16/Oct/2011

YMA  GEN.  CONF.  2011  KAL  DUHTE  TAN  HMING  PEK  LUH  NI  HNUHNUNG VAWIIN

Tuithiang Veng Dt.16.10.2011 :  TYMA member YMA Gen. Conf. 25- 27 October, 2011 a kal tumte tan vawiin hi hming pek luh theihna Ni hnuhnung ber a ni ta a. Member tam zawk he Khawmpuia kan kal leh theihnana TYMA Executive Committee tena a hun an pawhsei leh hret hnuah vawiin hi hming pek luh theihna Ni hnuhnung ber chu a ni leh ta a ni.
Tarlan tawh angin Kumin YMA Gen. Conf. ah hian TYMA chuan Special Items ah Drama entir an tum a. Hei hi Tv. ZR. Thahmingliana leh TYMA member thahnem ngai tak tak ten tunah hian an buatsaih mek a. Audio Recording pawh tih zawh tawh niin, tunkar lo awm tur atang hian a chan (acting) an zir tan tawh dawn a. He Drama a tel tura an sawmte zawng zawng chu veng rilru pu chunga, a zir huna,  rawn thawhchhuah tum theuh turin an ngen nawn leh a ni.
Kumin Central YMA Gen. Conference ah hian Kum 2011 - 2013 chhunga Central YMA Office bearers turte thlanna neih tur a ni a. Heng kan tarlan te hi Branch leh Group YMA hrang hrang tena an Nominate te chu an ni -
HMING AWMNA  VENG

1.   Dr. Lalnuntluanga Zemabawk
2.   Er. K. Lalrimawia Thuampui
3.   H. Lalsangzuala Ramhlun Vengthar
4.   J. Lalsailova Mission Veng North
5.   Lalbiakzuala Khatla
6.   Lal Chungnunga Ramhlun North
7.   Laldawngliana Tochhawng Kanan Veng
8.   Lalhmachhuana Chaltlang North
9.   Lalrochuanga Pachuau Zarkawt
10. R. Lalbiakthanga Zemabawk North
11. R. Lalngheta Hlimen
12. R.L. Rindika Bungkawn
13. T. Sangkunga Dinthar
14. Vanlalruata Tuikual South

Kumin Central YMA O.B. thlanna turah hian TYMA aiawha palaite chuan an mimal duhdan leh kan Branch YMA kalphung ni mek angin, an duh duh an vote leh dawn a. A boruak siam zawnga che te chu TYMA Gen. Conference palaite hian kan Vote miah dawn lova. Central YMA hruaitu ni tlaka ngaihte chu, palai mimal theuh ngaihdana innghatin, kan vote leh dawn a ni.
Central YMA  emaw Branch YMA emaw pawh nise, TYMA  hian a boruak siam zawnga chet hi a remti ngai lovin, a pawm ngai lova. Chutiang taka kalphung nghet tak kan lo neih tawh avang chuan  boruak siam tumte chu  Branch YMA inthlanna ah pawh hian an la mualpho zat zat zel zawk a ni. Engpawhnise; Central YMA hruaitu tha tak tak kumin hian kan thlan chhuah leh ngei i beisei ang u.
He inthlanna buaipuitu turte hi Karleh Inrinni  chhun  Dar 11 hian Central YMA Office ah an kalkhawm dawn a. Hetah hian CEC member zawng zawngte leh  CEC lo ni tawh te, Group & Sub- Hqrs. YMA aiawh a inthlan buaipuitu tur tura ruat te an kal khawm dawn a. He inthlanna hi felfai lehzuala kalpui a nih theih dan tur an sawiho dawn

