1/Oct/2011

BRANCH YMA HNATLANGPUI NEIH CHHUNZAWM ZEL A NI.

Tuithiang Dt. 2.10.2011 : Dt 24/9/11 (Inrinni) Zingkar atang khan Tuithiang Veng Branch YMA chuan Faina Hapta denchhan in Branch pumhuap Vengchhung thenfai hnatlang neih a ni a, member thawkchhuak erawh an tha lutuk lo.
Faina Hapta hi Dt 3/10/11 (Thawhtanni) atanga hman tan tur a ni a, hetah hian Aizawl khaw chhunga Veng fai ber thlanna neih a ni dawn a ni. Tin, hemi atan hian Slogan inziah siakna neih a ni bawk dawn a, pakhatna in lawmman tha tawk tak an dawng dawn a ni.
Kumin a Mizoram Sorkar in Faina Hapta a hman turah hian kan Branch chuan chak takin hma a la mek a, Vengchhung a lo thianghlim nan leh mipuite kan lo hrisel zawk nan Branch pumhuap hnatlang a nei a, hetah hian Section hrang hrangte a hran a, hnatlang lovin Branch in he hnatlang hi a kengkawh a, Section tinte thenfai hna neih thin a ni.
Dt 24/9/11 (Inrinni) Zingkar khan Vanapa Section huamchhung thenfai a ni a, member 45 an thawkchhuak a, hetah hian Vanapa Section huamchhung kawngpui thenfai hna thawh a ni.
Tin, nimin Inrinni zingkar khan a thawhhnihna neih a ni a, Khuangchera Section huamchhung thenfai hnatlang neih a ni. He hnatlang ah hian member 40 an thawkchhuak a, Chhinga Veng nena an inkalpawhna Lei leh Pu Laiawrha te In chhak kawng phei te bakah Hall thlang kawng phei te sam faiin an hnatlang bawk a ni.
Dt 6/10/11 (Ningani) khian hnatlang thawh tawpna ber neih tur a ni a, hetah hian Taitesena Section huamchhung thenfai hnatlang neih tur a ni. Memberte a tam thei ang ber hnatlang turin Branch hruaitute chuan an ngen tak meuh meuh a ni.
Kan Khawtlang leh Veng thianghlimna kawngah hian Vengchhung mipuite hi kan pawimawh hle a, an hmalakna kawngah pawh kan thlawp a tul hle a ni. Branch in eng ang pawhin hma la mahse, kan In leh a vel te bakah, kan tui luankawr te kan enkawl uluk a, kan thenthianghlim loh chuan awmzia a nei dawn a ni. Chuvangin, Veng mipuite kan In leh a vel te bakah kan bawlhhlawh te a paihna dik takah i paih thin ang u.

LAWRKHAWM
** Tunlai hian tlang hrileng atam hle a, hetih hun lai hi naupang leh tar chaklo bakah mi nawlpui ten natna kan kai hun lai anih avangin mitinte i fimkhur tlang ang u. Tin, tunlai hian mitliam natna a tam hle kan tui in te i fimkhur tlang ang u.
** Pi V. Hrangthuami chu Department thil ah Thenzawl lama a zin hnuin tunkar Zirtawpni khan damtakin a rawn haw leh ta.
** Pi Lalluii m/o Lalremngheta chu tunkar Thawhlehni khan Civil Hospital-ah a mit an zai a, dam takin a rawn chhuak.
** Pi Khawvelchhingi chu tunkar khan Grace Nursing Home atangin damtakin a rawn chhuak.
** Pi Lalthazuali w/o Laldingngheta Ralte chu Civil Hospital-a Sentut avanga hun engmaw chen a awm hnuin tunkar zirtawpni khan a rawn chhuak.
** Pu Lalhualvela chu tunlai hian khawsik avangin In lamah a in enkawl a, tin, a fapa Lallawmpuia pawh Mitliam natna avangin In lamah enkawl a ni bawk. An lo thatchhuah leh thuai kan beisei.
** Laldingliana s/o H. Lianzama chu tunhnai khan Care Hospital-ah zai a ni a, tunkar khan thatlam panin a rawn chhuak
** Karhmasa chhuaka Nl Rebek V.L. Peki tih kha Pi Rebek V.L. Peki w/o F. Lalhriatpuia tih zawk tur a ni a, tihsual palh ah ngaihdamna kan ngen nghal e.
** Pi Malsawmdawngliani Hmar d/o H. Lalzarliana te nupa chuan tunhnai khan Civil Hospital-ah fapa duhawm tak an nei thar. Kan lawmpui e.
** Lalramluahpuia (Lalbawih-a) s/o Robert Zohmangaiha, President TVGSA chu a zun kawng lam that lohna avangin Aizawl Civil Hospt. a zai turin Zirtawpni khan Admit a ni a. An zai theih hun tur erawh hriat ala ni lo.
** Venglai Middle School kawta Motor turn-naah tunlai hian Insakna bungrua leh Motor dah thin an awm a. Helaiah hian khawtlang hruaituten dah tawh lo turin an hriattir a ni.

