ni ve ta a nih chu! Kei pawh hi maw....a tirah chuan ka han lawm thin vur vur viau thin na a, ka han inhriatchhuah meuh hi chuan..... a mak ka ti ve lutuk!” - Pu. Vanlalsanga (T.Sec.)

EDITORIAL

VENG MAMAWH MI TI TAK TAK NGAM!

Veng mipuite hian thu kan awih lo a ni miah lova, a kengkawhtu tena an tlin phawt chuan tih nuam tak tak vek kan ni tih hi tunhnaia LEI a Motor dah phalloh leh Ui leh Ar khawlaia chhuah phal lohna lekkawh a nih takah hian alang chiang ta hle awm e.
Tuithiang to Bethlehem inkara LEI a Motor dah khapna dan puan a nih hnuah leh Motor dah palh te Motor Number Vengchhung Mike hmanga puan a nih takah phei kha chuan he LEI chunga Motor dah hi hmuh tur a awm ta miah lo a. Nilaini Zinga Taxi pakhat lo dah tu pawh kha a inchhir khawp mai an ti! Chutiang khawp chuan he Dan thar hian zawm a hlawh a.
Tin, Ui leh Ar chhuah khapna dan Local Council tena an han kenkawh tak tak chinah chuan Veng chhungah Ui-ek te, Ar Ek te hmuh tur a tlem ta khawp mai! Hei hi veng changkanna kawnga rahbi hmasa a nih avangin kan Venga thil inthlak thleng mek te zinga a lawmawm ber pawl a ni awm e.
Kan Veng LEI humhalh hi Veng mipui tena kan tih tur a ni a. Tute emaw Kuta dah bik leh tute emaw hmalakna bik tura dah rilruk erawh a tha ber lovang Dan bawhchhetute chu, kan hmuh veleh, hau ngam ila....Veng hruaitute hnenah report nghal bawk ila. Chutianga kan tih tlan theih chuan kan veng hi kan zahawm sawt bawk ang.
Tin, Ran khawlaia chhuak khuahkhirhna kawngah pawh hian Ui emaw Ar khawlai chhuak emaw hmu chuan man ila, Local Council ah emaw thlen zung zung ila. Chutianga kan tih zat zat avang chuan he Veng hi Veng zahawm lehzual ah kan siam thei theuh dawn a ni. Mahse, tute emaw tih tura kan dah a, kan phut tlat bik chuan he dan tha tak 2 pawh hi a zuzi leh thuai mai ang tih a hlauhawm!
Chutih lai karah erawh chuan Khawtlang hruaitu atana kan thlantlin te hian Veng hi mutmawh hnarmawh ah hmangin, an Dan leh Dun zamte hi a kip a kawiin ngaihven reng sela. An huai a, an inpekna a thuk poh leh anmahni zuitu NGO te tha hi a chak anga, zui tak tak tlak hruaitu neih hlutzia hi he veng hian a tem zel dawn a ni.

SECTION NEWS

VANAPA SECTION NEWS
Vanapa Section te chuan tunkar Ningani zan khan Pu Zaitawna te Balu thiarin an inhlawh a, member thawkchhuak an tha hle.
Tin, Vanapa Section te chuan Section Property tuakna tur atan Section huamchhunga chhungtinte hnenah Donation khawm an tum a, chhungtinte lo inring a, lo tlawmngaihsak turin an ngen tak meuh a ni.

KHUANGCHERA SECTION NEWS
TYMA Khuangchera Section ten Tuithiang Veng Directory an siam ah number dah hmaih a awm a, heng a hnuaia mite hi kan hriat theih te an ni a, Veng mipuite kan Directory ah khan lo ziak chhawng turin an ngen nghal che u a ni e.
Pu LCH Vanlalruata 9862846286
Pi Zodinpuii 9862287087
Pi C. Biakpari (Parte-i) 9615547265
Pu Vanlaldinga 9862361411
Pu Zosangpuia 8575891268
Heng kan tihhmai palh te chungah hian hriatthiamna kan ngen nghal bawk e.
Khuangchera Sectionte chuan an Section huamchhung a lo thianghlim zawknan chawlhni tlai tin Duty an nei thin a, memberte pawh an phur hle a ni.

TAITESENA SECTON
Taitesena section te chuan tunakr zirtawpni khan Pu L. Hrangthuama Vawk an in talh hlawh a, hnatlang siam saktu Pu Hrangthuama te chungah lawmthu an sawi.
Tin, Section huamchhung a lo thianghlim zawknan Chawlhni tlai tin Duty an nei thin.