LAWRKHAWM


** Thlasik rim a nam zel a, kan veng chhungah Sava mawi tak tak an rawn tla lut zel bawk. Heng Sava mawi tak tak, abikin,  zing kara vengchhung hmun hrang hranga hmuh tur awmte hian nun an tihlim a, an rawn belh ngam venga cheng nih a nuam  bawk! Heng Sava te hi  ilo humhalh zel ang u.
** Tunlai hian vengchhungah In sa an tam hle a, kawngpui ah In sakna bungrua kan dah thin a, hei hi midang tana hnawk lo tura dah hram hram thin nise a tha ang. Tin, a bik takin Middle School kawt, Turning Point-ah hian Motor leh Bungrua eng chi pawh motor in-turn na tur dala dah loh tur a ni.
** Tunlai hian Venglai tuikhur chu tlantu an thahnem ta hle a, thal kan hmachhawn leh tawh dawn tak avangin  tui pawt tu ten pawh dan chin tawk hriain daihzai taka kan chan tlan theih nan inken thiam a tha hle ang.
** Kan Veng leh Bethlehem inkalpawhna Lei pui, a chhuat cement khawk chu Local Council ten siamthat tumin hma an la mek. Helaiah hian rod a lang tawh a, aranglama siam that thuai beisei a ni. Tin, he Lei ah hian Motor leh In sakna bungrua dah khap tlat a ni bawk.
** Pu Lalthatluanga te chhungkua chu an nu nau nupui neihna Thenzawlah tunkar khan an kal a, Pu C.H. Vanlalduha, Pu Lalremngheta leh Tv. Thahlira (Vanapa Sec. Asst. Leader) ten an tawiawma, zirtawpni khan an lo haw leh.
** Pu R. Mankima (TYMA Advisor) chu tunlai hian Khawsik avangin In lamah enkawl mek a ni.
** Pi Biakhliri w/o R. Liansanga chu tunlai hian damlohna avangin In lamah enkawl mek a ni.
** Pi Thanpuii m/o George Lalthansanga chu inneihna hmanga Keifanga a zin hnuin nimin Inrinni khan tluang takin a rawn haw leh ta.

MEMBERPUITE CHANCHIN


** Tv. Lalbuatsaiha (Sipai) chu a awmna Madhya Pradesh atangin chawlh hmangin tunkar ningani khan a rawn haw.
** Pu. Lianzathanga te nupa chu an rawngbawlna Vathuampui lam atangin tunkar tir lam khan an rawn haw a, nau neih an tum hnai niin kan lo hria.
** Pu R.D. Lalthangmawia te nupa chu in check-up turin Guwahati lamah an kal.
** Tv. Lalmawizuala s/o Sanghnuni leh Nl. K.M. Lalhmachhuani d/o Upa K. Lalsanga Khawzawl te chu ni 19/10/11 hian Tuithiang Presbyterian Kohhran Hall-ah an innei dawn.
** Tv. Lalhlimawma chu chawlh hmanga a rawn haw hnuin tunkar khan a lehkha zirna hmun Shillong lamah a liam thla leh ta.
** Tv. Lalpeksanga leh Tv. P.C. Zodinpuia (Papuia) te chu hna tul avangin Samthang lamah an zin.
** MISSTA tena 2012 HSLC exam intuaihriamna atana Pre-Board Examination 2011 an buatsaih chu tunkar Zirtawpni khan zawhfel a ni ta a. Kha exam ah khan kan vengchhunga Class X zirlai tena tha taka an passed a, an sikul aiawha HSLC (Regular) Exam tura an inziahtlin theuh kan duhsak e.