MEMBERPUITE CHANCHIN
** Pu Lalrinzuala chu tunkar khan Lawngtlai lamah Office hna tul avangin a zin.
** Pu Lalthanliana te nupa chuan tunhnai khan Durtlang Hospital-ah Fanu duhawm tak an nei thar. Kan lawmpui e.
** Tv. Michael Laldingliana chu hun engemaw chen damlohna avanga Durtlang Hospital-a a awm hnuin tunkar khan a rawn chhuak.
** Nl Lalthanzami (Zamte-i) d/o Thanpuii chuan Dt 4/10/11 hian Tv Rozuala chu Thingsulthliah Biak In ah an innei dawn.
** Pu Billy Lalianzuala chu tunkar khan damlohna avangin Durtlang Hospital-ah admit a ni a, a lo thatchhuah leh thuai kan beisei.
** Tv. Malsawmtluanga Tonson s/o Zaihmingthangi chu a zirna hmun Tezpur atangin tunkar khan a rawn haw.
** Pu Lalremngheta chu a hna tul avangin nimin Inrinni khan Lawngtlai lamah a zin.
** Nl. Mimi Zosangpuii d/o Thanpuii chu hun engemawchen chawlh hmanga a rawn haw hnuin tunhnai khan a lehkha zirna Delhi lamah a liam thla leh ta.
** Pu Romeo-a (V. Sec) chuan tunkar khan Scooty thar a lei. Kan lawmpui e.
** Pu. H. Zothansanga (SDO P&E) W.Phaileng chu tunkar tawpa a rawn haw na kawngah rannung (insects) in na takin a seh a. Mahse Damdawi ina a rawn inentir nghal thuai avang leh rannung tur thahna injection an lo chawh thuai avangin a tha leh tawh hle niin kan lo hria a, kan lawm hle. Tin, rannung seh nazawng hi tunlaia kan hlauh ang thihna thlentu hi an ni lo deuh vek a. Thihna thlentu heng ang rannung hi chu a seh lai te pawh hriat a ni ngai lo ni a sawi a ni cheu bawk.
** Tunkar kalta khan Pu. K. Lalsailova te nupa pawh amah Pu. Sailova awmna PTC Thenzawl lamah an zin dun niin kan lo hria.

INKAHNA-HUAT AWIH LOH
%% “ UPC ho hian thil kan in sem ta rau rau bawka, Heiden Real Over Liei pawh hi in sem law law mai ila ka duh mai. A Heiden lam, a lulam hi UPC Mizoramin chang se.,..a Over lam, a mawng lam hi NEI UPC-in chang i la ka duh tho,. Pawi ka ti lo.!
- Pu Awrhtea UPC em em
%% “ Mitthi Lumen tlaivar zana Khuangpu ni thin pa tlawmngai Pu. V.L. Rengpuia, Pu. Lalrinfela te leh a vaw thang thin ho hi an fakawm tak tak! An nupuite lawm vak lo meng-rang rawlh rawlh pawh kalsan ngam khawpa huaisen an ni lehnghal!” - Pu. Thangvunga
%% “ Khuangpu in awm thlawt lo a nih pawhin kan Sangmawia kher kher hi chu lo phut tawh teh suh u. Ani hian ‘Heiden rial..Over Lai...’ tih hla bak kha a vaw-rem thiam lo hrim hrim bawk!”
- Pu. Liana
%% “ Kei chu Tuithiang a cheng ka ni ve lo, Tuithiang Veng, Aizawl. Mizoram a cheng ka ni. Tuithiang chu Burma ramah khian a awm.” - Sir. U.Sanga
%% “ Mahni Inchhung leh mahni chenna veng tihfai tluka hnathawh nuam hi a awm dawn em ni? Kan thawh that poh leh kan mawiin, a nuam tulh tulh mai bawk si a!” - Tv. U. Ngurkima Sailo
%% “ Aw, Mahlu! Engatinge Nupui ka neih hma khan ka lo tawn loh che? Nang ang tluka Nula hmeltha, pian nalh leh hnial hrat hi zan tina hnialpui atan hian kalo duhthusam tawh thin asin mawle!” - Pu. Nema

EDITORIAL
BRANCH HNATLANG HI
TYMA chuan kumin a FAINA HAPTA denchhanin hnatlang pui a ko mek a, Section hrang hrangte pawh mahni Section bik hnatlang nei lovin Section tinte a huhova thenfai hnatlang neih nise a ti a ni. He Faina hapta hnatlang hi Vengchhung hmel lanna leh Vengchhung mipuite kan lo hrisel nan a Branch YMA te hmalakna pawimawh tak a ni tih hi kan hre theuh awm e.
Kan Branch hian hnatlangpui hi a ko khat hle a, chutah kan neih chhun ah pawh Khawtlang leh Vengchhung thenfai lam hi a ni deuh zel a, hetia hruaituten hma an lak mek lai hian memberte hi an inthlahdahin, hnatlangpui koh hi kan ngaihthah bik emaw tih mai tur hian Section leh Sub-Committee hnatlang a kal aiin kan tlem ziah thin a, engvang nge ni ang..? Member tinte hian kan mawhphurhna leh kan tih tur dik tak kan hai ta em ni ang..??
Branch hi Section leh Sub-Committee te khaikhawmtu leh a langsarhna ber, Veng dang tena min lo thlirna ber a ni tih hi kan hriat a tul tawh tak zet a ni. Mahni Section leh Sub-Committee chauh ngaipawimawh a, kawng engkima hmalatu ni si, Branch hnatlangpui anih avanga midangte tih tur atana dah kan nih chuan Khawtlang leh Vengchhung tan hian kan inpe tawk lo tihna a ni. Chuvangin, member tin ten kan mawhphurhna leh kan tih tur te i hre thar leh ang u.
Hetia, Branch in Faina kawnga hma alak mek lai hian Vengchhung mipuite hian kan thlawp a tul hle a, kan In leh a vel hnim lutuk leh kan tuiluankawr bal leh tawp lutuk te hi kan thenfai a, kan enkawl ngun a tul hle a, hei hi Branch YMA kan thlawpna pawimawh tak pawh a ni reng a ni.