INKAHNA-HUAT AWIH LOH

** “Mahlui hi hmanzan chu Bike ah an rawn phura, tleirawl chuang ai in a zei zawk, a bei thlap mai a,. a beng zawnah ava be sar2 lehnghal. an nui dun var2a, a nawm hmel khawp mai..”           - Thahlira (V.Sec)
** “Kapa  Sawta NLUP min pek hmangin  Dawr ka siam tan dawn a, Ronguri’n a nghak tai-tuk thin ang! Min ringhlel duh suh u, funte tih angreng vel hi chu ka zuar tel dawn lo reng reng!”    - Pa Chhuanga Venglai
** “Kawi pawh a kawm a that chuan a rah  pawh a tha..an lo tih thin angin, Pa hmeltha leh Pa pian thiam Pu. Humhima te ang chuan fa hleitling leh hmeltha tak tak an neih tak zut  mai hi mawle!”   - Pu. C.Kapkima
** “U. Khawlrem....nangte, U. Nema te,  U. S.Sawma te, U.Mahrila te leh U. Mahlui-i te ho hian 2012 atang hi chuan KTP in ‘Over’ vek tawh dawn a ni awm a..... Kei chu kum 4 dang kala nei a!”        - Pu. Lalte-a
** “Lal Nu-Rovi boral Ni khan, Veng dang a ni a..mipui an tam bawk si avang khan, ka tah Key kha a sang thei ta vak lova! Tawngthuchhe lovah, Lal-Nu Hma-i te, Rohmingi te, Thansiami te, Sanghnuni te, Lal Nu- Rami te ho hi an kal hmasak ve hunah chuan ka dek ring lawng lawng toh viau ang! Mahni veng kha a ni tawh dawn a,  inthlahrunawm tawh dawn hek lo!”         - Pi. Lucy  Lalzuiliani
** “Kar hmasa T. Sec. Sports a pa langsar ber leh Top Scorer (?) Pu. C. Kapkima kha Inrinni a  YMA Godown nilenga satu hnatlang mi 7 velte khan kan va ngai che ve! Mahni Pa-te Inchung chih-Ni a Fapa lengbo angah kan ngai che!”
      -  Pu. Huaia, Pu. Tea  &  Pu. V.L. Zuala te ho


** “Zonun, i  Arpa thar  (Vang-Nu) en turin U.Sanga i sawm a ni maw? A rawn en ta lo kha i vannei top! Rawn en sela chuan ho tiin, a pen-hlum sak daih maithei che! Amah hi....Ar sualhuai aia Boiler lian tak leh thau tak sa ngaina tu a nih hi!Warning ! Warning!”                                            
- Thianpa Kawla te Unau
** “Ka sap hming thar chu ‘My Rain’ a ni tawh e. Hetiang hlir hian fon ah min save ula,,. min ko tawh rawh u..”         - Rain-a (Reuben-a ni tawh lo)

EDITORIAL


 Kan hrui pawh hnawkte hi

Kan Veng chhunga thil langsar tak ni si, kan sawi vul teh chuk loh leh kan engto em em l;em loh chu khawlaia hrui hnawk inzam nasa lutuk hi a ni tlat! Electric hrui chu thudang lo ni ta se, heng Phone hrui, Cable TV hrui leh Private Tui Connection pipe te zozai avang hian kan veng step chhukthla leh kawngpui vel hian Iskut zamna hnuai te pawh a ang ta rum rum mai a nih hi. Hei hi ngaimawh chi nge chi loh tih chungchang chu mimal ngaihdan ah a innghat thui viau anga. Amaherawhchu, Veng hmel hmang ti danglamtu a nih mai piah lamah harsatna min siam tam telh telh dawn niin a lang a, ngaihthah ngawt chi a ni ta lo.
Heng hruite hi pawimawh tak tak vek, a tel lova kan nunphung khaihlak thei te an nih tawh hlawm avangin a pawng ataka han ramhrui safai duak duak lah a tihchi der mai si lova! Mahse heti ngawta a awm reng hi chu a fel lo tan ta viau mai bawk si a, ngaihtuahna i seng tlang teh ang u. Hei aia felfai zawk a zam thlak dan hi chu a awm a rinawm tlat a ni. Mahse chu chu tu kutah nge awm tha anga, tu in nge hma han la se tha ang tih ringawt pawh sawi tha, fe a ni phawt mai! “Ti hian awm mai mai se a ni mai a lawm” tiin Pa thenkhat chuan ngaihdan kan auchhuahpui leh puat ngei bawk ang.
Mahse heti zawng hian i ngaihtuah teh ang u. Tuna a awmsa mah heti deh duah hi a nih tawh laiin Veng kan changkang anga, In pawh a dinbelh ve zel anga. tun atanga kum 5 a ral leh hunah chuan a rura tawh viau lawng maw? Chuvang chuan tun atang hian  kan khawtlang hruaitute pawh hian a tihziawm dan leh felfai zawka heng hruite zam an nih theihnan hian ruahmanna han siam thuai thuai se a tha ngawt ang.